Read Bima KISAH RASU-RASU 7 Bible Online

KISAH RASU-RASU 7 - Bima bible

KISAH RASU-RASU 7

¹Sod̄i b̄a dou mana'ekai imam-imam d̄i la Stefanus, ”Sab̄ua poda sara'a ranggahi b̄a dou-dou ede?”

² Cambe b̄a la Stefanus, ”Cina ra angi ro Ama-ama! Taringa ra kade'epu nggahi ra eli mada! Sawatipu wa'i ra waro ndaita Ibrahim lao ngge'ena aka Haran, wakatu sia mbuipu ngge'ena d̄i Mesopotamia, Ruma Hatalla ma d̄ese ra ntasa maina d̄i sia

³ro nggahina, ’Tu'u wi'ipu dana ra rasamu ro iwa ra wekimu. Laopu aka dana ra rasa d̄i tei b̄a Nahu d̄i ru'u b̄a nggomi.’

⁴ Edempara Ibrahim tu'u wi'ina dana ra rasa Kasdim, edempara lao ngge'ena aka Haran. Sawa'u b̄a ama la Ibrahim madena, Ruma Hatalla mandawina Ibrahim mai ngge'e d̄i dana ra rasa ake ma cina ra angi ro Itad̄oho sara'ana rangge'ekaimu ake.

⁵ Aipu wakatu ede wati wara kone sarundena rad̄i dana ra rasa ake rambei b̄a Ruma Hatalla d̄i Ibrahim d̄imandad̄i ntau Ibrahim; kone sakopa rau wati d̄imbei d̄i ru'u sia. Pala sake Ruma Hatalla b̄a one Sia d̄imambeina d̄i Ibrahim d̄imandad̄i ntau Ibrahim ro londo ra maina. Wakatu ede Ibrahim wati ntauna ana.

⁶ Pala akeku ranggahi b̄a Ruma Hatalla d̄i sia, ’Londo ra maimu d̄imangge'e kai dou lai rasa d̄i dana ra rasa dou makalai. Dou-dou d̄i dana ra rasa ede d̄imajaja siad̄oho ro kauna karawi ma'ipi tani d̄i siad̄oho upa ratu mba'a ntoina.

⁷ Pala Nahu d̄imahukumna bangsa ma ka'ada siad̄oho, ro siad̄oho d̄imalosa rad̄i dana ra rasa ede ro d̄imanemba Nahu d̄i hid̄i ake.’

⁸ Sawa'u b̄a nggahi ndedena rasake sama ede kasaha b̄a Ruma Hatalla kai upacara suna. Ndad̄i sawa'u b̄a la Ishak ana la Ibrahim warana, Ibrahim sunana sia wakatu sia umu waru nai. Edempara la Ishak suna rauna anana, eded̄u la Yakub. Ro la Yakub rau suna rauna sampuru d̄ua anana, eded̄u ma ndad̄i ama wa'i ra waro bangsa Yahudi.

⁹ Ama wa'i ra waro ndai ede nahiana d̄i la Yusuf, ndad̄ina siad̄oho landana sia mandad̄i ada d̄i Mesir, pala Ruma Hatalla mad̄ende ra wa'ana sia,

¹⁰ ro mahori sia d̄i samenana susa ra ncoki. Ruma Hatalla mambeina d̄i sia ruku ra rawi mataho ro loa timba ra lemba wakatu sia lao satandona Fira'un sangaji Mesir, ndad̄i Fira'un kandad̄ina sia gubernu dana ra rasa Mesir ro makuasakaina asi Fira'un.

¹¹ Edempara ndad̄ikaina bala sarahid̄o ma d̄ondo d̄i samenana dana ra rasa Mesir ro Kana'an ndad̄ina dou-dou na'ipiku susa ra ncokina. Wa'i ra waro ndai wati loana raka ngaha ra nono.

¹²Ndad̄i wakatu ringa b̄a la Yakub wara gando d̄i Mesir sia kauna anad̄ohona, wa'i ra waro ndaita, lao ta aka masarambakaina.

