Read Bima ROMA 14 Bible Online

ROMA 14 - Bima bible

ROMA 14

¹ Dou ma wati imbi poda d̄i au ra'imbina pab̄ua d̄i tarima kataho d̄i ade woha nggomid̄oho. Aina ncao lab̄omu sia mab̄oha ne'e ndaina.

²Wara dou ma ne'e ndaina b̄a one sia naloa ngaha au-au. Pala wara dou makalai ma mapu imbina; sia na'iuku b̄a weki ndaina b̄a one sia cuma naloa ngaha utambeca mpoa.

³Dou ma loa ngaha mena au-au aina wi'ikai awa dou ma dangahana; ro dou ma dangaha ra nono ede, ai rauna kancarana dou ma ngaha mena au-au, b̄ara Ruma Hatalla nawa'ura tarima sia.

⁴Cousi nggomid̄oho ndad̄ina nggomid̄oho pab̄uamu paresa ncihi ra ncara ada dou makalai? Nataho ada dou ede tu'u ra mbo'ona, ede eded̄u mantau urusana eded̄u rumana. Ro napoda ada dou ede d̄imakid̄i mpende, b̄ara Ruma nawa'uku ndawi sia d̄imakid̄i mpende.

⁵Wara dou ma iu sab̄ua ainaina ncewi penti d̄i ainaina-ainaina ma kalai, dou makalai rau manggahi b̄a one sara'a ainaina ede samampa. Co'opu cua-cua ndaina dou ede katantuna ne'e ndaina.

⁶Dou ma kapenti ainaina-ainaina rakatantuna, dou ede karawi ndedekaina d̄i lia ra horomakaina Ruma. Dou ma ngaha mena au-au ede, karawi ndedekaina d̄iru'u lia ra horomakaina Ruma, b̄ara sia nasyuku-ku d̄i Ruma Hatalla d̄i ngaha ra nono ede. Ndede rau lab̄o dou madangaha ngaha ra nono ede; dou ede rau nalia ra horomaku Ruma ro nasyuku-ku d̄i Ruma Hatalla.

⁷Wati wara kone sab̄ua dou rau d̄i weki ndai ake ma mori d̄i ru'u weki ndai kesena; ro wati kone sab̄ua dou d̄i weki ndai ma made d̄iru'u ndai kesena.

⁸Nggara ndai morita, ndai tamori d̄iru'u Ruma. Ro nggara ndaita made, ndai rau tamade d̄iru'u Ruma. Ndad̄i, mori atao made, ndai eded̄u ntau Ruma.

⁹Al Masih wa'ura made ro mori mbali. B̄ara ndedena Sia ndad̄ikaina Ruma d̄iru'u b̄a dou-dou ma mori, ro d̄iru'u b̄a dou-dou ma wa'ura made rau.

¹⁰ Ndad̄i, cina ra angi! D̄i'au kancara kai cina ra angimu masama-sama imbi? Ro d̄i au kai wi'ikaimu awa sia? Ndai sara'ana d̄imalao satando angi lab̄o Ruma Hatalla d̄i paresa ncihi ra ncarata.

¹¹ D̄i ade Alkitab ratunti, ”Sapoda-podakaina” nggahi Ruma, ”saniki-nikina dou d̄imanemba ro suju d̄i tando Nahu; ro sanikina dou namangaku b̄a one Nahuku Ruma Hatalla.”

¹²Ndad̄i cua-cua ndaita, pab̄uaku su'u ra tundu d̄i samenana ruku ra rawi ndai d̄i Ruma Hatalla.

¹³B̄ara ndedena aina ndai cua kancara angi. Pala usahapu loakud̄u nggomid̄oho wati karawimu au-au ma kandad̄i sab̄ua dou cina ra angimu masama-sama imbi b̄oha b̄a goda ro ndad̄i dosa.

¹⁴B̄ara nahu masab̄ua lab̄o Ruma Isa, ndad̄i nahu ka'imbi poda b̄a one wati wara kone sab̄ua ma aipu sarambana manajis; pala lampa rawi ede nanajis d̄iru'u b̄a sab̄ua-b̄ua dou, nggara dou ede nawi'ikaisi najis.

¹⁵Pala nggara kai au rangaha b̄a nggomid̄oho, sab̄ua dou cina ra angi ma sasama imbi ka'iha wea adena, ndad̄i nggomid̄oho wati walid̄u karawimu kai dasa meci ra ca'u. Nggara Al Masih nawa'ura made d̄iru'u b̄a sab̄ua-b̄ua dou, aina co'omu dou ede ka'iha b̄a au rangaha ra nono b̄a nggomid̄oho.

¹⁶B̄ara ndedena aina co'omu weki ndaimu kafitina b̄a dou b̄ara karawimu rawi'ikaimu tahona.

¹⁷B̄ara Karaja'an Allah laina nuntu ra nggahi mab̄oha ngaha ra nono, pala mab̄oha lampa rawi mancihi, ro taho ra ntai ro neo ade b̄a Roh Allah.

¹⁸Dou ma karawi wea d̄iru'u Al Masih kai ndede, dou ede nakasana weaku ade Ruma Hatalla, ro nakaco'iku b̄a dou-dou makalai.

¹⁹B̄ara ndedena d̄i ne'e b̄a ndai pab̄uaku ncau-ncauna d̄i ru'u b̄a lampa rawi ma kamaina taho angi ro cua-cua kawara angi.

²⁰Aina, b̄ara masa'ala ngaha ra nono, nggomid̄oho ka'ihamu au rawa'u karawi b̄a Ruma Hatalla. Samenana ngaha ra nono poda halal d̄i ngaha; pala nggara au rangaha b̄a nggomid̄oho makamaikai dosa dou makalai, ndad̄i nggomid̄oho mancara.

²¹Nancewi tahopu aina ngaha hi'i atao nono anggo atao karawi au-au nggara lampa rawi ede nakandad̄iku cina ra angita masama-sama imbi ndad̄i dosa.

²²Co'opu au ra'imbi b̄a nggomid̄oho ede, nggomid̄oho karawimu d̄i tando Ruma Hatalla mpoampa d̄iru'u b̄a ndai nggomid̄oho. Dou ma wati ntau alasa d̄i iukaina ncara d̄i au rawi'ikaina ncihi, dou ede sana poda adena.

²³Pala dou ma iu ncara ncua ade d̄i ngahana au-au, sawa'u b̄a ede ngaha rauna ngaha ra nono ede, dou ede kancara b̄a Ruma Hatalla; b̄ara dou ede wati karawina b̄une ra'imbikai b̄a ade ndaina mab̄oha au mancihi ra mancara. Ro au-au rakarawi kai wati wara imbi eded̄u dosa.