Read Bima KISAH RASU-RASU 27 Bible Online

KISAH RASU-RASU 27 - Bima bible

KISAH RASU-RASU 27

¹Sawa'u b̄a mafaka b̄a one nami pab̄uaku loja lao aka Italia, la Paulus ro pila-pila dou rataha ma kalaina ra d̄onggo d̄i Yulius, perwira tentara Roma ma d̄ipehekai ”Resimen Kaisar”.

²Nami ne'emu kapa ma mai rad̄i Adramitium, edempara laokaimu kapa ede ma wa'ura sadia ne'e lao aka lab̄ukai kapa d̄i propinsi Asia. Aristarkhus, sab̄ua dou Makedonia ma mai rad̄i Tesalonika, lao sama rauna lab̄o nami.

³B̄ala aisanai nami rongga d̄i Sidon. La Paulus nawancuku ao kataho b̄a Yulius. Sia loa lao lamba lengad̄ohona loakud̄u siad̄oho loa mbei d̄i sia au-au rad̄iparaluna.

⁴Rata'ede nami lao loja walimu. B̄ara angi masambali lab̄o kapa, nami loja ntuwumu b̄atu kengge moti pulau Siprus ma wati ipi b̄oha b̄a angi.

⁵Edempara nami lojamu d̄i moti ma ncao tando lab̄o Kilikia ro Pamfilia edempara rongga d̄i Mira d̄i dana ra rasa Likia.

⁶Ta ede Perwira ede rakana sab̄ua kapa ma mai rad̄i Aleksandria ma ne'e lao loja aka Italia. Ndad̄i sia pesona nami d̄i kapa ede.

⁷Pila-pila nai ntoina nami lojamu nawancuku ahona, ro kai susa podamu edempara nami ronggamu b̄une d̄o'o kota Knidus. Edempara b̄ara angi mbuipu kentena, nami wati loamu loja d̄i ncai masarambakaina. Ndad̄i nami lojamu tad̄ona pulau Kreta sapa saimu Nanga Salmone loakud̄u ta aka nami wati hina b̄a angi.

⁸Kai susa podamu nami lampa b̄atumu kengge moti pulau ede sampe cumpukaina nami rakara d̄i sab̄ua hid̄i mangara lab̄u Ntika, wati d̄o'ona lab̄o kota Lasea.

⁹Wakatu ede Aruraja Dame kai dou Yahudi wa'ura nggori. Nami wa'ura mboto pakimu wakatu, ndad̄ina wa'ura laina wakatu walina d̄i loja kai salama. B̄ara ndedena la Paulus ngoa ra tei katahona ake d̄i siad̄oho,

¹⁰”Cina ra angi, kananu b̄a nahu, eded̄u d̄i iha poda kai loja ntuwusi ndai. Ndai d̄ima'iu rugi mana'e poda lai mpoana d̄i wua ro kapa ndai, pala nawa ndai rau d̄imambora.”

¹¹Pala perwira ede na'ipipu imbina d̄i dou mawa'a kapa ro kapte kapa ntewi kaisi d̄i nggahi ra eli la Paulus.

¹²Hid̄i lab̄ukai kapa ta ede poda wati tahona d̄i lab̄ukai oru b̄usi ai. B̄ara ndedena mboto dou mab̄atu kapa nangawaku lao loja wali tu'u wi'i hid̄i lab̄u kai kapa ede b̄ara siad̄oho nane'eku usaha rongga d̄i Feniks ro ngge'e ta aka santoi oru b̄usi ai. Feniks eded̄u hid̄i lab̄ukai kapa d̄i Kreta ma tando d̄id̄o ro tando d̄id̄a.

¹³Wakatu ede angi mamai d̄o mai mbuipu narina. Ndad̄i dou mab̄atu kapa kacaina siad̄oho wa'ura loa loja wali. Ndad̄i siad̄oho saloana jangka edempara loja b̄atuna kengge moti pulau Kreta.

¹⁴Pala wati ntoi sawa'u b̄a ede angi na'e — eded̄u d̄i pehekai angi mamai ta Ele D̄a — ma mbani rad̄i ari lua,

¹⁵ro b̄oena kapa nami. B̄ara wati lu'ukai b̄a aka kapa loja wali rai ao angi, ndad̄i nami kamidimpa weki ro co'omu kapa wa'a b̄a angi.

¹⁶Nami waraja wati b̄oha b̄a angi, wakatu nami lampamu tasab̄ae d̄ona Pulau Kauda ma to'i ede. Ta ede kai maki podamu nami loamu kantiri sakoci kapa nami.

¹⁷Sawa'u b̄a ampa b̄a nami sakoci kapa, kapa ede katenggo kai ai rad̄iki heko d̄i kapa ede. B̄ara dahu ntangga d̄i sarae Sirtis ma tendo, loja kalondo edempara kapa co'o b̄atuna angi.

¹⁸Angi na'e wati dengga-denggana, ndad̄ina b̄ala aisanai wua kapa tampu'ura paki ade moti.

¹⁹D̄i'ainaina sawa'u b̄a ede dou-dou mab̄atu kapa ede paki rauna tarato'i kapa ade moti b̄a ndai siad̄oho ede.

²⁰Pila-pila nai ntoina nami wati edamu liro ro ntara, ro angi na'e wati dengga-denggana. Cumpukaina nami watid̄u wara d̄i iukaimu salama.

²¹Pila-pila wakatu ntoina dou-dou ede wati ngaha ra nonona. Ndad̄i la Paulus lao kid̄ina d̄i woha siad̄oho edempara nggahina, ”Cina ra angi! Paira b̄atumu nggahi nahu b̄a nggomid̄oho ro wati lojamu rad̄i Kreta, ndai wati iuta sara'a iha leli ro rugi b̄une ake.

