Read Bima KISAH RASU-RASU 9 Bible Online

KISAH RASU-RASU 9 - Bima bible

KISAH RASU-RASU 9

¹Wunga wakatu ede la Saulus nane'eku kadahu ncau ro hadena dou-dou ma'imbi Ruma Isa. Sia laona d̄i dou mana'ekai imam-imam,

²ro rahona sura kuasa d̄i laokaina d̄i dou-dou mana'ekai uma-uma sambeakai dou Yahudi d̄i Damsyik, loakud̄u raka edasi b̄a sia ta aka dou-dou ma imbi d̄i Ruma Isa, sia naloa wa'u ra leto siad̄oho ro wa'a siad̄oho aka Yerusalem.

³Wunga ade laona aka Damsyik, wakatu d̄enira lab̄o kota ede, wed̄i lalompa taroa ma ramai ta langi makalea heko la Saulus.

⁴Sia mbo'ona awa dana edempara ringana sab̄ua eli manggahi d̄i sia, ”Saulus, Saulus! B̄ab̄auku nggomi kancokikaimu Nahu?”

⁵”Cou Ita?” sod̄i b̄a la Saulus. Cambe b̄a eli ede, ”Nahu eded̄u Isa, rakancoki b̄a nggomi.

⁶Pala ake tu'ura ro lao lu'upu aka kota. Ta ede nggomi wara d̄i ngoa au d̄i pab̄ua karawi b̄a nggomi.”

⁷Dou-dou ma b̄atu sama lab̄o la Saulus wed̄i adena ndad̄i wati loa menana nggahi; b̄ara siad̄oho ringana eli ede pala wati wara edana kone cou-cou rau.

⁸Edempara la Saulus tu'u kid̄ina ro henggana madana, pala wati loana eda au-au wali. Ndad̄i siad̄oho manenti rimana ro d̄andana sia lu'u aka Damsyik.

⁹Tolu nai ntoina sia wati loana eda ro santoi ede sia wati ngaha atao nono podana.

¹⁰D̄i Damsyik wara sab̄ua dou ma'imbi Ruma Isa mangara la Ananias. D̄i ade edana rangoa b̄a Ruma, Ruma manggahi d̄i sia. Nggahi Ruma, ”Ananias!” Cambe b̄a la Ananias, ”Io, mada, Ruma.”

¹¹Nggahi Ruma, ”Wajo laopura ake. Laopu aka uma la Yudas d̄i Ncai Marombo. Sod̄ipu ta aka dou ma ngara la Saulus ma ramai rad̄i kota Tarsus. Dou ede wunga do'ana,

¹²ro d̄i ade edana rangoa b̄a Ruma ede sia edana sab̄ua dou mone mangara la Ananias, mamai raka sia ro tohona rimana ese wawo sia loakud̄u sia loa eda mbali.”

¹³Cambe b̄a la Ananias, ”Ruma, mada wa'ura ringaku mboto dou manuntu mab̄oha dou ake, mapenti poda mab̄oha ela Ita rakancoki b̄a dou ake d̄i Yerusalem.

¹⁴Ro ake sia wa'ura mai ara ake kai ra'iji b̄a dou-dou mana'ekai imam d̄imawa'u ra leto sara'ana dou ma imbi d̄i Ita.”

¹⁵Pala nggahi Ruma d̄i la Ananias, ”Laompa! B̄ara Nahu mawa'ura kad̄ale sia d̄imakarawi wea d̄i ru'u b̄a Nahu, loakud̄u sia ngoa ra kahabana mab̄oha Nahu d̄i bangsa-bangsa makalaina ma laina agama Yahudi ro d̄i sangaji-sangaji ro d̄i ela ra dou Israel rau.

¹⁶Ro ndai Nahu d̄imaturu teina d̄i sia samenana susa ra ncoki d̄i pab̄ua iu b̄a sia b̄ara Nahu.”

¹⁷Edempara la Ananias lao lalona aka uma ede ro tohona rima ese wawo la Saulus. ”Cina Saulus,” nggahi la Ananias, ”Ruma Isa ra'eda b̄a ndaimu d̄i woha ncai wakatu maimu ta ake, Siaku ma rakau mai ndaiku loakud̄u loamu eda wali ro kuasakai b̄a Roh Allah.”

¹⁸Wakatu ede wa'u wara b̄une fenta uta mahori weki d̄i mada la Saulus ro sia loana eda mbali. Ndad̄i sia tu'una, edempara d̄i kandeu karaso.

¹⁹Ro sawa'u b̄a nggori ngaha sia ndad̄i tenggo walina. La Saulus ngge'ena d̄i Damsyik lab̄o dou-dou ma'imbi d̄i Ruma Isa pila-pila nai ntoina.

²⁰Sia lao lalona aka uma-uma sambeakai ro tampu'una ngoa ra kahaba b̄a one Ruma Isa eded̄u Ana Ruma Hatalla.

²¹Sara'ana dou namidi adena ringa la Saulus. Nggahi siad̄oho, ”Sab̄ua laina sia ma d̄i Yerusalem mawa'ura hade sara'ana dou ma imbi d̄i Ruma Isa? Sia maina ta ake b̄a ne'ena wa'u ra leto ro mawa'a siad̄oho d̄i dou-dou mana'ekai imam!”

²²Pala la Saulus nanaha tenggo pangaruna. Bukuti-bukuti ra nggahi b̄a sia mab̄oha Ruma Isa nawancuku podana b̄a one Ruma Isa eded̄u Sangaji Mambei salama, sampe dou-dou Yahudi ma ngge'e d̄i Damsyik wati loa walina tele.