¹³ Wakatu siad̄oho lao kad̄ua kalikaina, ngoa b̄a la Yusuf d̄i sa'e ra arina ede b̄a one sia eded̄u la Yusuf. Ede ampona b̄ade b̄a sangaji Mesir mab̄oha iwa ra weki la Yusuf.

¹⁴ Edempara la Yusuf nggaduna haba d̄i amana, eded̄u la Yakub, kauna sia ro samenana iwa ra wekina lao ngge'e aka Mesir — sara'ana wara pidu mpuru lima dou.

¹⁵ Ndad̄i la Yakub lao ngge'ena aka Mesir ro ta'edeku sia ro wa'i ra waro ndai madena.

¹⁶ Timba siad̄oho edempara wa'a mbali aka Sikhem ro umbukaina d̄i rade ma wa'ura weli kai piti b̄a Ibrahim d̄i suku bangsa Hemor d̄i Sikhem.

¹⁷ Ne'era raka wakatuna Ruma Hatalla kalampana rasake-Na d̄i la Ibrahim, bangsa ndai d̄i Mesir wa'ura nanaha mboto.

¹⁸Cumpukaina sab̄ua sangaji makalai ma wati pata la Yusuf, maparenta d̄i Mesir.

¹⁹ Sangaji ede kampa'a-mpa'ana bangsa ndai ro na'ipiku tokuna d̄i wa'i ra waro ndaita. Sia kau pakasana paki ana dou to'i ma b̄oupura nggana b̄a inana loakud̄u wati wara dou ma'uruna ro madena.

²⁰ Wunga wakatu ede wara kai la Musa; sia ana dou to'i ma ntika poda. Tolu wura ntoina sia rakana'e d̄i uma ama ra inana,

²¹ ro sawa'u b̄a paki sia, ana siwe la Fira'un mawehana sia, ro kana'ena sia b̄une ana ndaina.

²²Sara'a ilimu bangsa Mesir d̄ingoa ra tei d̄i sia ro sia mandad̄i dou ma ipi kuasa d̄i ade nggahi ra eli ro ruku ra rawina.

²³ Wakatu umu la Musa upa mpuru mba'a, wontumpara ne'e b̄a adena ne'e lao eda ka'ada'ana bangsa ndaina bangsa Israel.

²⁴Edempara sia edana sab̄ua dou d̄i weki siad̄oho kancoki b̄a sab̄ua dou Mesir; edempara sia horuna dou rakancoki ede kai hadena dou Mesir ede.

²⁵Kacai b̄a la Musa bangsana naloa ka'ao b̄a one Ruma Hatalla mawunga kanina sia d̄imahori weana siad̄oho. Palasi siad̄oho wati loana ka'ao.

²⁶B̄ala aisanai sia eda rauna d̄ua dou Israel mancao, edempara sia celana kai ne'ena kataho siad̄oho. Nggahi sia, ’Nggomid̄oho ake sa'e ra ari. B̄ab̄auku nggomid̄oho ncaokaimu?’

²⁷Pala dou ma b̄oe lengana ede runggina la Musa edempara nggahina,

²⁸’Cou ma hanta nggomi ndad̄i dou mana'ekai ro hakim nami? Sab̄ua nggomi mane'e hade nahu rau b̄une nggomi hademu dou Mesir ede awina?’

²⁹ Wakatu ringa b̄a la Musa au ranggahi b̄a dou ede, la Musa rai tu'u wi'ina Mesir edempara ngge'ena d̄i dana ra rasa Midian. Ta aka sia rakana d̄ua dou anana.

³⁰ Upa mpuru mba'a sawa'u b̄a ede sab̄ua mala'eka maina d̄i la Musa d̄i so sarae d̄eni lab̄o Doro Sinai. Mala'eka ede maina d̄i ade afi d̄i haju rompa ma wunga kalea.

³¹La Musa midi adena eda lampa rawi ede, ndad̄i sia lao d̄enina d̄i b̄adekaina au ede. Edempara sia ringana eli Ruma manggahi,

³²’Nahuku Ruma Hatalla wa'i ra waromu; Nahu Ruma Hatalla rad̄i Ibrahim, la Ishak, ro la Yakub.’ La Musa wedu b̄a dahuna ndad̄i wati disa walina ntanda d̄i haju rompa ede.

