Read Bima ROMA 11 Bible Online

ROMA 11 - Bima bible

ROMA 11

¹ Nahu masod̄i: Sab̄ua Ruma Hatalla nawa'ura paki ela ndai-Na? Tantu wati! Ndai nahu dou Israel londo ra mai Ibrahim, ro rad̄i londo ra mai la Benyamin.

²Wati! Ruma Hatalla wati pakina ela-Na rawa'u kad̄ale-Na ra aipu saramba wa'una. Cina ra angi mab̄adeku au rawa'ura tunti ade Alkitab mab̄oha Elia, aipu da'awa b̄a sia masa'ala Israel d̄i Ruma Hatalla. Elia nggahina,

³ ”Ruma, dou-dou nawa'ura hade nabi-nabi-Mu ro kalelina hid̄i-hid̄i d̄i d̄onggo ra mbei kai koroba d̄iru'u-Mu. D̄i ndai mada kesempa ro siad̄oho nane'eku hade mada.”

⁴ Au cambe b̄a Ruma Hatalla d̄i Elia? Cambe b̄a Ruma Hatalla, ”Nahu wa'ura tu'u wi'iku pidu riwu dou d̄iru'u weki ndai-Ku. Siad̄oho watipu iuna nemba Dewa Ba'al.”

⁵Ndede rau wakatu-ake: Wara mboto nari dou-dou rawa'ura kad̄ale b̄a Ruma Hatalla b̄ara rahama ndai Ruma.

⁶Sia kad̄alena siad̄oho kai dasa rahama-Na ro laina b̄ara dasa ruku ra rawi siad̄oho. B̄ara nggara kad̄ale b̄a Ruma Hatalla ede kai dasa ruku ra rawi manusia, ndad̄i rahama Ruma Hatalla ede lai walina rahama masapodakaina.

⁷Ndad̄i, b̄uneku? Ela ra dou Israel wati rakana au rangupa b̄a siad̄oho. Ma rakana cuma sakalompo to'i dou-dou ma rawa'u kad̄ale b̄a Ruma Hatalla. Ma kalai sara'ana ndad̄i tera tutana d̄i ade oukai b̄a Ruma Hatalla.

⁸ B̄ara d̄i ade Alkitab ratunti ndake, ”Ruma Hatalla ndawina ade ro fiki ra kananu siad̄oho ndad̄i sampula; ro sampe wakatu ake isi mada siad̄oho wati loana eda ro fiko siad̄oho wati loana ringa.”

⁹ Daud manggahi rau, ”Co'opu ngaha ra nono ndiha siad̄oho ndad̄i sarente d̄iru'u b̄a ndai siad̄oho, ro mandad̄i kancoa, hid̄i mab̄ukai siad̄oho ro lelikaina!

¹⁰Co'opu ntanda siad̄oho ndad̄i rindi loakud̄u siad̄oho wati loana eda; ro co'opu siad̄oho ndad̄i mbuku santoi-ntoina.”

¹¹Nahu masod̄i wali: Aipu dou Yahudi mab̄una, sab̄ua ndad̄i ndedekaina loakud̄u siad̄oho lelina? Sakali-kali wati! Pala b̄ara siad̄oho madosa, ndad̄i bangsa makalai mala d̄i kasalama, ndad̄ina nakandad̄iku dou Yahudi hiana d̄i bangsa makalai ede.

¹²B̄ara bangsa Yahudi mancara ro wati b̄atuna kane'e b̄a Ruma Hatalla, ndad̄i bangsa-bangsa makalai d̄i mbei bareka b̄a Ruma Hatalla. Au walipu nggara hubunga bangsa Yahudi lab̄o Ruma Hatalla ndad̄i taho mbali; tantu ncewi na'e wali bareka d̄i mbei b̄a Ruma Hatalla!

¹³Pala ake natahopu nahu manuntu d̄i cina ra angi ma laina Yahudi! Salama ake, kai rasu d̄iru'u bangsa-bangsa ma laina Yahudi, nahu wancuku hanta rakad̄eseku taki ra puta nahu.

¹⁴Nahu mane'e poda loakud̄u nahu kamaiku hiana d̄i bangsa ndai nahu, loakud̄u kai ncai ede, nahu loa kasalama sarundena rad̄i weki siad̄oho.

¹⁵B̄ara siad̄oho tula ao b̄a Ruma Hatalla, ndad̄i hubunga dunia lab̄o Ruma Hatalla ndad̄i taho mbali; au walipu nggara siad̄oho tarima b̄a Ruma Hatalla! Tantu ede samampa b̄une dou mamade mori mbali.

¹⁶Nggara satob̄e roti ma sarambakaina wa'ura mbei d̄i Ruma Hatalla, ede aona sara'a rotina mbei d̄iru'u Ruma Hatalla rau. Ro nggara amu haju eded̄u ntau Ruma Hatalla, ede aona sanga-sangana ntau Sia rau.

¹⁷Sarundena rad̄i sanga-sanga haju zaitun — eded̄u dou-dou Yahudi — wa'ura caca. Ro d̄i hid̄i racacakai ede d̄i cangko kai sanga haju zaitun doro, eded̄u nggomid̄oho ma laina Yahudi. Nggomid̄oho d̄i cangko tau ta ede loakud̄u nggomid̄oho iumu samenana ma taho d̄i ade mori ra wokomu ade ma raso dou-dou Yahudi.

¹⁸B̄ara ndedena aina nggomid̄oho wi'ikaimu mod̄ana d̄i siad̄oho rawa'u caca b̄une sanga haju ede. Nggomid̄oho pab̄uapu kawaramu b̄ara nggomid̄oho sanga mpoana. Ro laina sangana ma mbei ngaha d̄i amuna, malaisi amuna ma mbei ngaha d̄i sangana.

