Read Bima KISAH RASU-RASU 5 Bible Online

KISAH RASU-RASU 5 - Bima bible

KISAH RASU-RASU 5

¹Pala waraku sab̄ua dou mone mangara la Ananias. Sia lab̄o weina mangara la Safira, malanda rau salob̄e dana ntau siad̄oho.

²Piti co'i ralanda ede sarundena wi'i b̄a sia d̄i ru'u b̄a ndaina ro sarundena sia d̄onggona d̄i rasu-rasu. Sia karawina ede b̄ade rau b̄a weina.

³Edempara nggahi la Petrus d̄i sia, ”Ananias b̄ab̄auku co'omu Ibilis makuasana ademu, sampe nggomi cowamu d̄i Roh Allah, kai midi-midimu wi'imu sarundena d̄i ru'u b̄a ndaimu piti ralandakaimu dana ede?

⁴Dana ede rantau nggomina sawatipu ralanda b̄a nggomi. Ro sawa'u b̄a dana ede landa, piti rauna mbuipu ntau nggomi. Ndad̄i b̄ab̄auku warakaina nia d̄i ademu karawi b̄une ede? Laina manusia ranuntu cowakai b̄a nggomi pala Ruma Hatalla!”

⁵Ndede ringa b̄a la Ananias nggahi ra eli ede, sia mbo'ona edempara madena. Sara'ana dou ma ringana mandad̄i ede ndad̄i dahu.

⁶Edempara dou-dou sampela mai salolo katahona timba la Ananias, edempara wa'a kalosana d̄i lao umbu.

⁷Kira-kira tolu jam sawa'u b̄a ede lu'u weina. Sia wati b̄adena au ma ndad̄i b̄oupu ede.

⁸Nggahi la Petrus d̄i sia, ”Ngoa to'ipu d̄i nahu: Sab̄ua dana ralanda b̄a nggomi ro rahimu ede, sandake co'ina?” ”Io, poda sandede co'ina,” cambe b̄a wei la Ananias.

⁹Edempara nggahi la Petrus d̄i sia, ”B̄ab̄auku nggomi ro rahimu kasamakaimu d̄i ne'emu coba Roh Ruma? Ringa ra kade'epu! Dou-dou ma lao umbu rahimu wa'ura dula. Siad̄oho d̄imawa'a kalosa nggomi rau.”

¹⁰Wakatu ede wa'u wei la Ananias ede mbo'o ro madena d̄i tando la Petrus. Ro wakatu dou-dou mone sampela ede lu'u, siad̄oho rakana sia wa'ura made. Edempara siad̄oho wa'a kalosana timba sia ro umbuna sia d̄ikompe rahina.

¹¹Ndad̄i sara'ana dou-dou ma'imbi ede ro dou-dou makalaina, ma ringa mab̄oha mandad̄i ede, ndad̄i dahu.

¹²B̄ara karawi rasu-rasu ndad̄i mboto rawi mab̄isa ra guna ro lampa rawi-lampa rawi maheba poda mandad̄i d̄iwoha ela ra dou. Kai kasab̄ua ade sara'a dou ma'imbi kab̄oro weki d̄i Sarambi Salomo d̄i Bait Allah.

¹³Ro dou makalai wati wara ma disa mai kab̄oro weki lab̄o dou-dou ma'imbi ede. Pala dou-dou ma'imbi ede nawancuku horoma b̄a ela ra dou.

¹⁴Ro nanaha ntoi nanaha mboto dou-dou ma'imbi d̄i Ruma — nataho dou mone ro dou siwe.

¹⁵Ka'ada'ana ndad̄i ndede pahu, ndad̄ina dou-dou masupu wi'i d̄i ese hid̄i marukaina atao dipi, edempara lao wa'a aka ncai, loakud̄u siad̄oho kone d̄i sato'ikaina loa hina ninu la Petrus, nggara nalampa saisi la Petrus ta ede.

¹⁶Mboto poda dou-dou ma ramai rad̄i kota-kota d̄ikompe ra pei Yerusalem. Siad̄oho wa'ana dou-dou masupu ro ralu'ukai b̄a roh-roh seta. Ro dou-dou ede kataho sara'ana.

¹⁷Cumpukaina dou mana'ekai imam-imam ro sara'ana dou mab̄atuna, eded̄u golonga dou-dou Saduki, tampu'u rukuna, b̄ara siad̄oho hiana adena.

¹⁸Rasu-rasu ede d̄iwa'u ra leto, edempara kalu'una d̄i ade uma bui rabuikai ela ra dou.

¹⁹Pala aimangad̄ina, sab̄ua mala'eka Ruma mahenggana tad̄a-tad̄a uma bui, edempara wa'a kalosana rasu-rasu ede. Nggahi mala'eka ede d̄i rasu-rasu ede,

²⁰”Lao kid̄ipu d̄i Bait Allah ro ngoapu d̄i dou-dou mab̄oha mori ma b̄ou ake.”

²¹Edempara rasu-rasu ede b̄atuna rangoa b̄a mala'eka ede. Sid̄i-sid̄i poda siad̄oho laona aka Bait Allah ro tampu'u ngoa ra teina ta ede. Wakatu ede dou mana'ekai imam-imam ro dou-dou mab̄atuna mai, edempara katu'una mbolo weki mahkama lab̄o dou-dou mana'ekai Yahudi. Edempara siad̄oho kauna dou lao weha ao rasu-rasu ede rad̄i uma bui d̄i lao wa'a satando d̄i siad̄oho.

²²Pala wakatu dou-dou rakaukai ede rongga aka uma bui, siad̄oho wati wara edana rasu-rasu ede ta aka. Ndad̄i siad̄oho dula mbalina, edempara ngoana lampa rawi ede d̄i mahkama.

