Read Bima ROMA 1 Bible Online

ROMA 1 - Bima bible

ROMA 1

¹Samenana cina ra angi d̄i Roma rameci ra ca'u b̄a Ruma Hatalla ro ma rawa'u ou b̄a Ruma Hatalla d̄imandad̄i ela-Na. Ruma Hatalla nawa'ura kad̄ale ro hanta kalaina nahu d̄imangoa ra kahabana Haba Mataho rad̄i Ruma Hatalla.

²Haba Mataho ede nawa'ura sake b̄a Ruma Hatalla ratampu'u aipu jamana ma'ulu kai nabi-nabi-Na ro wa'ura tunti ade Alkitab.

³Haba Mataho ede mab̄oha Ana Ruma Hatalla, Ruma ndaita Isa Al Masih. Sacara manusiana, Sia eded̄u londo ra mai la Daud,

⁴pala sacara ilahina Sia palasi Ana Ruma Hatalla. Ede mabukutina kai kuasa ma heba poda kai ncai mori mbali-Na rad̄i made.

⁵Kai ncai Sia rau Ruma Hatalla mbeina bareka d̄i nahu ndad̄i rasu, loakud̄u nahu — d̄imalia ra horoma Al Masih — d̄ende rawa'a dou rad̄i samenana bangsa loakud̄u imbi ro to'ana.

⁶Ma d̄imakasuna lab̄o sara'a bangsa eded̄u nggomid̄oho rau ma wara d̄i Roma; nggomid̄oho rau wa'ura ou d̄imandad̄i ela Ruma Isa Al Masih.

⁷B̄ara ndendena nahu tuntiku d̄i nggomid̄oho. Raho-raho to'impa Ruma Hatalla Ama ndaita ro Ruma Isa Al Masih mbeina bareka ro taho ra ntai d̄iru'u b̄a nggomid̄oho.

⁸Saramba-rambana kai ncai Ruma Isa Al Masih, nahu matarima kasi d̄i Ruma Hatalla b̄ara samenana nggomid̄oho; b̄ara sara'a dunia nawa'ura ringa b̄a one nggomid̄oho ma'imbi poda d̄i Al Masih.

⁹Nahu kawara ncau-ncauku nggomid̄oho nggara kado'asi. Ruma Hatalla masakasina b̄a one au ranggahi b̄a nahu ede poda. Siaku Ruma Hatalla karawi wea b̄a nahu kai kapodaku ade lab̄o ngoa ra kahabaku Haba Mataho mab̄oha Ana-Na.

¹⁰Nahu maraho poda-poda d̄i Ruma Hatalla, raho-raho to'impa kau b̄a Sia ake nahu mai lamba nggomid̄oho.

¹¹B̄ara nahu wancuku ne'e podaku eda angi lab̄o nggomid̄oho loakud̄u bage b̄a nahu lab̄o nggomid̄oho bareka rad̄i Roh Allah d̄imakatenggona nggomid̄oho.

¹²Aona nggahi nahu eded̄u b̄ara ndaita sama-sama wa'ura imbita d̄i Ruma Isa Al Masih, ndad̄i ndaita loa cua katenggo angi.

¹³ Cina ra angi! Ne'e b̄a nahu loakud̄u nggomid̄oho b̄ademu b̄a one wa'ura ntuwu nahu ne'eku mai lamba nggomid̄oho pala wara-waraku madompona. Ne'e b̄a nahu loakud̄u d̄i woha weki nggomid̄oho rau karawi nahu wara onena b̄une karawi b̄a nahu wa'ura wara hasina d̄i woha dou ma laina Yahudi d̄i hid̄i-hid̄i ma kalai.

¹⁴B̄ara nahu mantau taki d̄ipab̄ua karawi d̄i samenana bangsa: ma wa'ura maju ro ma watipu maju, ma ntau ilimu, ro ma wati ntau ilimu.

¹⁵B̄ara ndedena nahu kane'e podaku ngoa ra kahaba Haba Mataho ede d̄i nggomid̄oho ma ngge'e d̄i Roma rau.

¹⁶ Nahu ka'imbi poda d̄i Haba Mataho ede, b̄ara Haba ede eded̄u tenggo ra wale Ruma Hatalla d̄imakasalama samenana dou ma imbi; saramba-rambakaina dou Yahudi, ro bangsa makalai rauna.

¹⁷ B̄ara kai Haba Mataho ede Ruma Hatalla naturu teiku b̄uneku carana hubunga manusia lab̄o Ruma Hatalla ndad̄i taho mbali; carana eded̄u kai imbi d̄i Ruma Hatalla, ratampu'u ai sarambana sampe cumpukaina. Ede sama b̄une ratunti ade Alkitab, ”Dou ma imbi d̄i Ruma Hatalla ndad̄ina hubunga lab̄o Ruma Hatalla ndad̄i taho mbali, dou ede d̄imamori!”

