Read Bima ROMA 15 Bible Online

ROMA 15 - Bima bible

ROMA 15

¹Ndai ma poda-poda imbi d̄i au ra'imbi b̄a ndai, pab̄uaku saba d̄i daca'u b̄a dou ro ma mapu ra rome imbina. Aina ndai ne'e kasana sarumbu ndai kese mpoa.

²Pala ndai pab̄uaku cua-cua kasana wea ade sasama cina ra angi ndaita d̄i tahokaina, loakud̄u tamba tenggo imbina.

³ B̄ara Al Masih rau wati kananuna sana weki ndai kese-Na. D̄i ade Alkitab ratunti ndake, ”Samenana nggahi madab̄ae d̄i Ita nawa'ura mab̄u d̄i weki mada.”

⁴Samenana ratunti ade Alkitab eded̄u d̄imangoa ra tei ndaita. B̄ara tana'o ratarima b̄a ndai rad̄i Alkitab nakandad̄iku ndai lembo ade ro tenggo ndad̄ina ndai taloa ntau d̄i ne'eta d̄i Ruma Hatalla.

⁵Raho-raho to'impa Ruma Hatalla, ma mbei lembo ade ro sana d̄iru'u b̄a manusia, bantuna nggomid̄oho loakud̄u mori kasab̄ua ade, b̄atu conto Ruma Isa Al Masih.

⁶Kai sab̄ua ade nggomid̄oho sara'ana sama-sama loa roi ra wadi Ruma Hatalla, Ama Ruma ndaita Ruma Isa Al Masih.

⁷B̄ara ndedena pab̄uapu nggomid̄oho tarimamu sab̄ua lab̄o sab̄ua dou kai ade masana, sama b̄une Al Masih rau tarimana nggomid̄oho d̄imakad̄ese ra kantasa Ruma Hatalla.

⁸B̄ara, kawarapu, b̄a one Al Masih wa'ura karawi weana d̄i ru'u b̄a dou Yahudi d̄i katadakaina b̄a one Ruma Hatalla mato'a d̄i ade kancihina rasake-Na d̄i wa'i ra waro ndaita.

⁹ Ruma Isa rau kandad̄ina bangsa-bangsa makalai makad̄ese ra kantasa Ruma Hatalla b̄ara rahama Ruma Hatalla d̄i ru'u b̄a siad̄oho. D̄i ade Alkitab ratunti ndake, ”B̄ara ndedena mada d̄imaroi ra wadina Ita d̄i ade woha bangsa-bangsa, mada d̄imarawa wea roi ra wadi ngara Ita.”

¹⁰ Wara ratunti ndake rau, ”Kad̄ihipu ademu sama-sama lab̄o ela Ruma Hatalla ra kad̄ale, oe bangsa-bangsa!”

¹¹ Ro ake rau, ”Roi ra wadipu Ruma Hatalla, oe samenana bangsa, pab̄uapu samenana dou maroi ra wadi Sia!”

¹² Ro ake rau ranggahi b̄a Yesaya, ”Rad̄i londo ra mai la Isai d̄imawontu sab̄ua dou d̄imaparenta bangsa-bangsa; d̄i Siara bangsa-bangsa ede d̄i rahokaina.”

¹³Ruma Hatalla eded̄u hid̄i d̄i rahokai b̄a nggomid̄oho. Raho-raho to'impa Sia kangginina ade nggomid̄oho kai samenana d̄ihi ade ro taho ra ntai b̄ara nggomid̄oho ma'imbi d̄i Sia, loakud̄u kai kuasa Roh Allah nggomid̄oho manaha pamao d̄i Ruma Hatalla.

¹⁴Cina ra angiku! Nahu imbi poda b̄a one wara mboto poda lampa rawi ma taho d̄i nggomid̄oho. Nggomid̄oho rau mab̄ade sara'aku ro maloaku ngoa ra tei d̄i sab̄ua lab̄o sab̄ua dou rau.

¹⁵Pala mab̄oha lampa rawi-lampa rawi rapehe b̄a nahu akana, nahu mangoa katerana nggomid̄oho ade sura ake, b̄ara Ruma Hatalla nawa'ura mbei d̄i nahu taki ra puta ede.

¹⁶Sia wa'ura kandad̄ina nahu dou d̄imakarawi wea d̄iru'u Ruma Isa Al Masih d̄i nggadu d̄i bangsa-bangsa ma laina Yahudi. Ro nahu mandad̄i imam, ma kahabana Haba Mataho rad̄i Ruma Hatalla, loakud̄u dou-dou ma laina Yahudi mandad̄i sab̄ua d̄onggo ra mbei d̄iru'u Ruma Hatalla ma loa d̄i tarima b̄a Sia. Raho-raho to'impa Roh Allah kandad̄ina siad̄oho ndad̄i sab̄ua d̄onggo ra mbei d̄iru'u Ruma Hatalla mpoampa.

