Read Bima ROMA 16 Bible Online

ROMA 16 - Bima bible

ROMA 16

¹Nahu mane'e kapata d̄i nggomid̄oho amancawa ndaita, la Febe. Sia mabantu ela Ruma d̄i Kengkrea.

²Tarimapu sia kai sab̄ua dou d̄i ade weki ela Ruma. Poda ndede romoku dou-dou ma imbi d̄i Ruma Hatalla pab̄uaku tarimana sab̄ua lab̄o sab̄ua dou. Bantupu sia, nggara naparalusi b̄a sia bantu b̄a nggomid̄oho, b̄ara ndai sia nawa'ura bantu mboto dou — nahu rau bantu b̄a sia.

³ Karongga to'ipu salam nahu d̄i la Priskila ro la Akwila, lenga-lenga nahu ma sama-sama makarawi ru'u Ruma Isa Al Masih.

⁴Siad̄oho d̄i sato'i damadekaina b̄ara ne'ena kasalama nahu. Nahu matarima kasi d̄i siad̄oho — ro laina nahu mpoa, pala sara'a ela Ruma bangsa makalai ma laina Yahudi rau matarima kasi d̄i siad̄oho.

⁵Karongga to'i raupu salam nahu d̄iru'u b̄a ela Ruma ma kab̄oro weki d̄i uma siad̄oho. Salam d̄iru'u la Epenetus rameci ra ca'u b̄a nahu. Sia eded̄u dou ma sarambakaina imbi d̄i Al Masih d̄i propinsi Asia.

⁶Salam nahu rau d̄iru'u la Maria. Sia nawa'ura karawi kapodana ade d̄iru'u b̄a nggomid̄oho.

⁷Karongga to'i raupu salam nahu d̄iru'u la Andronikus ro Yunias. Siad̄oho sama suku bangsana lab̄o nahu ro wa'ura iu lu'u bui sama-sama lab̄o nahu. Sawatipu nahu imbiku d̄i Al Masih, siad̄oho wa'ura ulu imbina. Siad̄oho nawancuku mbouna d̄i ade woha sara'a rasu.

⁸Salam d̄iru'u la Ampliatus, rameci ra ca'u b̄a nahu b̄ara sia sama-sama lab̄o nahu wa'ura sab̄ua lab̄o Ruma.

⁹Karongga to'ipu salam do'a nahu d̄i Urbanus, lenga ndai ma karawi sama-sama lab̄o ndai d̄iru'u Al Masih. Salam do'a nahu rau d̄iru'u Stakhis rameci ra ca'u b̄a nahu.

¹⁰Salam d̄iru'u la Apeles. To'ana d̄i Al Masih wa'ura wara bukutina. Salam rau d̄iru'u kaluarga Aristobulus,

¹¹ro d̄iru'u la Herodion. Sia sama suku bangsana lab̄o nahu. Ro salam rau d̄iru'u cina ra angi masama imbita ade kaluarga la Narkisus.

¹²Salam nahu d̄iru'u la Trifena ro la Trifosa ma karawi kapoda ade d̄iru'u Ruma, ro d̄iru'u la Persis rameci ra ca'u b̄a nahu. Sia rau wa'ura karawi kapodana ade d̄iru'u Ruma.

¹³ Salam d̄iru'u la Rufus ro inana, d̄iru'u b̄a nahu b̄une ina ndai nahu. La Rufus dou ma taho eded̄u dou rakad̄ale b̄a Ruma.

¹⁴Karonggapu salam nahu d̄iru'u la Asinkritus, la Flegon, la Hermes, la Patrobas, la Hermas ro sara'ana cina ra angi masama imbi lab̄o siad̄oho.

¹⁵Salam d̄iru'u la Filologus ro la Yulia; d̄iru'u la Nereus ro amancawana; d̄i la Olimpas ro d̄iru'u samenana dou ma'imbi ma sama-sama lab̄o siad̄oho.