¹⁸Rad̄i saroga Ruma Hatalla nakatadaku mbani-Na d̄i samenana dosa ro rawi ma'iha ra madab̄ae manusia, b̄ara rawi ma'iha ro madab̄ae natapaku manusia d̄imapata ngoa ra tei mancihi mab̄oha Ruma Hatalla.

¹⁹Au rab̄ade b̄a manusia mab̄oha Ruma Hatalla nawa'ura tada poda d̄ei ade mpida manusia, b̄ara ndai Ruma Hatalla nawa'ura katada ede d̄i manusia.

²⁰Ratampu'u kandad̄i b̄a Ruma Hatalla dunia, tabe'a-tabe'a Ruma Hatalla ma wati tada, eded̄u ka'ada'a-Na kai Ruma Hatalla kaina ro kuasa-Na ma'ederahid̄i wa'ura loa ka'ao b̄a manusia kai ncai samenana rawa'ura kandad̄ina. Ndad̄i manusia wati ntauna alasa au-au d̄imakancihi weki.

²¹ Manusia napataku Ruma Hatalla, pala manusia wati lia ra horomana Sia kai Ruma Hatalla kaina ro wati tarima kasi rauna d̄i Sia. Pala manusia nafiki ra kananuku ma wati-wati; ade siad̄oho nawa'ura ndad̄i rindi.

²²Siad̄oho iu wekina loa timba ra lemba, sapodakaina siad̄oho sampula.

²³ Laina Ruma Hatalla ma'ederahid̄i d̄i nemba b̄a siad̄oho, malaisi patung-patung ma b̄une pahu mahluk ma loa made; eded̄u manusia, nasi, binata ma upa mbua ed̄i, ro binata ma rama.

²⁴B̄ara ndedena Ruma Hatalla naco'ompa siad̄oho kuasakai b̄era kane'e b̄a adena d̄imakarawi ma dab̄ae, ndad̄ina siad̄oho karawina lampa rawi-lampa rawi ma sampu d̄i weki ndaid̄ohona.

²⁵Ruma Hatalla ma poda, cepe b̄a siad̄oho kai ma palasu. Laina Marakandad̄ina, malaisi rakandad̄ina edeku d̄i nemba ro d̄i karawi wea b̄a siad̄oho. Sapodakaina ma rakandad̄ina edeku ma pab̄ua d̄iroi ra wadi santoi-ntoina! Amin.

²⁶B̄ara manusia karawi ndedena, ndad̄i Ruma Hatalla naco'ompa siad̄oho b̄atu nawasuna ma dab̄ae. Dou-dou siwe watid̄u maikai b̄a ade walina d̄i dou mone b̄une ranginakai d̄i manusia, malaisi namaikai b̄a adena d̄i sama siwena.

²⁷Dou mone ndede rauja; siad̄oho watid̄u b̄une ranginakaina campo lab̄o dou siwe, malaisi namai adena d̄i sama monena. Dou mone nakarawiku d̄i majakai d̄i sama monena, ndad̄ina siad̄oho natarima balasana ma ncihi ncao lab̄o karawi siad̄oho ma dab̄ae ede.

²⁸B̄ara iu b̄a manusia wati paraluna pata Ruma Hatalla, ndad̄i Ruma Hatalla naco'ompa fiki ra kananu siad̄oho ndad̄i iha, ndad̄ina siad̄oho nakarawiku lampa rawi-lampa rawi mawati loa d̄i karawi.

²⁹Ade siad̄oho b̄inikai b̄a samenana ma dab̄ae, ma wati poda; b̄inikai b̄a na'e ade, ma'iha ro madab̄ae, ro mahiana; b̄inikai b̄a ne'e hade angi, ncao, tipu ro wi'i d̄ei ade rawi lenga. Siad̄oho naca'u nuntu ka'iha dou makalai,

³⁰naca'u ka'iha ngara dou makalai, siad̄oho nasombo ro kura ngaja ro madaca'u d̄i Ruma Hatalla, ro naca'u nuntu kukukeko. Siad̄oho naloa ngupa cara-cara ma b̄ou d̄i karawikaina dab̄ae. Siad̄oho na'aoku dou matua;

³¹siad̄oho wati ne'ena ka'ao wea dou makalai; siad̄oho wati to'ana ro wati ntauna kasi ade d̄i sasama manusia.

³²Siad̄oho nab̄adeku, b̄a one nggahi hukum Allah, dou ma karawi samenana ede patu d̄i hukum hade. Konena ndede siad̄oho ngge'empa karawina lampa rawi ede; ro nanaha satuju rauku dou makalai karawi ndede.