¹⁷Ndad̄i, b̄ara nahu wa'ura sab̄ua lab̄o Ruma Isa Al Masih, ndad̄i nahu loa bangga d̄i ade karawiku d̄iru'u Ruma Hatalla.

¹⁸Nahu disakaiku nggahi ndede cuma mab̄oha au rawa'u karawi b̄a Al Masih kai ncai nahu d̄imakandad̄ina dou-dou ma laina Yahudi to'a d̄i Ruma Hatalla. Nahu karawikaiku ede kai nggahi ra eli lab̄o karawi,

¹⁹ma dampi b̄a lampa rawi mab̄isa ra guna ro lampa rawi-lampa rawi maheba poda; samenana ede b̄a kuasa Roh Allah. Haba Mataho mab̄oha Al Masih wa'ura ngoa ra kahaba sara'a b̄a nahu d̄i dou-dou, tampu'u aka Yerusalem sampe aka Ilirikum.

²⁰Ne'e b̄a nahu eded̄u ngoa ra kahaba Haba Mataho ma ramai ta Ruma Hatalla d̄i hid̄i-hid̄i tab̄era watipu ringakai b̄a dou mab̄oha Al Masih. B̄ara nahu wati ne'eku tu'u karawi d̄i dasa ratoho b̄a dou makalai.

²¹ D̄i ade Alkitab ratunti, ”Dou-dou ma watipu iu tarima haba mab̄oha Sia, d̄ima'eda; ro siad̄oho ma watipu iu ringa, d̄imaloa ka'ao.”

²² B̄ara ndedena nahu wa'ura ntuwu wara madompona ne'eku mai lamba nggomid̄oho.

²³Pala ake karawi nahu d̄i dana ra rasa ede wa'ura nggori. Pila-pila mba'a ntoina nahu ne'eku mai lamba nggomid̄oho.

²⁴Pea nggara nahu lampa saiku kotamu d̄i ade lampa ra laokai nahu lao aka Spanyol, ne'e b̄a nahu loa to'i eda angi lab̄o nggomid̄oho ro kad̄ihi ade samporo lab̄o nggomid̄oho. Sawa'u b̄a ede nahu rahoku d̄i nggomid̄oho loamu bantu nahu ade lampa ra laokai nahu aka Spanyol ede.

²⁵ Pala wakatu ake nahu kane'e lao aka Yerusalem d̄imawa'a wea ngaha ra nono ro kani ra lombo d̄iru'u ela Ruma Hatalla ta aka.

²⁶B̄ara ela Ruma d̄i Makedonia ro Akhaya wa'ura ngawana d̄imambei sumbanga d̄iru'u cina ra angi ma ncoki mori d̄i woha ela Ruma Hatalla d̄i Yerusalem.

²⁷ Kai ade masana siad̄oho karawina ede. Io romo siad̄oho patu d̄imabantu d̄iru'u cina ra angi mancoki mori d̄i Yerusalem ede; b̄ara rad̄i dou-dou Yahudiku dou-dou malaina Yahudi ede wa'ura tarimana bareka-bareka d̄i Ruma Hatalla. Ndad̄i, dou-dou malaina Yahudi ede patu rau d̄imabantu dou-dou Yahudi kai bareka-bareka mantau pahu.

²⁸Nggara nahu wa'ura kanggoriku taki ra puta ake, ro d̄onggoku d̄i siad̄oho ma d̄i Yerusalem ede sumbanga rawa'u kab̄oro ede, ndad̄i nahu d̄imalao aka dana Spanyol lampa sai kota nggomid̄oho.

²⁹Nggara maisi nahu d̄i nggomid̄oho, pasti nahu maiku ro mboto bareka rad̄i Al Masih d̄iru'u b̄a nggomid̄oho.

³⁰Kai ngara Ruma ndaita Isa Al Masih, ro kai meci ra ca'u rambei b̄a Roh Allah, nahu maraho poda d̄i nggomid̄oho, raho-raho to'impa nggomid̄oho b̄atu do'a kapoda ade sama-sama lab̄o nahu d̄i Ruma Hatalla d̄iru'u b̄a nahu.

³¹Do'apu loakud̄u Ruma Hatalla horina nahu rad̄i rima dou-dou ma wati imbi d̄i Yudea, ro loakud̄u taki ra puta nahu d̄i mawa'a sumbanga aka Yerusalem d̄i tarimana kai ade masana b̄a ela Ruma Hatalla ta aka.

³²Ade ndedekaina, nggara kane'esi b̄a Ruma Hatalla, nahu kaloa mai d̄i nggomid̄oho kai ade masana. Ro nahu d̄ima'iu d̄ihi ade d̄i woha nggomid̄oho.

³³Raho-raho to'impa Ruma Hatalla, ma mbei taho ra ntai d̄i manusia, mad̄ende rawa'a nggomid̄oho sara'ana. Amin.