Read Bima KISAH RASU-RASU 28 Bible Online

KISAH RASU-RASU 28 - Bima bible

KISAH RASU-RASU 28

¹Sawa'u b̄a rongga kai salama, ede ampo b̄ade b̄a nami b̄a one pulau ede ngarana Malta.

²Ela ra dou mangge'e d̄i pulau ede nawancuku tahona d̄i nami. Siad̄oho weha ao katahona nami sara'ana ro kana'ena afi d̄i ru'u b̄a nami b̄ara wa'ura tampu'u londo ura ro nawancuku b̄usi rau.

³La Paulus kab̄orona haju, ro tauna haju ede d̄i ade afi. Wunga mbuipu sia karawina ede, wara salona sawa malosa, b̄ara pana afi ede, edempara notona rima la Paulus.

⁴Wakatu eda b̄a ela ra dou mangge'e d̄i pulau ede sawa matero weki rad̄i rima la Paulus, siad̄oho nggahina d̄i sab̄ua lab̄o masab̄uana, ”Dou ake pasti hadena dou, b̄ara konena sia wa'ura salama b̄a bahaya moti, Dewi Ma'adi wati co'ona sia d̄imamori.”

⁵Pala la Paulus wete pakina sawa ede d̄i ade afi lab̄o wati iuna pili kone sato'i rau.

⁶Kananu b̄a siad̄oho samporo wali rima la Paulus d̄imawinte atao sia d̄imamade sadeka. Pala sawa'u b̄a ngena pila-pila wakatu ntoina ro wati wara mandad̄i ma ipi na'e d̄i sia, lai wali kananu b̄a siad̄oho edempara nggahi siad̄oho b̄a one la Paulus eded̄u dewa.

⁷Wati d̄o'ona ro hid̄i ede wara dana ntau la Publius, dou mana'e b̄ora d̄i pulau ede. Kai taho poda adena sia tarima aona nami kai dou marongga d̄i umana tolu nai ntoina.

⁸Wakatu ede amana wunga henggena, sia hina b̄a pana ro b̄usi ro supu sera. La Paulus lao tiona ama ma hengge ede edempara do'ana ro tohona rima ese wawo ama ede ndad̄ina sia taho d̄i ade supukaina.

⁹B̄ara mandad̄i ede sara'ana dou ma supu d̄i pulau ede maina d̄i la Paulus, ro siad̄oho sara'ana kataho b̄a la Paulus.

¹⁰Siad̄oho mbeina d̄i nami mboto hadia, ro wakatu nami ne'e lao loja wali, siad̄oho lao wa'ana d̄i kapa sara'a d̄i paralu b̄a nami d̄i ade lampa ro laokaimu.

¹¹Sawa'u b̄a tolu wura ntoina ta aka, nami tu'u wi'imu pulau ede ne'e sab̄ua kapa ma ramai ta Aleksandria ma santoi oru b̄usi ai lab̄u d̄i pulau ede. Kapa ede kanina tanda ”Dewa Ndua Kastor ro Poluks”.

¹²Nami lab̄umu d̄i kota Sirakusa ro ngge'emu ta ede tolu nai ntoina.

¹³Ta ede nami loja walimu lampa b̄atumu kengge moti sampe aka kota Regium. B̄ala aisanai angi tampu'u mai d̄o maina, ndad̄ikaina d̄i ade d̄ua nai nami rongga d̄i kota Putioli.

¹⁴Ta ede nami edamu angi lab̄o pila-pila dou ma imbi d̄i Ruma Isa, ro b̄ara unda b̄a siad̄oho nami ngge'e lab̄omu siad̄oho saminggu ntoina. Edempara nami laomu aka Roma.

¹⁵Cina ra angi d̄i Roma ma imbi d̄i Ruma Isa ringana haba mab̄oha nami, ndad̄ina siad̄oho maina sampe d̄i Amba Apius ro Hid̄i kab̄oro kai weki Tolu d̄i weha aokaina nami. Wakatu la Paulus eda angina lab̄o siad̄oho, sia terima kasina d̄i Ruma Hatalla ro lembo poda adena.

¹⁶Wakatu rongga d̄i Roma, la Paulus loa ngge'e ndai kesena kai jaga b̄a sab̄ua dou tentara.

