Read Bima ROMA 13 Bible Online

ROMA 13 - Bima bible

ROMA 13

¹Sanikina dou pab̄uaku to'ana d̄i pamarenta, b̄ara wati wara pamarenta ma wati raka kuasa rad̄i Ruma Hatalla. Ro pamarenta ma wara ake, kalampana kuasana kai parenta ma ramai ta Ruma Hatalla.

²B̄ara ndedena dou ma wati b̄atu nggahi pamarenta samampa lab̄o wati b̄atuna au rakatantukai b̄a Ruma Hatalla. Ro dou ma karawi ndede d̄imatarima hukuma.

³B̄ara, dou ma karawi mataho aina dahu d̄i pamarenta. Cuma dou ma karawi madab̄aempa ma pab̄ua dahu. Nggara mane'esi b̄a nggomid̄oho loakud̄u nggomid̄oho wati iumu dahu d̄i pamarenta, nggomid̄oho pab̄uapu karawimu mataho, ndad̄i nggomid̄oho d̄i roi ra wadi.

⁴B̄ara pamarenta eded̄u ada Ruma Hatalla ma karawi d̄i tahokaimu. Pala nggara nggomid̄oho karawimu madab̄ae, poda nggomid̄oho pab̄uapu dahu d̄i pamarenta ede, b̄ara wati lao ncauna sia ntauna kuasa d̄imahukumna dou. Sia eded̄u ada Ruma Hatalla, mab̄ab̄ukaina hukuma Ruma Hatalla d̄i dou-dou ma karawi madab̄ae.

⁵B̄ara ndedena nggomid̄oho pab̄uapu to'a d̄i pamarenta — lai mpoana b̄ara nggomid̄oho wati ne'emu d̄i hukum, pala b̄ara eli ade mpida raumu.

⁶ Ede rauku alasana b̄ab̄auku nggomid̄oho colakaimu bea, b̄ara pamarenta eded̄u mab̄ora d̄i Ruma Hatalla ma kalampana taki ra puta ma penti ake.

⁷Ndad̄i colapu d̄i pamarenta au ramad̄ipab̄ua colamu d̄i sia. Colapu bea, nggarasi nggomid̄oho pab̄uamu cola bea; ro colapu kalasi nggara nggomid̄oho pab̄uamu cola kalasi. Kantaupu co'i siad̄oho ma pab̄ua d̄i kaco'i ro lia ra horomapu siad̄oho ma pab̄ua d̄i lia ra horoma.

⁸Aina nconggomu au-au d̄i cou-cou rau, selasi nconggo meci ra ca'u angi d̄i sab̄ua lab̄o sab̄ua dou. B̄ara dou ma meci ra ca'u angi d̄i sasamana manusia, wa'ura kalampa sara'ana hukum Musa.

⁹ B̄ara hukum Taurat, eded̄u: Aina jina, aina hade dou, aina mpanga, aina ne'emu kantau au rantau dou makalai; sara'ana ede masama-sama lab̄o hukum ma kalai, wa'ura kandad̄i sab̄ua hukummpa, eded̄u, ”Meci ra ca'upu sasamamu manusia b̄une meci ra ca'umu sarumbu ndaimu.”

¹⁰Dou ma meci ra ca'u dou makalai, wati d̄imakarawi madab̄ae d̄i dou ede. Ndad̄i dou ma meci ra ca'u sasamana manusia eded̄u dou ma wa'ura kalampa samenana au rakaukai b̄a hukum agama.

¹¹Ari mai b̄a sara'ana ede nggomid̄oho mab̄adeku b̄a one wakatu ake eded̄u wakatu d̄iru'u b̄a nggomid̄oho d̄i tu'ukaimu rad̄i marumu. B̄ara wakatuna d̄iru'u ndaita d̄i kasalama nawa'ura ipi d̄eni wakatuna ake ntewi kaisi wakatu ndaita aipu b̄ou tampu'u imbita.

¹²Aimangad̄i ne'empara kalalo; ro samporo wali nab̄alara ai. Ndad̄i, tahora ndai d̄i dengga kai ruku ra rawi-ruku ra rawi madab̄ae. Ndai pab̄uaku kalengka weki ndai kai d̄aha mataroa.

¹³Ndai pab̄uaku karawi mataho b̄une rabiasakai karawi b̄a dou wakatu aimarai; aina ndiha ra ndano makalalo hampana, atao mawu. Aina karawi masampu ra nggele, atao ruku ra rawi mawati sopa, aina ncao lab̄o dou atao hiana ade.

¹⁴Co'opu Ruma Isa Al Masih ma katantuna auku d̄i pab̄ua karawi b̄a nggomid̄oho. Ro aina b̄atumu tabe'a manusia ma dosa d̄i kancihikaina hawa nawasuna.