²³”Wakatu la madad̄oho rongga d̄i uma bui,” nggahi siad̄oho d̄i mahkama, ”la madad̄oho edamu tad̄a ncai uma bui ede rakunci kataho, ro dou-dou mataki jaga wunga jagana d̄i tad̄a ncai. Pala wakatu la madad̄oho henggamu tad̄a ncai ede, la madad̄oho wati rakamu eda kone sab̄ua dou rau tad̄eina.”

²⁴Wakatu perwira majaga Bait Allah ro dou-dou mana'ekai imam maringana rangoa ede, siad̄oho darura adena mab̄oha rasu-rasu ede ro dahuna d̄i au ma loa ndad̄i.

²⁵Edempara mai sab̄ua dou mone mawa'a haba ake, ”Taringa ra kade'e to'ipu! Dou-dou rabui b̄a Itad̄oho ake-ake wunga ngoa ra teina dou mamboto aka Bait Allah!”

²⁶Ndad̄i perwira majaga Bait Allah ede lao samana lab̄o anamorina malao weha mbalina rasu-rasu ede. Pala siad̄oho wati kanina kasa ro toku, b̄ara siad̄oho nadahukum d̄i dou mamboto; ai-aina dou mamboto ede mab̄ale siad̄oho kai wadu.

²⁷Rasu-rasu ede d̄i wa'a kalu'u satando mahkama. Edempara dou mana'ekai imam-imam ma paresa siad̄oho.

²⁸ Nggahi sia, ”Nami wa'ura kanta kapodamu nggomid̄oho aina ngoa ra teimu mab̄oha Dou ede. Pala ake tiopu au karawi b̄a nggomid̄oho! Nggomid̄oho kambou reromu ngoa ra teimu d̄i sara'ana Yerusalem, ro nggomid̄oho mane'e b̄ab̄u ra lo'o b̄a one namiku ma kandad̄ina madekai Dou ede.”

²⁹Cambe b̄a la Petrus ro rasu-rasu ma kalaina, ”Madad̄oho pab̄uaku b̄atumu Ruma Hatalla ro laina b̄atu rakane'e manusia.

³⁰Ruma Isa, rasalib b̄a Itad̄oho, wa'ura kamori mbali rad̄i madena b̄a Ruma Hatalla wa'i ra waro ndaita.

³¹Ro Ruma Hatalla wa'ura mbeina d̄i Sia b̄ora ro kuasakai ma d̄ese kai Mana'ekaina ro Mambei salama; loakud̄u bangsa Israel d̄imbei wakatu d̄i tobakaina rad̄i dosa-dosana ro d̄imaraka kangampu.

³²Madad̄ohoku sakasi-sakasi mab̄oha sara'ana ede — madad̄oho ro Roh Allah rambei b̄a Ruma Hatalla d̄i dou-dou ma b̄atu rakaukai-Na.”

³³Wakatu ringa b̄a anggota-anggota Mahkama Agama ede, siad̄oho mbani podana, ro siad̄oho kasab̄uana nggahi ne'e hade rasu-rasu ede.

³⁴Pala d̄i ade weki anggota-anggota mahkama ede wara sab̄ua dou Farisi mangara Gamaliel. Sia guru agama d̄i horoma poda b̄a samenana dou. Tu'u kid̄i sia, edempara kauna wa'a kalosa rasu-rasu ede samporo.

³⁵Edempara nggahi sia d̄i Mahkama Agama ede, ”Cina ra angi dou-dou Israel! Kananu katahopu mab̄oha au rad̄ikarawi b̄a ndaid̄ohomu d̄i dou-dou ake.

³⁶B̄ara ntoina parana wontu Teudas, ma wi'ikai wekina dou maheba, ndad̄ina wara kira-kira upa ratu dou mab̄atuna sia. Pala sia rahade b̄a dou ro sara'ana dou mab̄atuna ncengga rero, ro kalompo rauna ede mbora.

³⁷Sawa'u b̄a ede, wakatu wara sensus, wontu rau la Yudas, dou Galilea. B̄ara pangaruna, mboto rau dou ma b̄atu sia. Pala sia rau rahade b̄a dou, ro sara'ana dou mab̄atu sia lao ncengga rero.

³⁸Ndad̄i wakatu ake kai mandad̄i ake, ngoa ra tei kataho b̄a nahu eded̄u: aina karawi au-au d̄i dou-dou ake, co'opu siad̄oho. B̄ara napodasi ngoa ra tei ro kalompo siad̄oho ake eded̄u rad̄i manusia ndad̄i ngoa ra tei ro kalompo siad̄oho d̄imambora.

³⁹Pala nggarasi ede ramaina rad̄i Ruma Hatalla, ndad̄i ndaid̄ohomu wati d̄imawa'u kakoa siad̄oho. Pala kombisi d̄imandad̄i ndaid̄ohomu d̄ima'ao Ruma Hatalla.” Ngoa ra tei Gamaliel ede tarima b̄a mahkama.

⁴⁰Ndad̄i ouna rasu-rasu ede, edempara cambona, sawa'u b̄a ede kantana ngoa ra tei wali mab̄oha Ruma Isa. Sawa'u b̄a ede ampona hori siad̄oho.

⁴¹Rasu-rasu ede tu'u wi'ina Mahkama Agama ede kai neo adena b̄ara Ruma Hatalla mawa'ura wi'ikaina siad̄oho patu d̄i maraka kab̄awa ra katuna b̄ara Ruma Isa.

⁴²Ro saniki ainaina d̄i Bait Allah ro d̄i uma-uma dou, siad̄oho ngoa ra tei ncauna ro ngoa ra kahabana Haba Mataho mab̄oha Ruma Isa b̄a one Siaku Sangaji Mambei salama rasake ede.