³³Edempara nggahi Ruma rau, ’Rocu wi'ipu sanda rakanimu ede, b̄ara dana d̄i hid̄i ratondakaimu ede eded̄u dana ma raso.

³⁴Nahu wa'ura eda kab̄aeku pa'i ro susa ela-Ku d̄i Mesir. Nahu wa'ura ringaku weta siad̄oho ro Nahu wa'ura londo d̄imahori siad̄oho. Ake, maira! Nahu d̄i ma nggadu nggomi lao mbali aka Mesir.’

³⁵ Musa akeku la Musa ma wati rakanahu b̄a bangsa Israel ro ma tula ao kai nggahi ra eli ake, ’Cou marahanta nggomi mandad̄i mana'ekaina ro hakim nami?’ Pala justru siaku dou ra nggadu b̄a Ruma Hatalla d̄imandad̄i dou mana'ekaina ro mambei salama, kai bantu b̄a mala'eka ma mai d̄i sia d̄i haju rompa ma kalea ede.

³⁶ Musa edeku mana'ekaina bangsa Israel losa d̄i Mesir kai karawina lampa rawi mab̄isa ra guna ro lampa rawi-lampa rawi maheba poda d̄i Mesir, d̄i Moti Kala ro d̄i so sarae santoi upa mpuru mba'a.

³⁷ Sia rauku la Musa ma nggahi d̄i bangsa Israel, ’Ruma Hatalla d̄imambeina d̄i nggomi sab̄ua dou nabi rakad̄ale d̄i woha ndai nggomid̄oho, sama b̄une Sia makad̄ale mada.

³⁸ La Musaku ma d̄i woha bangsa Israel d̄i so sarae, mandad̄i ncai d̄i ru'u b̄a mala'eka manuntu ra nggahi d̄i sia d̄i Doro Sinai lab̄o wa'i ra waro ndaita. Siaku ma tarima aona rad̄i Ruma Hatalla haba ma mori d̄i karonggana d̄i ndaita.

³⁹Kone ade ndedekaina wa'i ra waro ndaita wati ngawana to'a d̄i sia. Siad̄oho natula aoku sia ro nane'e dula mbali aka Mesir.

⁴⁰ Nggahi b̄a siad̄oho d̄i la Harun, ’Ndawipu berhala-berhala d̄i ru'u b̄a nami, loakud̄u berhala-berhala ede ma d̄ende ra mawa'ana nami. B̄ara nami watira b̄ade walimu au ma wa'ura ndad̄i lab̄o la Musa ede ma rawa'a kalosana nami d̄i Mesir!’

⁴¹ Edempara wakatu ede siad̄oho ndawina sab̄ua patung ana capi, edempara siad̄oho d̄onggo ra mbeina korba d̄i patung ede ro ndawina ngaha ndiha d̄inembakai berhala randawi b̄a ndai siad̄oho.

⁴² Edempara Ruma Hatalla tu'u wi'ina siad̄oho ro co'ona siad̄oho manemba ntara-ntara d̄i langi. Ede ncihi ncao lab̄o au ratunti d̄i ade buku-buku nabi-nabi. Ndake, ’Oe dou-dou Israel! Laina d̄i ru'u Nahu nggomid̄oho sambelemu ro korobamu binata santoi upa mpuru mba'a d̄i so sarae.

⁴³Kema berhala Molokh rawa'a rero b̄a nggomid̄oho masama-sama lab̄o patung binata berhala, eded̄u Refan; edeku patung randawi b̄a nggomid̄oho d̄i nembamu. B̄ara ndedena Nahu d̄imapaki nggomid̄oho sampe d̄o'o aka ipa b̄ae b̄a dana ra rasa Babel.’

⁴⁴ Kema hid̄i maikai Ruma Hatalla d̄i manusia wara d̄i wa'i ra waro ndai d̄i so sarae. Kema ede randawi kai parenta b̄a Ruma Hatalla d̄i la Musa ro b̄une conto rakatada b̄a Ruma Hatalla d̄i la Musa.