¹⁹Pala nggomid̄oho d̄imanggahi, ”Io, pala sanga-sangana ede d̄idompo loakud̄u nahu loa d̄i cangkokai d̄i fu'una!”

²⁰Ede nancihi romo. Pala siad̄oho d̄i paki b̄ara siad̄oho wati imbina, sapodakaina nggomid̄oho d̄i tarima b̄ara nggomid̄oho imbimu. Ndad̄i, aina ndad̄i sombomu nggomi b̄ara ede; pala nggomid̄oho pab̄uapu iumu dahu.

²¹B̄ara nggara Ruma Hatalla wati kancajana d̄imapaki dou Yahudi ma b̄une sanga-sanga asalina ede, aina kacaimu Sia d̄imakancajana d̄i pakina nggomid̄oho!

²²Ndad̄i ta ake ndai ta'edaku b̄une b̄eku tahona Ruma Hatalla ro b̄une b̄eku tera rauna Sia. Sia na'ipiku d̄id̄ana d̄i siad̄oho ma karawi dosa, pala Sia nataho ade d̄i nggomid̄oho — sura nggomid̄oho ngge'empa morimu d̄i tahona Ruma Hatalla. Nggara watisi, ndad̄i nggomid̄oho rau d̄i paki.

²³Ro mab̄oha dou-dou Yahudi ede, nggara siad̄oho wi'ina ruku ra rawi mawati imbi, ndad̄i siad̄oho d̄i tarima mbali; b̄ara Ruma Hatalla mantau Kuasa d̄imatarima mbali siad̄oho.

²⁴Nggomi ma laina bangsa Yahudi eded̄u b̄une sanga rad̄i fu'u zaitun doro. Ya, nggarasi nggomid̄oho; wati ncihi ncaomu lab̄o tabe'a ndaimu, loa d̄i cangko kai d̄i fu'u zaitun ma asali, au walipu dou-dou Yahudi raconto ra ibara kai sanga-sanga fu'u zaitun ma asali ede. Tantu ncewi mod̄a wali ru'u Ruma Hatalla d̄imakambalina siad̄oho d̄i fu'u zaitun ndai siad̄oho.

²⁵Cina ra angi! Ne'e b̄a nahu nggomid̄oho aina iu wekimu wa'ura b̄ade sara'amu. B̄ara wara sab̄ua lampa rawi d̄i ne'e b̄a Ruma Hatalla, pala ma wati b̄ade b̄a dou. Ro ne'e b̄a nahu nggomid̄oho d̄imab̄adena; eded̄u ake: Sarunde weki rad̄i dou Yahudi natera tuta, pala ruku ra rawi siad̄oho ede d̄imandad̄i cuma sampe mbotona dou-dou laina Yahudi ma mai d̄i Ruma Hatalla wa'ura ncihi.

²⁶ Ndedeku sara'ana dou Yahudi d̄imasalama. B̄ara d̄i ade Alkitab ratunti ndake, ”Sangaji Makasalama d̄imamai rad̄i Sion; Sia d̄imafura samenana rawi madab̄ae rad̄i londo ra mai la Yakub

²⁷ Nahu d̄imad̄ikina rasake ake lab̄o siad̄oho d̄i wakatu kangampu wea b̄a Nahu dosa-dosa siad̄oho.”

²⁸B̄ara dou Yahudi wati ne'ena tarima Haba Mataho ma ra mai ta Ruma Hatalla, edempara siad̄oho ndad̄i musu Ruma Hatalla; ro ede mandad̄i labakaina d̄iru'u b̄a cina ra angi ma laina Yahudi. Pala b̄ara rakad̄ale b̄a Ruma Hatalla, ndad̄i dou-dou Yahudi ede ngge'empa d̄i meci ra ca'u b̄a Ruma Hatalla b̄ara wa'i ra waro siad̄oho.

²⁹B̄ara kad̄alesi b̄a Ruma Hatalla dou ro mbeina bareka d̄i dou ede, Ruma Hatalla wati parana hinti mbalina au rakarawi-Na.

³⁰Ntoina nggomid̄oho wati to'amu d̄i Ruma Hatalla. Pala ake tarimamu rahama Ruma Hatalla, b̄ara dou-dou Yahudi wati to'ana.

³¹Ndede rauja lab̄o dou-dou Yahudi ede. Wakatu ake siad̄oho wati to'ana d̄i Ruma Hatalla, loakud̄u rahama ratarima b̄a nggomid̄oho, siad̄oho rau d̄imaraka rahama peade.

³²B̄ara Ruma Hatalla wa'ura co'ona samenana ela manusia d̄i kuasakai b̄a wati to'a, loakud̄u Sia katadana rahama-Na d̄i ru'u b̄a siad̄oho sara'a.

³³ Nawancuku hebana ntau ra wara Ruma Hatalla! Nawancuku na'ena hikima ro loa timba ra lemba-Na! Couku maloana paresa katantuna au ranggahi-Na? Couku d̄imaloana ka'ao cara-cara karawi-Na?

³⁴ Ade Alkitab ratunti ndake, ”Couku ma b̄adena fiki ra kananu Ruma? Couku ma loana ngoa ra tei kataho Sia?

³⁵ Couku mawa'ura iu mbei au-au d̄i Ruma ndad̄i loakaina raho cepe d̄i Sia?”

³⁶ Ruma Hatalla ma rakandad̄ina samenana. Sara'ana ramaina ta Ruma Hatalla ro eded̄u ru'u Ruma Hatalla. D̄ese ra ntasara Ruma Hatalla ru'u santoi-ntoina! Amin.