Read Bima KISAH RASU-RASU 6 Bible Online

KISAH RASU-RASU 6 - Bima bible

KISAH RASU-RASU 6

¹Dou-dou mab̄atu Ruma Isa naha ntoina nanaha mboto. Wakatu ede dou-dou Yahudi ma nuntu kai bahasa Yunani, mandad̄i wati ca'una d̄i dou-dou Yahudi asli. Ma nggahi Yunani ede manggahi, ”Dou-dou siwe nami ma mbaru mboha wati rakana au-au racengga sama-sama d̄i dou-dou.”

²B̄ara ndedena, sampuru d̄ua rasu ede kab̄orona sara'a dou mab̄atuna ro nggahina d̄i siad̄oho, ”Wati tahona nggara denggasi nami ngoa ra kahaba nggahi ra eli Ruma Hatalla, b̄ara pab̄uaku uru ngaha ra nono.

³Ndad̄i, tahopu Ndaid̄ohomu makad̄ale d̄i ade wekimu pidu dou ma wati iha ngarana ro rakuasakai b̄a Roh Allah ro maloa timba ra lemba, d̄i loa kau b̄a nami uru mandake pahu;

⁴b̄ara nami mane'e do'a ro mangoa ra kahaba nggahi ra eli Ruma Hatalla mpoampa.”

⁵Sara'a dou ede nangawa b̄une rakaukai b̄a rasu-rasu ede. Edempara siad̄oho kad̄alena la Stefanus, sab̄ua dou ma imbi poda d̄i Ruma Isa ro kuasakai b̄a Roh Allah. Rakad̄ale rau: la Filipus, la Prokhorus, la Nikanor, la Timon, la Parmenas, ro la Nikolaus rad̄i Antiokhia; sia laina dou Yahudi pala wa'ura lu'u agama Yahudi.

⁶Pidu dou ede raho d̄i rasu-rasu, edempara rasu-rasu ede do'a ro rahona bareka Ruma d̄i ru'u b̄a siad̄oho.

⁷Ndedeku haba rad̄i Ruma Hatalla nanaha ipi mbouna ro dou-dou mab̄atu Ruma Isa d̄i Yerusalem rau nanaha mboto. Ro mboto rau imam-imam ma imbi d̄i Ruma Isa.

⁸La Stefanus nawancuku bareka b̄a Ruma Hatalla, ndad̄ina sia karawina mboto mab̄isa ra guna ro lampa rawi maheba poda d̄i woha ela ra dou.

⁹Pala wara dou-dou ma daca'una sia; siad̄oho eded̄u anggota-anggota uma sambeakai ma d̄ipehe kai Uma Sambeakai Dou-dou rahori wea. Anggota-anggota uma sambeakai ede eded̄u dou-dou Yahudi rad̄i Kirene ro Aleksandria. Siad̄oho lab̄o dou-dou Yahudi rad̄i Kilikia ro Asia macence ncihi lab̄o Stefanus.

¹⁰Pala siad̄oho wati loana dab̄atu au ranggahi b̄a la Stefanus, b̄ara Roh Allah mambeina d̄i sia loa timba ra lemba d̄i nuntu ra nggahikaina.

¹¹B̄ara ndedena siad̄oho ufana pila-pila dou d̄imanggahi, ”Ringa b̄a nami dou ede kab̄awa ra katunana la Musa ro Ruma Hatalla!”

¹²Ndedeku siad̄oho sad̄u'una dou-dou, ro dou-dou mana'ekai Yahudi, ro guru-guru agama. Edempara siad̄oho lao wa'u ro letona la Stefanus, edempara lao wa'ana sia aka tando Mahkama Agama.

¹³Ro siad̄oho wa'a rauna sakasi-sakasi ma mbei sakasi cowa mab̄oha la Stefanus. Nggahi sakasi-sakasi ede, ”Dou ake nakab̄awa ra katuna ncauku Bait Allah ma raso ro kab̄awa ra katunana parenta-parenta Ruma Hatalla rakarongga b̄a la Musa.

¹⁴Madad̄oho wa'ura ringamu nggahi sia, b̄a one Ruma Isa dou Nazaret ede d̄imakandumbana Bait Allah ake, edempara rungka sara'ana ruku ra rawi rasa rakalondo b̄a la Musa d̄i ru'u ndaita!”

¹⁵Samenana dou ma wara d̄i ade sida Mahkama Agama ede ntandana la Stefanus. Ro wakatu ede pahu la Stefanus d̄i edamu b̄une pahu mala'eka.