¹⁶Cua-cua salam meci angimu b̄une sa'e ra ari masama imbi d̄i Ruma Isa Al Masih. Sara'a ela Al Masih makarongga salam siad̄oho d̄iru'u nggomid̄oho.

¹⁷Cina ra angi! Nahu maraho poda: Aina kabare d̄i dou-dou makamaina ncengga ra mbi'a ro makakacona imbi dou d̄i Ruma. Lampa rawi ede wati ncihi ncaona lab̄o au rawa'u tei d̄i nggomid̄oho. Kad̄o'o lab̄opu wekimu d̄i dou-dou b̄une ede.

¹⁸B̄ara dou-dou ma karawi b̄une ede laina karawi d̄iru'u Al Masih Ruma ndaita, malaisi d̄i kamantakaina ade ndai siad̄oho. Kai siwi ro nggahi ra eli ma caru, siad̄oho tipuna dou-dou ma wati b̄ade au-au.

¹⁹Samenana dou nawa'ura b̄ade b̄a one nggomid̄oho mato'a d̄i ngoa ra tei mab̄oha Haba Mataho rad̄i Ruma Hatalla. Ro nahu neo adeku d̄i lampa rawi ede mab̄oha nggomid̄oho. Nahu ne'eku loakud̄u nggomid̄oho loamu timba ra lemba mab̄oha lampa rawi ma taho, ro sampulamu mab̄oha lampa rawi ma dab̄a'e.

²⁰Ruma Hatalla ma mbei taho ra ntai d̄iru'u manusia, d̄imaroci wi'ina Ibilis ta awa mai b̄a kuasamu ro makalelina. Raho-raho to'impa nggomid̄oho mbei ntuwu bareka b̄a Isa Al Masih Ruma ndaita!

²¹ Timotius, lenga nahu, karonggana salam d̄iru'u nggomid̄oho. Ndede rauja la Lukius, la Yason ro la Sosipater, ma sama suku bangsa lab̄o nahu.

²²Ma tuntina sura ake eded̄u nahu, Tertius. Nahu makaronggana salam kai sa'e ra ari d̄iru'u nggomid̄oho.

²³ La Gayus manggadu salam d̄iru'u nggomid̄oho. Nahu ronggaku d̄i umana ro ela Ruma nami masambea rau ta ede. Erastus mabendahara kota, manggadu salam d̄i nggomid̄oho. Ndede rau cina ndai la Kwartus. [

²⁴Raho-raho to'impa Ruma ndai Ruma Isa Al Masih mbeina bareka d̄i nggomid̄oho sara'ana. Amin.]

²⁵D̄ese ra ntasa Ruma Hatalla! Sia mantau kuasa makatenggona imbi nggomid̄oho ncihi ncao lab̄o Haba Mataho ma ramai ta Ruma Hatalla rangoa ra kahaba b̄a nahu mab̄oha Ruma Isa Al Masih. Nahu ngoa ra kahabaku, haba ede ma ncihi ncao lab̄o au rakatada b̄a Ruma Hatalla; eded̄u mab̄oha nia Ruma Hatalla ma wa'ura ratu-ratu mba'a ntoina wati b̄ade b̄a dou.

²⁶Pala ake, kai raparenta b̄a Ruma Hatalla ma ederahid̄i, nia ede wa'ura katada ro d̄i ngoa d̄i samenana bangsa kai ratunti b̄a nabi-nabi, loakud̄u siad̄oho sara'a imbi ro to'ana d̄i Ruma Hatalla.

²⁷Siaku Ruma Hatalla makese-kese weki-Na, Sia nawancuku loa timba ra lembana. Raho-raho to'impa Sia d̄i kad̄ese ra kantasa santoi-ntoina kai ncai Ruma Isa Al Masih! Amin. Salam do'a nami, Paulus, ada Ruma Isa Al Masih