Read Bima KISAH RASU-RASU 26 Bible Online

KISAH RASU-RASU 26 - Bima bible

KISAH RASU-RASU 26

¹Nggahi Agripa d̄i la Paulus, ”Nggomi loara nuntu ra nggahi d̄i horukaimu weki ndaimu.” Edempara la Paulus hantana rimana edempara nggahina d̄i horukai wekina b̄une ake,

²”Ma D̄ese Ra Ntasa Sangaji Agripa! Mada neo poda adeku loaku karongga nuntu ra nggahi d̄i horukaiku weki justru d̄i tando Sangaji mab̄oha sara'a b̄ab̄u ra lo'o rada'awa b̄a dou-dou Yahudi d̄i mada;

³mapenti poda b̄ara Sangaji mab̄ade poda rangina kai b̄a dou Yahudi. B̄ara ndedena, mada maraho d̄i Ita takade'e to'ipu nggahi ra eli mada kai saba.

⁴Sara'a dou Yahudi nab̄adeku mori ra woko mada ra'aipu to'i-to'i mada wa'u. Siad̄oho nab̄adeku b̄a one aipu tampu'u sampela mada, mada wa'ura moriku d̄i ade woha bangsa ndai mada d̄i Yerusalem.

⁵ Wa'ura ntoira siad̄oho b̄adena mab̄oha mada. Nggara nane'esi b̄a siad̄oho, siad̄oho naloaku mbei sakasi b̄a one aipu saramba wa'una mada wa'ura moriku kai dou Farisi ro b̄atu sara'a atora ma ipi tenggo poda d̄i ade agama madad̄oho.

⁶Ro ake mada makid̄i ta ake d̄i paresa b̄ara mada imbiku d̄i rasake randawi b̄a Ruma Hatalla d̄i wa'i ra waro madad̄oho.

⁷Rasake ede d̄i ne'e b̄a sampuru d̄ua suku bangsa Israel, ndad̄ina siad̄oho nemba d̄i Ruma Hatalla d̄i aimarai aimangad̄i. Ro b̄a imbi mada d̄i rasake ede, Sangaji Ma D̄ese Ra Ntasa mada kancara b̄a dou-dou Yahudi.

⁸B̄ab̄auku cina ra angi dou-dou Yahudi wati imbita b̄a one Ruma Hatalla makamori mbali dou mamade?

⁹ Ntoina ndai nahu rau manggahi b̄a one nahu pab̄uaku karawi sara'a d̄i b̄ab̄u ka'ihakai Ruma Isa dou Nazaret ede.

¹⁰Ro poda edeku ma wa'ura karawi b̄a nahu d̄i Yerusalem. Kai sura kuasa dou-dou mana'ekai imam, nahu wa'ura kalu'uku d̄i ade uma bui mboto dou-dou ma to'a d̄i Ruma Hatalla. Kone nahu rau b̄atuku ka'io b̄a one siad̄oho b̄ab̄u kai hukuma made.

¹¹Mboto poda nahu kancokiku siad̄oho d̄i uma-uma sambeakai, loakud̄u pakasa siad̄oho wati imbina d̄i ra'imbina ede. B̄a ipi pana ade nahu d̄i siad̄oho, ndad̄ina d̄i kota-kota makalaina nahu lao d̄i cocokaiku siad̄oho ta aka.”

¹²”Kai ne'eku ede rau mada wa'aku sura kuasa dou-dou mana'ekai imam ro lao aka Damsyik.

¹³Ro d̄i wakatu mada d̄i woha ncai, wakatu mbolo ninu, Sangaji Ma D̄ese Ra Ntasa, mada edaku sab̄ua taroa d̄i langi ma ncewi taroa poda ntewi kaisi taroa liro. Taroa ede kalea hekona mada ro dou-dou ma lampa sama lab̄o mada.

¹⁴Madad̄oho sara, ana mbo'o suncumu d̄i dana. Edempara mada ringaku eli manggahi d̄i mada kai nggahi Ibrani, ’Saulus, Saulus! B̄ab̄auku nggomi kancoki ntuwumu Nahu? Nggomi d̄ima'iu pili ndaimu, nggara nggomi ma'ao ntuwusi mana'ekai Sia ma ndad̄i Rumamu.’

¹⁵Edempara nggahi mada, ’Cou Ita, Ruma?’ Ro cambe b̄a Ruma, Nahu Isa rakancoki b̄a nggomi.

¹⁶Tu'u ro kid̄ira! Nahu katadaku weki d̄i nggomi d̄i ne'eku hanta nggomi d̄imandad̄i ada-Ku. Nggomi pab̄uapu kahabamu d̄i dou makalai au ra'eda b̄a nggomi d̄i ainaina ake mab̄oha Nahu ro mab̄oha au rad̄ikaukai b̄a Nahu d̄i nggomi peade d̄i wakatu ma kento.