²³ Sawa'u b̄a pila-pila nai ntoina dou-dou Yahudi mafakana ne'e hade la Saulus.

²⁴Pala mafaka siad̄oho nab̄adeku b̄a sia. Aimarai aimangad̄i siad̄oho mangenana d̄i tad̄a lawa kota d̄imahade sia.

²⁵Pala d̄i sab̄ua aimangad̄i, dou-dou mab̄atu la Saulus maweha ao sia, edempara kalondona sia kai garanji kalalo ta tembo kota.

²⁶La Saulus laona aka Yerusalem, ro ta aka sia ngupana ncai d̄i kab̄orokaina weki lab̄o dou-dou ma'imbi d̄i Ruma Isa. Pala siad̄oho nadahuku d̄i sia, b̄ara siad̄oho wati imbina b̄a one sia wa'ura poda-poda imbi d̄i Ruma Isa.

²⁷Edempara la Barnabas mai rakana sia, edempara lao wa'ana sia d̄i rasu-rasu. La Barnabas ngoana d̄i siad̄oho rab̄unena la Saulus edana Ruma d̄i woha ncai ro rab̄unena Ruma manuntu ra nggahi lab̄o sia. La Barnabas mangoa rauna mab̄oha rab̄unena la Saulus disana ngoa ra tei d̄i Damsyik kai ngara Ruma Isa.

²⁸Edempara la Saulus ngge'e lab̄ona siad̄oho, ro disana hotoba kai ngara Ruma d̄i sara'ana dana ra rasa Yerusalem.

²⁹Sia nuntu ra nggahina ro cence ncihina lab̄o dou-dou Yahudi rau ma nuntu kai bahasa Yunani, pala siad̄oho nane'eku hade sia.

³⁰Wakatu b̄ade b̄a dou-dou ma'imbi makalaina mab̄oha lampa rawi ede, siad̄oho lao wa'a pesona la Saulus aka Kaisarea. Edempara nggaduna sia aka Tarsus.

³¹Ndad̄i ela Ruma d̄i sara'ana Yudea, Galilea, ro Samaria wati wara ngango. Rabantu b̄a Roh Allah, kai dahuna d̄i Ruma, ela-ela Ruma ede nanaha tenggo ro nanaha mboto.

³²La Petrus lao lampa rerona d̄i lao lambakaina ela-ela Ruma. D̄isab̄ua ainaina sia lao lambana ela RUMA ma ngge'e d̄i Lida.

³³Ta aka sia eda angi lab̄o sab̄ua dou mone mangara la Eneas, masupu made b̄inci ro wati loana tu'u d̄i hid̄i marukaina waru mba'a ntoina.

³⁴Nggahi la Petrus d̄i la Eneas, ”Eneas, Ruma Isa Al Masih makatahona nggomi. Tu'ura ro kamocipu hid̄i marukaimu.” Wakatu ede wa'u tu'u la Eneas.

³⁵Sara'a ela ra dou d̄i Lida ro Saron ma'edana la Eneas, edempara siad̄oho sara'ana warina weki ro imbina d̄i Ruma.

³⁶D̄i Yope wara sab̄ua dou siwe mangara la Tabita. Sia sab̄ua dou ma imbi d̄i Ruma Isa. (Ngarana d̄i ade nggahi Yunani eded̄u la Dorkas aona maju.) Sia naca'u karawi au-aura mataho ro naca'u bantu dou-dou mancoki mori.

³⁷Wakatu ede sia hina b̄a supu edempara madena. Sawa'u b̄a nggori kandeu timbana, sia toho wi'i d̄i b̄ili ma esena.

³⁸Rasa Yope wati ipi d̄o'ona lab̄o rasa Lida. Ndad̄i wakatu ringa b̄a dou-dou ma'imbi Ruma Isa d̄i rasa Yope b̄a one la Petrus wara d̄i rasa Lida, siad̄oho kauna d̄ua dou lao raka la Petrus kai nggaduna nggahi ake, ”Mai roci to'ipu ta ake.”

³⁹La Petrus tu'u lalona ro lao b̄atuna siad̄oho. Sawa'u b̄a ronggana ta aka, sia lao wa'a b̄a dou tab̄ili ma esena. Sara'ana dou siwe mbaru mboha ta ede makahumbu d̄i la Petrus ro nangi salahona ro teina d̄i sia b̄aju-b̄aju ro jumba-jumba randa'u b̄a la Dorkas d̄i ru'u b̄a siad̄oho wakatu sia mbuipu morina.

⁴⁰Kau b̄a la Petrus losa sara'a siad̄oho, edempara sia doho sujuna ro do'ana. Sawa'u b̄a ede sia satandona d̄i timba la Dorkas ro nggahina, ”Tabita, tu'ura!” Edempara la Dorkas henggana madana, ro wakatu eda b̄a sia la Petrus, sia dohona.

⁴¹Edempara la Petrus nentina rima ro bantuna sia tu'u kid̄i. Edempara la Petrus ouna dou-dou ma'imbi ta ede sama-sama lab̄o dou-dou siwe mbaru mboha ede, edempara d̄onggona la Dorkas ma wa'ura mori ede d̄i siad̄oho.

⁴²Haba mandad̄i ede wa'ura mbou d̄i sara'a rasa Yope, ndad̄i mboto dou ma'imbi d̄i Ruma Isa kai Sangaji Mambei salama siad̄oho.

⁴³La Petrus ngge'ena tahid̄i ede pila-pila nai wali d̄i uma dou mataki karaka huri ma ngara la Simon.