Read Bima KISAH RASU-RASU 25 Bible Online

KISAH RASU-RASU 25 - Bima bible

KISAH RASU-RASU 25

¹Tolu nai sawa'u b̄a Festus rongga d̄i dana ra rasa ede, sia tu'una d̄i Kaisarea lao aka Yerusalem.

²Ta aka dou-dou mana'ekai imam ro dou-dou mana'ekai Yahudi ngoana d̄i sia rab̄ab̄u ra lo'o b̄a siad̄oho d̄i ru'u b̄a la Paulus. Siad̄oho siwi ncauna la Festus

³loakud̄u kai taho adena d̄i siad̄oho, sia ngawana kau dou wa'a la Paulus aka Yerusalem; b̄ara siad̄oho wa'ura mafakana hade la Paulus d̄i woha ncai.

⁴Pala cambe b̄a la Festus, ”La Paulus wunga taha d̄i Kaisarea; ro ndai nahu rau wati ntoi walina d̄imadula mbali ta aka.

⁵Ndad̄i, co'opu dou-dou mapenti poda d̄i ade weki nggomid̄oho d̄imalao sama lab̄o nahu aka Kaisarea d̄imaparakarana sia ta aka, nggara napodasi karawina mancara.”

⁶Sawa'u b̄a ngge'e d̄i Yerusalem kira-kira waru atao sampuru nai wali, la Festus dula mbali aka Kaisarea. Naisi sia kalampana sida pengadila ro kauna dou mai wa'a satando la Paulus.

⁷Wakatu rongga la Paulus, dou-dou Yahudi mawa'ura mai ta Yerusalem makid̄i hekona, ro tampu'ura b̄ab̄u ra lo'ona ma tani d̄i sia. Pala siad̄oho wati loana mbei bukuti b̄ab̄u ra lo'ona ede.

⁸D̄i ade horukaina weki ndaina ede, nggahi la Paulus, ”Mada wati wara karawiku ma ncara d̄i hukum Musa atao d̄i Bait Allah ro d̄i Kaisar Roma.”

⁹Pala Festus nane'eku weha ade dou Yahudi. Edempara sod̄i b̄a sia d̄i la Paulus, ”Sab̄ua mangawa nggomi lao aka Yerusalem d̄iparesa d̄i tando nahu ta aka mab̄oha b̄ab̄u ra lo'o ede?”

¹⁰Cambe b̄a la Paulus, ”Mada wunga kid̄iku d̄i tando mahkama Kaisar Roma; ro d̄i hid̄i edeku mada pab̄ua d̄i paresa. Ndai ita mab̄adena b̄a one mada wati wara ncaraku d̄i dou Yahudi.

¹¹Nggara mada wa'ura sapaku hukum ro karawiku ma patu d̄i b̄ab̄ukai hukuma made, mada karela made. Pala nawati podasi ra b̄ab̄u ra lo'o siad̄oho ede, wati kone sab̄ua dou rau maloana d̄onggo mada d̄i siad̄oho. Mada maraho d̄iparesa d̄i pangadila Kaisar!”

¹²Sawa'u b̄a mafaka ro dou-dou mataki ngoa ra tei kataho, nggahi Festus, ”Raho b̄a nggomi d̄i paresa d̄i pangadila Kaisar, ndad̄i nggomi pab̄uapu lao satando wa'u Kaisar.”

¹³Wati ntoina sawa'u b̄a ede, Sangaji Agripa ro Bernike maina d̄i kaisarea d̄i ne'ena nggahi taho ra ntai d̄i ru'u b̄a Festus.

¹⁴Sawa'u b̄a siad̄oho wara pila-pila nai ta ede, Festus ngoa kab̄aena parakara la Paulus d̄i Sangaji Agripa. Nggahi Festus, ”Wara ta ake sab̄ua dou rataha ratu'u wi'i b̄a Feliks.

¹⁵Wakatu mada wara d̄i Yerusalem, dou-dou mana'ekai imam ro dou-dou mana'ekai Yahudi d̄onggo mbeina b̄ab̄u ra lo'o siad̄oho d̄i ru'u b̄a dou ede ro rahona loakud̄u b̄ab̄ukai b̄a mada kukuma d̄i ru'u b̄a sia.