⁴⁵ Edempara kema ede wa'a wali b̄a wa'i ra waro ndai aipu wakatu siad̄oho lab̄o la Yosua lao weha rampa dana ra rasa ndai rad̄i ade kuasakai b̄a bangsa-bangsa rab̄aka kalosa b̄a Ruma Hatalla d̄itando siad̄oho. Kema ede warana ta ede sampe zamana la Daud.

⁴⁶ La Daud nakasanaku ade Ruma Hatalla ro rahona d̄i Sia loakud̄u sia d̄i kau kai ndawi sab̄ua uma ru'u Ruma Hatalla ranemba b̄a la Yakub ede.

⁴⁷ Pala la Solemanku ma ndawina uma d̄i ru'u b̄a Ruma Hatalla.

⁴⁸Pala Ruma Hatalla Mawancu D̄ese Ra Ntasa wati ngge'ena d̄i ade uma randawi b̄a manusia; b̄ara d̄i ade buku nabi ratunti ndake,

⁴⁹ ’Langi eded̄u hid̄i dohokai-Ku, ro dana d̄i lamakai edi-Ku. Uma auku d̄i ne'e katu'u b̄a nggomid̄oho d̄i ru'u b̄a Nahu? Tab̄eku hid̄i d̄i ru'u sanawakai Nahu?

⁵⁰Sab̄ua laina ndai Nahu ma kandad̄ina samenana mawara?’ ndedeku nggahi b̄a Ruma Hatalla.

⁵¹ Ede tera poda tuta ndaid̄ohomu ro na'ipi podaku nggonggina to'amu d̄i Ruma Hatalla! Fikomu na'ipiku mpingana d̄i tarima aokaimu nggahi ra eli Ruma Hatalla! Nggomid̄oho sama b̄une wa'i ra waromu; maca'u ao Roh Allah!

⁵²Sab̄ua wara nabi ma wati rakancoki b̄a wa'i ra waromu? Siad̄oho ma rahade dou-dou ranggadu b̄a Ruma Hatalla ma ntoi podana wa'ura ngoana b̄a one ada Ruma Hatalla ma poda ede d̄imamai. Ro ake nggomid̄oho mab̄ab̄una ro mahade Ada Ruma Hatalla ede.

⁵³Mala'eka-mala'eka wa'ura karonggana parenta-parenta Ruma Hatalla d̄i ndaid̄ohomu pala ndaid̄ohomu wati ngawamu b̄atu!”

⁵⁴Ndede ringa b̄a anggota-anggota Mahkama Agama sara'ana ra nggahi b̄a la Stefanus ede, siad̄oho fa'a adena ro mbani podana d̄i la Stefanus.

⁵⁵Pala la Stefanus ma kuasakai b̄a Roh Allah, ntandana ese langi. Sia edana d̄ese ra ntasa Ruma Hatalla ro Ruma Isa makid̄i d̄i hid̄i makuasa d̄i sab̄ae wana Ruma Hatalla.

⁵⁶”Tiopu,” nggahi la Stefanus, ”mada edaku saroga mahengga weki ro Ana Manusia makid̄i d̄i sab̄ae wana Ruma Hatalla!”

⁵⁷Anggota-anggota mahkama ede b̄ontona fiko ro kanggica salahona, edempara kalembina la Stefanus.

⁵⁸Siad̄oho randa kalosana sia ari mai b̄a kota edempara tob̄akaina wadu. Dou-dou ma edana mandad̄i ede nggaduna kani ra lombo siad̄oho d̄i sab̄ua dou sampela ma ngara la Saulus.

⁵⁹Wunga mbuipu siad̄oho tob̄ana la Stefanus, la Stefanus renta kana'ena, ”Ruma Isa, tarima aopu roh mada!”

⁶⁰Edempara sia doho sujuna ro kanggica kana'ena, ”Ruma, aina dosa ake d̄i tundu b̄a siad̄oho!” Sawa'u b̄a nggori nggahi ndedena sia madena.