Read Bima KISAH RASU-RASU 4 Bible Online

KISAH RASU-RASU 4 - Bima bible

KISAH RASU-RASU 4

¹Wunga mbuipu la Petrus ro la Yahya nuntuna lab̄o dou-dou ede, dou-dou mana'ekai imam ro dou mana'ekai jaga Bait Allah ro dou-dou Saduki maina d̄i la Petrus ro la Yahya.

²Siad̄oho mbanina b̄ara la Petrus ro la Yahya manggahi d̄i dou-dou b̄a one Ruma Isa wa'ura mori mbali rad̄i madena. Ro ede d̄i bukutikai b̄a one dou mamade d̄imamori mbali.

³Edempara siad̄oho wa'u ra letona d̄ua dou rasu ede edempara kalu'una d̄i ade uma bui. Ro b̄ara wa'ura aimangad̄i, ndad̄i la Petrus ro la Yahya taha ta ede sampe b̄ala aisanai.

⁴Pala dou-dou ma wa'ura ringa ngoa ra tei rasu-rasu ede, mboto ma imbi. Ndad̄i anggota siad̄oho nanaha ore sampe ndad̄i kira-kira lima riwu dou.

⁵B̄ala ai sanai dou-dou mana'ekai Mahkama Agama, dou-dou mana'ekai Yahudi ro guru-guru agama kab̄oro weki d̄i Yerusalem.

⁶Siad̄oho eda angi lab̄o dou mana'ekai imam-imam ngarana Hanas, ro Kayafas, Yahya, Aleksander, ro sara'a malu'u kaluarga mana'ekai imam-imam ede.

⁷La Petrus ro la Yahya lao wa'a satando aka siad̄oho, edempara sod̄i b̄a siad̄oho, ”B̄uneku carana nggomid̄oho katahomu dou mamade b̄inci ede? Kai tenggo ra wale auku atao kai kuasa rad̄i couna karawi b̄a nggomid̄oho ede?”

⁸La Petrus rakuasakai b̄a Roh Allah, macambena, ”Itad̄oho mana'ekai bangsa ro Itad̄oho anggota mahkama!

⁹Madad̄oho d̄iparesa ro sod̄i d̄i ainaina ake b̄ara karawimu mataho d̄i bantukaita dou mamade b̄inci, ro b̄ara Itad̄oho mane'e b̄ade rab̄une carana dou ede d̄i tahokai made b̄incina.

¹⁰Itad̄oho sara'ana pab̄uaku b̄ade ro sara'ana bangsa Israel rau pab̄uaku b̄adena b̄ara dou ake makid̄i ake kai sarumbuna ma tenggo d̄itando Itad̄oho, b̄a one tenggo ra wale ro kuasa rad̄i Ruma Isa Al Masih dou Nazaret ede. Itad̄oho wa'ura salibmu Ruma Isa ede, pala Ruma Hatalla mawa'ura kamori mbalina Sia.

¹¹ Ruma Isa akeku aona eli ayat ake d̄i ade Alkitab, ’Wadu ma wati d̄i kani b̄a nggomid̄oho dou-dou mataki tu'u uma, palasi mandad̄i wadu ma penti poda.’

¹²Kai ncai d̄i Ruma Isa mpoampa dou d̄ikasalama. B̄ara d̄i sara'a dunia d̄i ade weki manusia wati wara dou makalai rau ma raka kuasa rad̄i Ruma Hatalla d̄imakasalamana ndai.”

¹³Dou-dou anggota Sida Pengadila ede namidi adena eda disa la Petrus ro la Yahya, au walipu siad̄oho b̄adena b̄a one d̄ua dou rasu ede eded̄u dou-dou biasa ma wati sakola. Edempara siad̄oho kawarana weki b̄a one d̄ua dou rasu ede eded̄u dou-dou ma b̄atu Ruma Isa.

¹⁴Pala siad̄oho wati loana nggahi au-au, b̄ara dou ma wa'ura kataho wea supuna ede wara kid̄i d̄itando siad̄oho sama-sama lab̄o la Petrus ro la Yahya.

¹⁵Edempara siad̄oho kauna d̄i d̄ua dou rasu ede losa d̄i ade hid̄i sidakai, edempara siad̄oho mafakana.

¹⁶Nggahi siad̄oho, ”Auku d̄ipab̄ua karawi b̄a ndai d̄i dou-dou ake? Sara'ana dou ma ngge'e d̄i Yerusalem wa'ura b̄adena b̄a one lampa rawi mab̄isa ra guna ma heba poda ake, rakarawi b̄a siad̄oho d̄uana. Ndai wati loata kawati rawi ede.

¹⁷Pala b̄ab̄aina lampa rawi ede mbou rero walina d̄iwoha dou-dou, maira ndai takadahuku siad̄oho b̄a one siad̄oho wati d̄imaloa wali nuntu ra nggahi kone d̄isab̄ua dou rau kai kanina ngara Isa.”

¹⁸Ndad̄i siad̄oho ouna d̄ua dou rasu ede lu'u mbali, ro ngoana b̄a one siad̄oho sakali-kali wati laona renta atao ngoa ra tei kai ngara Ruma Isa.