²²Pala ake rau nahu maraho poda-poda d̄i nggomid̄oho katenggopu ademu. Wati kone sab̄ua dou d̄i ade weki nggomid̄oho d̄imamade; kapa ndai akempa d̄imamoda.

²³B̄ara aka sangad̄ina mala'eka ma ramai ta Ruma Hatalla ra nemba b̄a nahu, eded̄u Ruma Hatalla ma kantauna nahu, maina d̄i nahu.

²⁴Nggahi mala'eka ede, ’Aina dahu, Paulus! B̄ara nggomi d̄imalao satando Kaisar. Ro b̄ara taho ade Ruma Hatalla d̄i nggomi, sara'ana dou ma loja lab̄o nggomi d̄imasalama b̄ara nggomi.’

²⁵B̄ara ndedena, cina ra angi, pab̄uapu nggomid̄oho katenggo ademu! B̄ara nahu ka'imbi d̄i Ruma Hatalla b̄a one sara'ana d̄imandad̄i b̄une ranggahi-Na d̄i nahu.

²⁶Pala ndai peasi d̄imantangga d̄i kengge moti d̄i sab̄ua pulau.”

²⁷D̄i'aimangad̄i ma kasampuru upa naikaina nami wunga karentemu d̄i Moti Adria. Takasi b̄oha ai dou mab̄atu kapa ma'iuna kapa wunga lao raka d̄enina lab̄o mangokaina.

²⁸Ndad̄i siad̄oho d̄ikina wadu kai ai d̄i uku tiona d̄ei moti. Palasi hid̄i ede d̄eina ne'empara upa mpuru mete. Wati ntoina sawa'u b̄a ede siad̄oho uku walina, edempara b̄adena d̄ei moti tahid̄i ede d̄eina ne'empara tolu mpuru mete.

²⁹Siad̄oho dahuna kapa ntangga d̄i wadu taka, ndad̄i siad̄oho kalondona upa mbua jangka ta ari kontu kapa, edempara ne'e menana loasi roci taroa ai.

³⁰Kai kamidi weki dou-dou makarawi kapa ne'e rai tu'u wi'i kapa ede. Siad̄oho kalondona sakoci awa oi kai b̄une-b̄une ne'ena kalondo jangka tatando kapa.

³¹Pala nggahi la Paulus d̄i perwira ro tentara-tentara ma d̄i kapa ede, ”Nggara watisi ngge'ena d̄i kapa dou-dou mab̄atu kapa ake, nggomid̄oho sara'ana wati salamamu.”

³²B̄ara ndedena tentara-tentara ede dompona ai sakoci ede, ndad̄ina sakoci ede wa'a b̄a oi moti.

³³Sawatipu b̄ala ai, la Paulus kauna siad̄oho sara'ana ngaha ra nono. Nggahi la Paulus, ”Wa'ura sampuru upa nai ntoina nggomid̄oho sara'ana cuma ngenampa kai darura ro wati ngahamu au-au.

³⁴Nahu makau nggomid̄oho ngaha wa'upu sato'i. Ede taho d̄i ru'u b̄a nggomid̄oho, d̄i tenggo walikaimu. B̄ara nggomid̄oho sara'ana d̄imasalama ro wati d̄imadancihi au-au.”

³⁵Sawa'u b̄a nggahi ndedena la Paulus wehana roti edempara rentana tarima kasi d̄i Ruma d̄i tando siad̄oho sara'ana. Sawa'u b̄a ede cengga-cenggana roti ede, edempara ngahana.

³⁶Ndad̄i siad̄oho sara'ana tenggo mbali adena ro ngaha samana.

³⁷Sara'a ma wara d̄i kapa ede wara d̄ua ratu pidu mpuru ini dou.

³⁸Sawa'u b̄a ngaha ra nono ncihina, siad̄oho pakina gando ra wua ade kapa d̄ei moti loakud̄u kapa wati ipi tanina.

³⁹Wakatu wa'ura taroa ai, dou-dou makarawi d̄i kapa edana mangokaina, pala siad̄oho wati b̄adena dana au ede. Siad̄oho edana sab̄ua nanga lab̄o kenggena. Ndad̄i siad̄oho nane'eku kalab̄u kapana ta aka nggara loasi.

⁴⁰Ndad̄i ai-ai sakoci ede dompo sara'ana edempara sakoci-sakoci ede co'ona mimi d̄i ade moti. Wakatu ede rau siad̄oho hori rauna ai-ai rad̄iki kai kapa. Edempara siad̄oho ampana loja d̄i tando kapa loakud̄u kapa ede wa'a b̄a angi lao aka kengge moti.

⁴¹Pala kapa ede ncorana sarae. D̄itandona ntangga ro wati loana ruku, takontuna leli b̄oe b̄a balumba.

⁴²Tentara-tentara d̄i kapa ede nane'eku hade sara'a dou-dou ra bui, b̄ara siad̄oho dahuna peade wara ma liwa lao takengge edempara raina.

⁴³Pala perwira ede matapana rane'e b̄a siad̄oho ede b̄ara sia nane'eku kasalama la Paulus. Sia kauna sara'a dou ma loa liwa babu ulu ro liwa lao aka kengge moti;

⁴⁴ma kalaina pab̄uaku b̄atu kentona kai nenti kapenta-kapenta atao au-au rambi'akai kapa ede. Kai karawina b̄une ede nami sara'ana salama sampe ta ari lua.