¹⁷Sawa'u b̄a tolu nai, la Paulus ouna dou-dou mana'ekai Yahudi d̄i hid̄i ede. Ro sawa'u b̄a kab̄oro weki siad̄oho, nggahi sia d̄i siad̄oho, ”Cina ra angi! Nahu wati wara ncaraku au-au d̄i bangsa ndai, atao sapa ranginakai b̄a rawi rasa ra tarima d̄i wa'i ra waro ndaita. Kone ade ndedena nahu rawa'u ra leto d̄i Yerusalem ro d̄onggona nahu d̄i dou-dou Roma.

¹⁸Sawa'u b̄a nggori paresa parakara nahu, siad̄oho nane'eku hori nahu, b̄ara nahu wati wara karawiku kone sab̄ua rawi mancara ma patu d̄i b̄ab̄u kai hukuma made.

¹⁹ Pala b̄ara dou-dou Yahudi ma'ao nahu, pab̄uaku raho parakara nahu paresa d̄i Kaisar Roma. Nahu karawiku ede laina b̄ara wara ntauku au-au d̄i b̄ab̄u ra lo'okaiku bangsa ndaiku.

²⁰Ro b̄ara ndedena nahu rahoku eda angi lab̄o nggomid̄oho d̄i nuntu ra nggahi lab̄oku nggomid̄oho; b̄ara nahu randante, b̄ara d̄i Mambei salama rangena-ngena b̄a bangsa Israel.”

²¹Edempara siad̄oho nggahina d̄i sia, ”Nami watipu tarimamu kone salela sura rad̄i Yudea mab̄oha nggomi. Ro wati wara kone sab̄ua dou ta aka ma mai wa'a haba ma b̄oha nggomi atao manuntu ra nggahi ma iha mab̄oha nggomi.

²²Pala nami mane'e ringa rau mab̄oha imbimu, b̄ara nami sara'ana wa'ura ringamu dou madacau d̄i ngoa ra tei ra'imbi b̄a ndai nggomi ede.”

²³Edempara siad̄oho ro la Paulus katantuna ainaina d̄i edakai angi wali. D̄i'ainaina ede mboto dou mamai d̄i hid̄i ngge'ekai la Paulus. Tampu'u aimasid̄i sampe aimambia la Paulus ngoa kab̄aena ro kahabana d̄i siad̄oho mab̄oha Karaja'an Allah. Kai kanina ayat-ayat d̄i Buku Musa ro Buku Nabi-nabi, la Paulus usahana loakud̄u siad̄oho imbina d̄i Ruma Isa.

²⁴Wara ma imbi d̄i au ranggahi b̄a la Paulus, pala wara rauja ma wati imbi.

²⁵Kai b̄atuna nggahi ndaina siad̄oho tu'u wi'ina hid̄i ede, sawa'u b̄a la Paulus nggahina b̄une ake d̄i siad̄oho, ”Ncihi ncao romo au ranggahi b̄a Ruma Hatalla d̄i Nabi Yesaya d̄i wa'i ra waro nggomid̄oho!

²⁶ Nggahi Ruma Hatalla, ’Laora nggahipu d̄i bangsa ake: Nggomi d̄imaringga ntuwu, pala wati loamu ka'ao; nggomi d̄imatio ro kade'e kab̄ae pala wati b̄ademu au ma rawa'u ndad̄i.

²⁷B̄ara kananu bangsa ake wa'ura ndad̄i dampa, fiko siad̄oho wa'ura ndad̄i mpinga ro mada siad̄oho wa'ura kapu wea. Ake ndad̄ikaina loakud̄u mada siad̄oho wati loana eda, fiko siad̄oho b̄ab̄aina ringana, kananu siad̄oho aina loana ka'ao, ro aina mbalina d̄i Nahu, edempara Nahu d̄imakatahona siad̄oho.’ ”

²⁸Cumpukaina nggahi la Paulus, ”Cina ra angi pab̄uapu b̄ademu b̄a one haba mab̄oha mori salama ma rad̄i Ruma Hatalla ake wa'ura kahaba d̄i bangsa-bangsa makalaina ma laina Yahudi. Siad̄oho d̄imab̄atuna!” [

²⁹Sawa'u b̄a la Paulus nggahi ndedena, dou-dou Yahudi ede tu'u wi'ina hid̄i ede ro cence ncihina sab̄ua lab̄o masab̄uana.]

³⁰D̄ua mba'a ntoina la Paulus ngge'ena d̄i Roma, d̄i uma ra sewa b̄a ndaina. Sia naca'u tarima ao sara'ana dou ma mai lamba sia.

³¹Ro kai disana sia kahabana d̄i siad̄oho mab̄oha b̄uneku Karaja'an Allah ro mab̄oha Ruma Isa Al Masih. La Paulus karawina ede kai wati wara mahakona.