¹⁶Pala cambe b̄a mada b̄a one dou Roma wati loana mbei ndede lalo sab̄ua dou rab̄ab̄u ra lo'o d̄i hukum, nggara dou rab̄ab̄u ra lo'o ede watipu ncao tandona lab̄o dou-dou mab̄ab̄u ra lo'ona ra mbei wakatu d̄i horukaina weki ndaina.

¹⁷Ndad̄i, wakatu siad̄oho maina ta ake, mada wati ngena ntoiku. B̄ala ai sanai mada ndawiku sida pengadila ro kauku mai wa'a dou ede d̄i tando sida.

¹⁸Wakatu dou-dou mab̄ab̄u ra lo'ona tu'u kid̄i ncunduna b̄ab̄u ra lo'o siad̄oho, siad̄oho wati ngoana rawi mancara kone sato'i rau b̄une rakacai b̄a mada siad̄oho nakaronggaku.

¹⁹Siad̄oho cuma wati ncihi ncaona nuntu ra nggahi lab̄o sia mab̄oha agama ndai siad̄oho ro mab̄oha sab̄ua dou ma ngara Isa. Dou ede wa'ura made, pala la Paulus nateleku b̄a one dou ede mori.

²⁰B̄ara mada mbora akaku b̄a one b̄uneku carana mada loakaiku raka nuntu ra nggahi mapoda mab̄oha parakara ede, sod̄i b̄a mada d̄i la Paulus sab̄ua sia nangawa lao aka Yerusalem ro d̄i paresa ta aka mab̄oha parakara ede.

²¹Pala la Paulus rahona ne'e banding; sia rahona loakud̄u sia ngge'empa d̄i ade uma bui sampe parakarana kanggori b̄a Kaisar. B̄ara ndedena mada kauku loakud̄u sia ngge'empa d̄i taha, sampe rakakai b̄a mada wakatu d̄i nggadukaiku sia d̄i Kaisara.”

²²Edempara nggahi Agripa d̄i la Festus, ”Ndai nahu rau mane'e ringa dou ede.” ”Naisi Ita maloaku ringa sia,” cambe b̄a la Festus.

²³B̄ala ai sanai Agripa ro Bernike maina kai upacara negara. Siad̄oho lu'una d̄i hid̄i sida kai sama-sama lab̄o dou-dou mana'ekai lewa ra laka lab̄o dou-dou mapenti d̄i kota ede. Kai parenta b̄a Festus, la Paulus wa'a kalu'u d̄i ade sidakai ede.

²⁴Edempara nggahi Festus, ”Sangaji Agripa ro dou-dou mawara ta ake! Dou ake wa'ura da'awa b̄a sara'a bangsa Yahudi d̄i mada, nataho rad̄i Yerusalem ro ma wara ta ake. Siad̄oho b̄ab̄u ra lo'ona ro kanggica menana b̄a one sia wati patuna d̄i wi'i kamori.

²⁵Pala mada wati rakaku eda rakarawina mancara ma patu d̄ib̄ab̄ukai hukuma made. Ro b̄ara ndai sia wa'ura rahona parakarana d̄i paresa d̄i pangadila Kaisar, mada wa'ura nggahi cumpukaiku d̄i nggaduku sia d̄i Kaisar.

²⁶Pala mada watipu ntauku nuntu ra nggahi ma poda mab̄oha weki ndai sia d̄i tunti ade sura mada d̄i ru'u b̄a Kaisar. B̄ara ndedena mai wa'a satandoku sia d̄i Itad̄oho sara'ana, mapenti poda d̄i tando Ma D̄ese Ra Ntasa Sangaji Agripa! Aona nggahi b̄a mada eded̄u loakud̄u sawa'u b̄a paresa ake, wara nggahi d̄i tuntikai b̄a mada sura.

²⁷B̄ara d̄i iu b̄a mada, wati ncihi ncaona nggadu sab̄ua dou rabui kai wati wara ncarana rab̄ab̄u ra lo'okai d̄i sia.”