Read Bima KISAH RASU-RASU 3 Bible Online

KISAH RASU-RASU 3 - Bima bible

KISAH RASU-RASU 3

¹D̄isab̄ua ainaina la Petrus ro la Yahya lao aka Bait Allah wakatu b̄oe tolu aimambia, eded̄u wakatu do'a kai.

²Ta aka tad̄a lawa na'e tangarakai ”Tad̄a Ncai Ntika”, wara sab̄ua dou mone ma made b̄inci ra'aipu nggana wa'una. Saniki ainaina dou ede d̄i lao wa'a ta aka d̄imaraho sadeka d̄i dou-dou ma lu'u d̄i Bait Allah.

³Wakatu eda b̄a dou ede la Petrus ro la Yahya mawunga lu'u ade Bait Allah, sia rahona d̄i siad̄oho loakud̄u mbeina au-au d̄i sia.

⁴Ndad̄i siad̄oho mantanda kab̄aena sia, edempara nggahi la Petrus, ”Tiopu nami!”

⁵Edempara dou ede tio kab̄aena siad̄oho kai ne'ena raka au-au d̄i siad̄oho.

⁶Pala nggahi la Petrus d̄i sia, ”Nahu wati ntauku sama sakali piti. Pala au ma wara d̄i nahu, ede d̄imbei b̄a nahu d̄iru'u b̄a nggomi: Kai kuasa Ruma Isa Al Masih dou Nazaret ede, lampara!”

⁷Edempara nenti b̄a la Petrus rima wana dou mamade b̄inci ede ro bantu katu'una sia. Wed̄i lalompa ed̄i dou ede ro pake ed̄ina ndad̄i tenggo.

⁸Edempara sia nggocu kid̄ina, ro tampu'una lampa rero. Edempara sia lu'u samana lab̄o la Petrus ro la Yahya d̄i ade Bait Allah, d̄i ade lampakaina ede sia nggoncu-nggoncuna ro roi ra wadina Ruma Hatalla.

⁹Sara'ana dou ma'eda sia lampa ro maroi ra wadi Ruma Hatalla.

¹⁰Edempara kawara weki siad̄oho b̄a one siaku mataki raho sadeka ma biasa doho d̄i ”Tad̄a Ncai Ntika” d̄i Bait Allah. Siad̄oho mbora akana ro midi poda adena au ma ndad̄i d̄i sia.

¹¹Dou ede b̄atu ncauna la Petrus ro la Yahya. Ro wakatu siad̄oho toluna ronggara aka sarambi d̄ipehekai ”Sarambi Salomo”, sara'ana dou mai kanggudu weki d̄i siad̄oho b̄ara midi adena.

¹²Wunga eda b̄a la Petrus dou-dou ede, nggahi sia d̄i siad̄oho, ”Oe dou-dou Israel, b̄ab̄auku nggomid̄oho midikai ademu d̄i lampa rawi ake? B̄ab̄auku nggomid̄oho ntanda ncaumu nami? Sab̄ua kacai b̄a nggomid̄oho dou ake loakaina lampa b̄ara wara kuasa d̄i nami atao nami mato'a d̄i Ruma Hatalla?

¹³ Ruma Hatalla ranemba b̄a la Ibrahim, la Ishak, la Yakub, Ruma Hatalla wa'i ra waro ndai, Ruma Hatalla ede wa'ura kad̄ese ra kantasana Ada-Na, eded̄u Ruma Isa. Ruma Isa edeku rad̄onggo mbei b̄a nggomid̄oho d̄i dou-dou makuasa, ro ra'ao b̄a nggomid̄oho d̄itando Pilatus mane'e hori Sia.

¹⁴ Sia raso ro taho, pala nggomid̄oho madaca'una Sia ro makau pakasa loakud̄u Pilatus horina dou marahade dou d̄i ru'u b̄a nggomid̄oho.

