Read Bima ROMA 12 Bible Online

ROMA 12 - Bima bible

ROMA 12

¹Cina ra angi! Ruma Hatalla nawancuku tahona d̄i ndaita. B̄ara ndedena, raho poda b̄a nahu loakud̄u nggomid̄oho d̄onggo mbeimu sarumbumu kai koroba mori d̄iru'u b̄a Ruma Hatalla mpoampa ro d̄imakasana wea ade-Na. Sambea ra do'amu d̄i Ruma Hatalla pab̄uaku ndekena.

²Aina b̄atumu atora-atora dunia ake. Co'opu Ruma Hatalla kandad̄ina weki nggomi ndad̄i b̄ou, loakud̄u nggomid̄oho rungkamu weki. Ade ndedekaina nggomid̄oho maloaku b̄ade d̄i ne'e b̄a Ruma Hatalla — eded̄u au ma taho ro ma kasana wea ade-Na ro ma sampuruna.

³Ruma Hatalla wa'ura mbeina bareka d̄iru'u b̄a nahu. B̄ara ndedena nahu ngoa ra tei katahokaiku nggomid̄oho sara'ana: Aina iu wekimu ncewi ese rad̄i sapodakaina. Pab̄uapu nggomid̄oho nilai sarumbumu kai ka'awa weki; cua-cua nilai sarumbuna kai tenggo ra wale rambei b̄a Ruma Hatalla d̄i wekina b̄ara sia imbina d̄i Ruma Isa.

⁴ Sarumbu ndai nantau mboto anggota. Sanikina anggota wara cua-cua taki ra puta ndaina.

⁵Ndede rau lab̄o ndai. Konena ndai sara'ana mboto, pala ndai eded̄u sab̄ua sarumbu b̄ara ndai sab̄ua lab̄o Al Masih. Ro ndaita cua-cua ntau hubunga sab̄ua lab̄o ma sab̄uana kai anggota-anggota rad̄i sab̄ua sarumbu.

⁶ Ndai cua-cua ntau bareka d̄i karawi ru'u Ruma ma wati sama. Bareka-bareka ede rambei b̄a Ruma Hatalla d̄iru'u ndai kai b̄atu rahama-Na. B̄ara ndedena ndai pab̄uaku kanita bareka-bareka ede. Dou ma ntau bareka d̄imangoa ra kahaba haba ma ramai ta Ruma Hatalla, pab̄uaku kahabana haba rad̄i Ruma Hatalla ede kai b̄atu tenggo ra wale ma wara d̄i wekina.

⁷Dou ma ntau bareka d̄imabantu dou makalai, pab̄uaku poda-poda bantuna dou makalai. Dou ma ntau bareka d̄imatei, pab̄uaku poda-poda teina.

⁸Dou ma ntau bareka d̄imambei samanga d̄iru'u dou makalai, pab̄uaku poda-poda mbei samanga ede d̄iru'u dou makalai. Dou ma ratarima bareka d̄imambei d̄iru'u dou makalai rad̄i ntauna, pab̄uaku karawina ede kai ncera ra mbura adena ro aina kambou rero. Dou ma ratarima bareka d̄imana'ekai, pab̄uaku poda-poda ndad̄i dou mana'ekaina. Dou ma ntau bareka d̄i tei ro d̄i katadakaina kasi adena d̄i dou makalai, pab̄uaku karawina kai sana adena.

⁹Meci ra ca'upu kai ademu maraso. Ni'ikaipu ademu d̄imadab̄ae, ro nentipu d̄i au ma taho.

¹⁰Pab̄uapu cina ra angi cua meci angi d̄i sab̄ua lab̄o sab̄ua dou kai meci poda angi b̄une dou-dou ma ari lab̄o sa'e d̄i ade sab̄ua kaluarga, ro nggomid̄oho pab̄uapu cua ka'ulu weki mbei lia ra horoma.

¹¹Cahapu karawi, aina d̄aju. Karawipu d̄iru'u Ruma kai kapoda ade rad̄i Roh Allah.

¹²Pab̄uapu nggomid̄oho rahomu d̄i Ruma kai neo ademu, sabapu d̄i ade susa ra dawara, ro do'a ntuwupu.

¹³Bantu kancihipu d̄i paralu b̄a dou-dou ela Al Masih makalai rau ro weha aopu cina ra angi masama imbi rawati pata b̄a nggomid̄oho, kai ade mataho d̄i ade umamu.

¹⁴ Rahopu d̄i Ruma Hatalla loakud̄u Sia mbeina bareka d̄i dou-dou ma'ipi dab̄ae d̄i nggomid̄oho. Rahopu Ruma Hatalla mambei bareka d̄i siad̄oho, aina sumpamu.

¹⁵B̄atupu kad̄ihi ade lab̄o dou-dou ma kad̄ihi ade, ro nangipu lab̄o dou ma nangi.

¹⁶ Mori taho-tahopu sab̄ua lab̄o sab̄ua dou. Aina ese ade, pala kancihi ncaopu wekimu lab̄o dou-dou ma awa d̄iru'una. Aina wi'imu weki ncewi loamu rad̄i ma sapodakaina.

¹⁷Nggara dou makarawi madab̄ae d̄i wekimu, aina colamu kai iha ra dab̄ae. Karawipu au mataho d̄i nggahi b̄a samenana dou.

¹⁸D̄i ade wekimu, usaha sawa'u-wa'upu d̄i mori taho lab̄o samenana dou.

¹⁹ Cina ra angiku! Aina sakali-kali colamu iha ade, co'opu Ruma Hatallampa ma hukumna. B̄ara ade Alkitab ratunti ndake, ”Nahuku ma colana, Nahu d̄imahukumna, nggahi Ruma.”

²⁰ Pala nahid̄osi musumu, mbeipu sia ngaha; ro namangosi wo'ona, mbeipu sia nono. B̄ara kai karawimu b̄une ede, nggomid̄oho ndawimu sia ndad̄i maja.

²¹Aina co'o sarumbumu d̄i kakoa b̄a ma dab̄ae, pala pab̄uapu Nggomid̄oho kakoamu rawi madab̄ae kai rawimu mataho.