¹⁹Pala cambe b̄a la Petrus ro la Yahya, ”Takananu to'ipu b̄a weki ndaid̄ohomu au ma taho d̄itando Ruma Hatalla: b̄atu parenta itad̄oho atao b̄atu parenta Ruma Hatalla.

²⁰Bara madad̄oho wati loamu dengga nuntu ra nggahi mab̄oha ma wa'ura eda ro ringa b̄a ndai madad̄oho.”

²¹Anggota-anggota sida ede wati loana raka kone sab̄ua alasana d̄ihukumkaina la Petrus ro la Yahya. Ndad̄i siad̄oho kadahuna d̄ua dou rasu ede, edempara horina siad̄oho d̄uana, b̄ara sara'ana dou maroi ra wadi Ruma Hatalla b̄ara mandad̄i ede.

²²Dou ma iuna taho supuna kai b̄isa ra guna ede wa'ura ncewi upa mpuru mba'a umuna.

²³Sawa'u b̄a la Petrus ro la Yahya d̄ihori wea, siad̄oho dula mbalina aka lengad̄ohona ro ngoa sara'ana ra nggahi b̄a dou-dou mana'ekai imam ro dou-dou mana'ekai Yahudi d̄i siad̄oho.

²⁴ Sawa'u b̄a ringa b̄a lengad̄ohona ede, siad̄oho sama-sama sambea kai sab̄ua ade d̄i Ruma Hatalla. Nggahi siad̄oho, ”Ruma, Ita marakandad̄ina langi ro dana ro moti lab̄o sara'a isina.

²⁵ Kai Roh-Mu Ita parana nuntu ra nggahimu kai ncai wa'i ra waro madad̄oho, Daud, eded̄u ada-Mu; Ita manggahi, ’B̄ab̄auku dou-dou, ma wati pata Ruma, mbanina; b̄ab̄auku bangsa-bangsa ndawina nia ma wati wara onena?

²⁶Sangaji-sangaji dunia masadia ncau d̄i lewa ra lakakaina, ro dou-dou mana'ekaina makasab̄ua weki ao Ruma ro Sangaji Mambei salama.

²⁷ B̄ara poda Herodes ro Pontius Pilatus wa'ura mbolona lab̄o dou-dou ma wati pata Ruma ro lab̄o dou-dou Israel d̄i kota ake. Siad̄oho kab̄orona weki d̄i aokaina Ruma Isa Ada-Mu ma raso ede, ma wa'ura hanta b̄a Ita ndad̄i Sangaji Mambei salama.

²⁸Siad̄oho kasab̄uana weki d̄ikarawina au-au, rawa'u katantu ulu b̄a Ita b̄a one ede d̄imandad̄i. Ro Ita makatantuna ede kai kuasa ro rakane'e b̄a ndai Ita.

²⁹Ake, Ruma, tatio to'ipu b̄une siad̄oho kadahuna madad̄oho. Ro takau to'ipu d̄i madad̄oho, adad̄oho-Mu ake, mangoa ra kahabana haba Ita kai wati dahu.

³⁰Bantu to'ipu b̄a Ita loakud̄u dou-dou masupu d̄i kataho wea ro rawi mab̄isa ra guna ro lampa rawi-lampa rawi ma heba poda d̄imandad̄i kai ncai kuasa ro tenggo ra wale kai ngara Ruma Isa, Ada-Mu ma raso ede.”

³¹Sawa'u b̄a nggori sambea siad̄oho, hid̄i kab̄orokai weki siad̄oho ede kangginda. Siad̄oho sara'ana kuasakai b̄a Roh Allah, ro tampu'u nuntu ra nggahi kai disa poda mab̄oha haba ma ramai ta Ruma Hatalla.

³² Sara'ana dou ma imbi ede mori kasab̄ua ade ro kasab̄ua weki. Wati kone sab̄ua dou rau rad̄i siad̄oho mawi'i wekina b̄a one au rantauna eded̄u ntau ndaina. Au-au ma wara d̄i siad̄oho, siad̄oho kani kasamana.

³³Kai kuasa ma na'e, rasu-rasu ede mambei sakasi b̄a one Ruma Isa wa'ura mori mbali. Ndad̄i Ruma Hatalla mambei mboto bareka d̄i siad̄oho.

³⁴Ro wati wara kone sab̄ua dou rau d̄i ade woha siad̄oho ma dancihi au-au. B̄ara siad̄oho ma ntau dana ro uma, nalandaku dana ro uma siad̄oho ede; edempara rad̄i co'i ralandana ede siad̄oho wa'ana

³⁵ro siad̄oho d̄onggona d̄i rasu-rasu. Edempara piti ede d̄icengga-cengga d̄i sanikina dou ma paraluna.

³⁶Ndede rauja la Yusuf. Sia landa rauna dana ntauna, edempara piti co'i ralandakai ede wa'a b̄a sia ro d̄onggona d̄i rasu-rasu. La Yusuf ake eded̄u sab̄ua dou londo ra mai Lewi rad̄i Siprus; rasu-rasu mapehekai rauna sia Barnabas (aona Marere wea ade).