¹⁷Nahu d̄imahori nggomi d̄i bangsa Israel ro d̄i bangsa makalaina ma laina Yahudi. Nahu d̄i ma kau nggomi lao d̄i siad̄oho

¹⁸d̄imahengga wea mada siad̄oho, loakud̄u siad̄oho losa d̄i ade rindikaina ro lu'u d̄i ade taroakaina; loakud̄u siad̄oho hori weki d̄i ade pangaru Ibilis, edempara kuasakai b̄a Ruma Hatalla. Ndad̄i kai imbina d̄i Nahu dosa-dosa siad̄oho wa'ura kangampu wea ro siad̄oho maraka ru'u anggota ela Ruma Hatalla rakad̄ale.’ ”

¹⁹”Bara ndedena, Sangaji Agripa, mada ma'usaha ncau to'a d̄i ra'eda b̄a mada ade nifiku rambei b̄a Ruma ro tarima b̄a mada rad̄i Ruma Hatalla ede.

²⁰ Kai ngoa ntiri b̄a mada d̄i dou-dou b̄a one siad̄oho pab̄uaku tobana rad̄i dosa-dosa siad̄oho ro d̄onggona weki d̄i Ruma Hatalla ro katadana d̄i ade mori siad̄oho b̄a one siad̄oho wa'ura tobana rad̄i dosa-dosa siad̄oho. Mada ngoaku lampa rawi ede sarambana d̄i Damsyik, edempara d̄i Yerusalem ro d̄i sara'a Yudea ro d̄i woha dou-dou malaina Yahudi.

²¹Ndad̄i b̄ara ndedena dou-dou Yahudi wa'u ra letona mada d̄i Bait Allah ro ne'ena hade mada.

²²Pala sampe wakatu ake mada horu b̄a Ruma Hatalla, ndad̄ina mada loa kid̄i ta ake d̄i mbeiku sakasi d̄i sara'ana dou — mana'e ro mato'i. Au ranggahi b̄a mada ake wati laina ntewi kaisi ma wa'ura karongga b̄a Ruma Hatalla d̄i nabi-nabi ro Musa;

²³ eded̄u b̄a one Sangaji Mambei salama rasake b̄a Ruma Hatalla ede pab̄uaku susa ra ncokina, ro mandad̄i dou ma sarambakaina ma mori mbali sawa'u b̄a madena; loakud̄u kai ede Sia loana kahaba taroa — eded̄u mori d̄i salamakai — nataho d̄i ru'u b̄a dou-dou Yahudi ro d̄i dou-dou malaina Yahudi.”

²⁴Wunga mbuipu la Paulus nuntu ra nggahina mab̄oha horukai wekina ede, kanggica Festus, ”Nggomi wa'ura ringu Paulus! Ilimumu ma mboto ede wa'ura kandad̄ina ringu nggomi!”

²⁵Pala cambe b̄a la Paulus, ”Mada wati ringuku, Ma D̄ese Ra Ntasa. Nggahi ra eli rarenta b̄a mada ede napodaku ro losana d̄i kananu ma raso.

²⁶Ndai Sangaji mab̄ade podana d̄i lampa rawi ede. B̄ara ndedena mada disaku nuntu ra nggahi d̄i tando Sangaji kai nuntu ntiriku. Mada ka'imbi podaku wati kone sab̄ua rau d̄i ade lampa rawi ede ma watipu b̄ade b̄a Sangaji, b̄ara sara'ana ede wati ndad̄ina d̄i hid̄i-hid̄i ma cili weki.

²⁷Ma D̄ese Ra Ntasa Sangaji Agripa, sab̄ua Sangaji ma'imbiku d̄i au ranggahi b̄a nabi-nabi? Nggahi b̄a mada Sangaji pasti imbi!”

²⁸Edempara nggahi b̄a Agripa d̄i la Paulus, ”Kacai b̄a nggomi mod̄a kandad̄imu nahu ela Al Masih d̄i ade wakatu ma poro ake?”

²⁹”D̄i ade wakatu ma poro atao ma d̄ondo,” cambe b̄a la Paulus, ”mada mado'a d̄i Ruma Hatalla loakud̄u Sangaji ro Itad̄oho ma ringa ro kade'e mada d̄i ainaina ake loa d̄imandad̄i b̄une mada — selasi rante ake, pasti!”

³⁰Edempara cumpukaina sangaji, gubernu, ro Bernike, ro sara'a ma kalaina tu'u kid̄ina.

³¹Sawa'u b̄a warana ta ari lua, siad̄oho nggahi d̄i sab̄ua lab̄o masab̄uana, ”Dou ake wati karawina mancara ma patu d̄i hukum kai hukuma made atao d̄i bui.”

³²Edempara nggahi Agripa d̄i Festus, ”Dou ake loara d̄i hori, nggara watisi sia ne'ena da'awa parakarana d̄i paresa d̄i pangadila Kaisar.”