¹⁵Nggomid̄oho mahadena Sia, sapodakaina Siaku fu'u mori d̄i ru'u b̄a samenana dou. Ro Ruma Hatalla mawa'ura kamori mbalina Sia rad̄i ade madekaina. Nami mawa'ura eda madana lampa rawi ede.

¹⁶Nggomid̄oho wa'ura eda kab̄aemu au ma wa'ura ndad̄i d̄i dou mamade b̄inci ede. Sia wa'ura ndad̄i tenggo ro watid̄u supu walina b̄a one sia imbina d̄i Ruma Isa ro kuasa-Na. B̄ara imbina d̄i Ruma Isa ndad̄i dou ake wa'ura ndad̄i tenggo mbali d̄itando nggomid̄oho sara'ana.

¹⁷Cina ra angi! Ake nahu wa'ura b̄adeku b̄ara au rakarawi b̄a nggomid̄oho ro dou-dou mana'ekaimu d̄i Ruma Isa, ede karawi b̄a nggomid̄oho b̄a one nggomid̄oho wati b̄ademu au ma wunga karawi b̄a nggomid̄oho.

¹⁸Ro b̄ara ndedena ndad̄i rau au rangoa b̄a Ruma Hatalla ntoi podana d̄isara'ana nabi-nabi-Na, b̄a one Sangaji Mambei salama rasake ede pab̄uaku susa ra ncokina.

¹⁹B̄ara ndedena cina ra angi, tobara rad̄i dosa-dosamu ro mai mbalipu d̄i Ruma Hatalla, loakud̄u Sia furana dosa-dosamu.

²⁰Ruma d̄imamai d̄i nggomid̄oho ro nggomid̄oho d̄ima'iu mori maraso. Ro Ruma d̄imakau Ruma Isa mai d̄i nggomid̄oho, b̄ara Sia wa'ura katantu b̄a Ruma Hatalla d̄imandad̄i Sangaji Mambei salama d̄iru'u b̄a nggomid̄oho.

²¹Sia pab̄uaku ngge'ena d̄i saroga sampe Ruma Hatalla makandad̄ina b̄ou sara'a b̄une ranggahi b̄a Ruma Hatalla kai ncai nabi-nabi-Na wakatu jamana ma'ulu.

²² La Musa parana nggahina, ’Ruma Hatalla Rumamu d̄imanggaduna d̄i ru'u b̄a nggomi sab̄ua nabi rad̄i bangsa ndaimu, b̄une Sia nggaduna nahu. Nggomid̄oho pab̄uapu ringa sara'amu ranggahi b̄a nabi ede d̄i nggomid̄oho.

²³ Dou ma wati kade'e au ranggahi b̄a nabi ede, dou ede d̄i katesa rad̄i ela Ruma Hatalla ro d̄ikaleli.’

²⁴Nabi-nabi ma parana karongga haba rad̄i Ruma Hatalla, ratampu'u d̄i Nabi Samuel ro nabi-nabi makalaina ma mai kento, sara'ana ngoa ra kahabana mab̄oha jamana ake.

²⁵ Sake-sake rad̄i Ruma Hatalla rakarongga b̄a nabi-nabi eded̄u d̄iru'u b̄a nggomid̄oho. D̄i ade sake randawi b̄a Ruma Hatalla lab̄o wa'i ra waromu ndake, nggahi Ruma Hatalla d̄i la Ibrahim, ’Rad̄i londo ra maimu Nahu d̄imambei bareka d̄i sara'a bangsa d̄i dunia.’ Rasake ede eded̄u d̄iru'u b̄a nggomid̄oho rau.

²⁶B̄ara ndedena Ruma Hatalla kad̄alena ada-Na, edempara kauna Sia mai ulu d̄i nggomid̄oho, loakud̄u Sia mbeina bareka d̄i nggomid̄oho. Cara Sia mbei bareka eded̄u kai kandad̄ina nggomid̄oho tobamu karawi d̄i ade morimu ma dab̄ae.”