Read Bima KISAH RASU-RASU 8 Bible Online

KISAH RASU-RASU 8 - Bima bible

KISAH RASU-RASU 8

¹Ro la Saulus neo ade rauna eda hade dou ede. Ainaina ede wa'u ela Ruma d̄i Yerusalem tampu'u fou rero b̄a dou, ndad̄ina sara'ana dou ma'imbi, selasi rasu-rasu, lao ncengga rero d̄i samenana dana ra rasa Yudea ro Samaria.

²Dou-dou ma dahu d̄i Ruma Hatalla ma'umbuna la Stefanus ro nangi weana sia kai adena mancoki.

³ Pala la Saulus na'usaha ncauku d̄ikalelikaina ela Ruma. Sia laona niki uma ro randa kalosana dou-dou ma'imbi, edempara kalu'una siad̄oho d̄i ade uma bui.

⁴Dou-dou ma'imbi ma wa'ura lao ncengga rero ede ngoa ra kahabana Haba Mataho ma ramai ta Ruma Hatalla ede.

⁵La Filipus laona aka kota Samaria ro ngoa ra kahabana d̄i dou-dou ta aka mab̄oha Sangaji Mambei salama rasake b̄a Ruma Hatalla.

⁶Wunga ringa b̄a dou-dou nuntu ra nggahi la Filipus ro siad̄oho edana rawi mab̄isa ra guna rakarawina, mboto d̄i ade weki siad̄oho makade'ena au ranggahi b̄a la Filipus.

⁷B̄ara roh-roh madab̄ae wa'ura losa lab̄o kanggicana rad̄i dou mamboto ralu'ukai b̄a seta. Dou-dou mamade b̄inci ro mampako ra mpedu rau mboto rakataho wea.

⁸Edempara dou-dou d̄i Samaria naneo poda adena.

⁹D̄i kota ede wara sab̄ua dou mone mangara la Simon, ma wa'ura pila-pila wakatu ntoina makamborana aka dou-dou ndad̄ina dou-dou Samaria b̄ara ilimu sihina. Nggahi sia d̄i siad̄oho b̄a one sia dou ma heba poda.

¹⁰Edempara sara'a dou d̄i kota ede eded̄u sara'ana dou mawara d̄i ela ra dou nawancuku kade'ena nggahi sia. ”Dou ake eded̄u tenggo ra wale Ruma Hatalla ma mbou rero kai ’Tenggo ra wale Mana'e’ ede,” nggahi siad̄oho.

¹¹Wa'ura ntoi poda sia kamborana aka dou-dou kai tenggo ra wale sihina, ndad̄i siad̄oho nawancuku kade'ena sia.

¹²Pala la Filipus ngoa ra kahabana d̄i siad̄oho Haba Mataho mab̄oha Karaja'an Allah ro mab̄oha Ruma Isa Al Masih, Sangaji Mambei salama ede. Ndad̄i siad̄oho na'imbiku d̄i haba ra karongga b̄a la Filipus, edempara siad̄oho kandeu karasona nataho dou-dou mone ro dou siwe.

¹³Ndai la Simon na'imbi rauku. Ro sawa'u b̄a kandeu karaso, sia lao b̄atu ncauna la Filipus. Lampa rawi mab̄isa ra guna ma ndad̄i ede kamborana aka la Simon.

¹⁴Rasu-rasu d̄i Yerusalem ringana b̄a one dou-dou Samaria wa'ura tarimana nggahi ra eli Ruma Hatalla. B̄ara ndedena siad̄oho nggaduna la Petrus ro la Yahya ta aka.

¹⁵Wakatu la Petrus ro la Yahya rongga ta aka, siad̄oho do'ana d̄i ru'u b̄a dou-dou Samaria ede loakud̄u siad̄oho loakaina raka Roh Allah,

¹⁶b̄ara Roh Allah watipu mai kuasakaina kone sab̄ua dou rau d̄i weki siad̄oho; siad̄oho ampona kandeu karaso kai ngara Ruma Isa mpoa.

¹⁷Edempara la Petrus ro la Yahya tohona rima ese wawo tuta dou-dou Samaria ede; edempara siad̄oho tarimana Roh Allah.

¹⁸Eda b̄a la Simon b̄a one rima rasu-rasu ratoho ese tuta dou-dou ede, Roh Allah mbei d̄i siad̄oho. B̄ara ndedena lao wa'a b̄a la Simon piti d̄i la Petrus ro la Yahya,

¹⁹edempara nggahina, ”Tambei to'ipu d̄i mada kuasa ede rau loakud̄u tohosi mada rimaku d̄i cou-cou rau, dou ede d̄imatarima Roh Allah.”

²⁰Pala cambe b̄a la Petrus, ”Ihara nggomi ro pitimu! Kacai b̄a nggomi rambei b̄a Ruma Hatalla loa d̄iweli kai piti?

