Read Bima ROMA 10 Bible Online

ROMA 10 - Bima bible

ROMA 10

¹Cina ra angi! Nahu ne'e poda b̄a adeku loakud̄u bangsa nahu d̄ikasalama wea. Ro nahu do'a poda-podaku d̄i Ruma Hatalla d̄i ru'u b̄a siad̄oho.

²Nahu disaku nggahi b̄a one siad̄oho makapoda-poda ade karawi d̄iru'u Ruma Hatalla. Pala kapoda ade siad̄oho ede wati kai dasa loa ra b̄ade ma ramai ta Ruma Hatalla.

³Siad̄oho wati b̄adena cara ndawi b̄a Ruma Hatalla hubunga manusia lab̄o Sia ndad̄i taho mbali. Ro b̄ara siad̄oho ne'e b̄atu cara ndai siad̄oho, ndad̄i siad̄oho wati oko ro b̄atuna d̄i cara raturu tei b̄a Ruma Hatalla.

⁴Hukum Taurat wa'ura kanggori b̄a Al Masih. Ndad̄i, sanikina dou ma imbi d̄i Al Masih, hubungana lab̄o Ruma Hatalla ndad̄i taho mbali.

⁵ Musa tuntina b̄a one dou ma taho mbali lab̄o Ruma Hatalla kai dasa hukum Taurat, dou ede d̄imamori b̄ara to'ana d̄i hukum agama ede.

⁶ Pala mab̄oha cara dou taho mbali lab̄o Ruma Hatalla kai dasa imbi d̄i Ruma Hatalla, Alkitab manggahi ndakena, ”Edera nggomi nggahimu d̄ei ademu, ’Couku d̄imane'e ese saroga?’ (aona d̄imawa'a kalondo Al Masih),

⁷atao, ’Couku d̄imalondo aka dunia dou mamade?’ (aona mahanta kane'e Al Masih rad̄i made).”

⁸Aona eded̄u ndake, ”Haba ma ramai ta Ruma Hatalla ede d̄eni poda lab̄o nggomid̄oho; d̄i asamu ro d̄ei ademu.” Edeku haba ra kahaba rero b̄a nami; b̄a one dou pab̄uaku imbina.

⁹B̄ara nggara nggomid̄oho mangaku kai asamu b̄a one ”Isa ede Ruma mad̄ese ra ntasa”, ro nggomid̄oho ma'imbiku d̄ei ademu b̄a one Ruma Hatalla wa'ura kamorina Ruma Isa rad̄i madena, ndad̄i nggomid̄oho d̄imasalama.

¹⁰B̄ara kai adena dou imbina, ndad̄ina Ruma Hatalla tarimana sia kai dou mataho mbali lab̄o Ruma Hatalla raso d̄i tando Ruma Hatalla. Ro kai asana dou mangakuna, ndad̄ina sia d̄i kasalama.

¹¹ D̄i ade Alkitab ratunti, ”Dou ma imbi wati d̄i kato'i wea adena.”

¹²Ede nab̄oha d̄i samenana dou, b̄ara wati wara laina d̄i ade weki dou Yahudi lab̄o dou-dou bangsa makalai. Ruma Hatalla masab̄uampa ede eded̄u Ruma d̄iru'u b̄a samenana dou. Sia nambeiku bareka ma mboto poda d̄i samenana dou ma raho bantu d̄i Sia.

¹³ Ade Alkitab ratunti, ”Samenana dou ma ou Ruma, d̄imasalama.”

¹⁴Pala b̄uneku loana dou ou Ruma nggara siad̄oho watipu imbina? Ro b̄uneku siad̄oho loakaina imbi d̄i Ruma nggara siad̄oho watipu ringana mab̄oha Sia? Ro b̄uneku siad̄oho loakaina ringa mab̄oha Ruma, nggara watisi wara mangoa ra makahabana?

¹⁵ Ro b̄uneku dou loana wa'a haba ede nggarasi siad̄oho watisi rakau? D̄i ade Alkitab ratunti ndake, ”Nawancuku tahona mai dou-dou ma wa'a Haba Mataho ma ramai ta Ruma Hatalla!”

¹⁶ Pala wati sara'a dou matarima Haba Mataho ede. B̄ara nggahi la Yesaya, ”Ruma, couku ma imbi d̄i haba rawa'a b̄a madad̄oho?”

¹⁷B̄ara ndedena dou-dou ndad̄i imbi b̄ara siad̄oho ringana haba, ro ringakaina haba b̄ara wara dou ma rangoa ra kahabana haba mab̄oha Al Masih.

¹⁸ Pala nahu masod̄i: Sab̄ua poda siad̄oho watipu ringana haba ede? Pasti wa'ura! B̄ara ade Alkitab ratunti ndake, ”Eli siad̄oho wa'ura mbou ro mbi'a d̄i sara'a dunia, nggahi ra eli siad̄oho wa'ura rongga aka sumpu dunia.”

¹⁹ Nahu masod̄i wali: Sab̄ua bangsa Israel watipu b̄adena? Co'opu rasod̄i ede masaramba-rambana d̄i cambe b̄a la Musa. Nggahi la Musa, ”Ndakeku nggahi Ruma Hatalla, Nahu d̄imandawina nggomi hiana ade d̄i sab̄ua-sab̄ua bangsa ma laina ela Ruma ro Nahu d̄imandawina nggomi mbani d̄i sab̄ua bangsa ma sampula.’ ”

²⁰ La Yesaya nancewi disa wali. Nggahi sia, ”Ndakeku nggahi Ruma Hatalla, ’Dou-dou ma wati ngupa Nahu, nawa'ura eda Nahu; ro Nahu makatada weki-Ku d̄i siad̄oho ma wati sod̄i mab̄oha Nahu.’ ”

²¹ Pala mab̄oha bangsa Israel nggahi la Yesaya, ”Ndakeku nggahi Ruma Hatalla, ’Sanarau ainaina Nahu d̄alaku rima-Ku d̄i sab̄ua bangsa ma tera tuta ro mawati to'a.’ ”