²¹Nggomi wati ntaumu hak d̄i loakaimu b̄atu d̄i ade karawikai nami, b̄ara ademu wati podana d̄i Ruma Hatalla.

²²B̄ara ndedena wi'ipu nia ma dab̄ae ede, ro rahopu d̄i Ruma loakud̄u Sia kangampu weana kananumu ma dab̄ae ede!

²³B̄ara nahu kab̄ade nggomi b̄ini b̄a hiana ro ka'ada b̄a rawi madab̄ae.”

²⁴Edempara nggahi la Simon d̄i la Petrus ro la Yahya, ”Tabantu to'ipu raho d̄i Ruma loakud̄u aina ndad̄i kone sab̄ua rau d̄i mada ranggahi b̄a itad̄oho ede.”

²⁵Sawa'u b̄a siad̄oho nuntu ra nggahina ro ngoa ra kahabana nggahi ra eli Ruma, la Petrus ro la Yahya dula mbali aka Yerusalem. Ro d̄i woha ncai, siad̄oho ngoa ra kahabana Haba Mataho ede d̄i mboto kampo-kampo Samaria.

²⁶Sab̄ua mala'eka Ruma manggahi d̄i la Filipus, ”Wajo lampara! Lao lad̄opu aka ncai ma tuwu Yerusalem lab̄o Gaza.” Ncai ede lingi.

²⁷Edempara la Filupus laona. Wakatu ede wara sab̄ua dou mab̄ora asi Etiopia ma wunga lao dula aka dana ra rasana. Dou ede sab̄ua dou ma na'e b̄ora ma su'u ra tunduna d̄i samenana ntau ra wara Kandake, sangaji siwe dana ra rasa Etiopia. Dou ede wa'ura laona aka Yerusalem d̄i nembakaina Ruma Hatalla ro ake wunga lao mbali kai karetana. Wunga dohona ade karetana ede sia bacana Buku Nabi Yesaya.

²⁹Nggahi Roh Allah d̄i la Filipus, ”Lao d̄enipu d̄i kareta ede.”

³⁰Ndad̄i la Filipus lao d̄enina d̄i kareta ede, edempara ringa b̄a sia dou ede mabaca Buku Yesaya. Sod̄i b̄a la Filipus d̄i sia, ”Pa, sab̄ua loa ka'ao b̄a Ita rabacata ede?”

³¹Cambe b̄a dou ede, ”B̄uneku loa ka'ao b̄a nahu, nggara watisi wara dou ma ngoa kab̄aena d̄i nahu?” Edempara sia recena la Filipus ne'e ese karetana ro doho samana lab̄o sia.

³² Akeku ayat-ayat rabacana ede, ”Sia b̄une jimba raranda d̄i sambele, b̄une ana jimba ma wati kab̄e nggara guntisi kerena, ndedeku Sia wati nggahina kone sampu'u.

³³Sia rakab̄awa ra katuna ro rakarawi kai wati adi. Nawa-Na d̄i wonto rad̄i dunia ndad̄i kone sab̄ua dou rau ma loa ngoa rero mab̄oha londo ra mai-Na.”

³⁴Dou Etiopia mana'e b̄ora ede manggahi d̄i la Filipus, ”Coba ngoa to'ipu d̄i nahu, couku ranggahi b̄a nabi ake? Sab̄ua weki ndaina atao dou makalai?”

³⁵Edempara la Filipus tampu'u nuntu ra nggahina; sia kanina ayat-ayat ede d̄i tampu'ukaina ngoa ra kahabakaina Haba Mataho mab̄oha Ruma Isa d̄i dou mana'e b̄ora ede.

³⁶D̄iwoha ncai, siad̄oho rongga d̄i sab̄ua hid̄i ma wara oi. Nggahi dou mab̄ora ede, ”Tiopu ede wara oina! Au waliku madancihi d̄ikandeu karasokaimu nahu?” [

³⁷Nggahi la Filipus, ”Nggara imbi podasi Ita, Ita loa d̄ikandeu karaso.” ”Nahu ka'imbi Ruma Isa Al Masih eded̄u Ana Ruma Hatalla,” nggahi dou Etiopia mana'e b̄ora ede.]

³⁸Edempara kamidina kareta; edempara siad̄oho d̄uana, la Filipus ro dou mana'e b̄ora ede, londona awa oi ro kandeu karaso b̄a la Filipus sia.

³⁹Wakatu siad̄oho losana d̄i oi, weha b̄a Roh Allah la Filipus tahid̄i ede. Dou Etiopia mana'e b̄ora watid̄u edana sia wali. Kai neo adena dou mana'e b̄ora ede lampa walina.

⁴⁰Wed̄i lalompa la Filipus wa'ura wara d̄i Asdod. Ro wakatu sia lampa walina, sia kahabana Haba Mataho mab̄oha Ruma Isa d̄i samenana kota sampe sia ronggana d̄i Kaisarea.