Read Bima ROMA 3 Bible Online

ROMA 3 - Bima bible

ROMA 3

¹Nggara ndedesi, aujaku ncewina ndad̄i dou Yahudi? Ro auku onena b̄atu atora suna?

²Tantu mboto onena! Saramba-rambana, b̄ara d̄i dou Yahudi edeku Ruma Hatalla d̄i imbikaina nggahi ra eli Ruma Hatalla.

³Pala b̄uneku nggara sarundena dou Yahudi wati to'ana? Sab̄ua b̄ara ede Ruma Hatalla ndad̄i wati to'a?

⁴ Tantu wati! B̄ara natada Ruma Hatalla nancihi ncau, konena sanikina dou macowa. Ade Alkitab ratunti, ”Pab̄uaku nggomi wara bukutimu d̄i ade au rarentamu, ro nggomi ngolumu d̄i wakatu d̄iparesa ncihi ra ncara nggomi.”

⁵Pala nggara adi Ruma Hatalla ndad̄i naha tada, b̄ara karawi ndaita mawati ncihi, auku d̄i ne'e nggahi b̄a ndaita? B̄a one Ruma Hatalla wati adi nggara nahukumsi b̄a Sia ndaita? (Poda rasod̄i b̄une ake biasampa kai manusia kaina.)

⁶Sakali-kali wati! B̄ara nggara Ruma Hatalla watisi adina, b̄uneku Sia loakaina paresa ncihi ra ncara dunia ake?

⁷Pala nggara b̄ara rawi ma wati ncihi, au ma ncihi ra poda mab̄oha Ruma Hatalla nanaha tada ndad̄ina Sia d̄i roi, b̄ab̄auku dou ma karawi madab̄ae ede mbuipu d̄i kancara kai dou madosa?

⁸Ro b̄ab̄auku ndai watikai loa tanggahi, ”Tahora ndai takarawimpa madab̄ae loakud̄u wontu mataho?” Wara romo dou-dou ma kab̄awa ra katuna nahu kai nggahina b̄a one nahu wa'ura nggahi ndedeku. Dou-dou b̄une ede biasampa d̄ihukum b̄a Ruma Hatalla.

⁹Sab̄ua ka'ada'ana ndaita kai dou Yahudi nancewi taho ntewi kaisi ka'ada'ana dou bangsa makalai? Sakali-kali wati! Wa'ura nggahi b̄a nahu nataho dou Yahudi ro dou bangsa makalai, sara'ana wa'ura kuasakai b̄a dosa.

¹⁰ B̄une ratunti ade Alkitab, ”Wati kone sab̄ua dou rau ma ncihi,

¹¹wati wara kone sab̄ua dou ma loa ka'ao ro wati wara kone sab̄ua dou rau ma nemba Ruma Hatalla.

¹²Sara'ana dou nawa'ura kad̄o'o weki d̄i Ruma Hatalla; sara'ana nawa'ura santuda. Wati wara kone sab̄ua dou rau makarawi ma taho; kone sab̄ua dou rau wati!

¹³ Karoto siad̄oho b̄une santika rade ma hengga weki. Renta kukukeko malosa rad̄i rera siad̄oho, ro wiwi siad̄oho nakalosaku fitina, b̄une racu sawa.

¹⁴ Asa siad̄oho b̄ini b̄a sumpa ma'iha ro b̄ini b̄a nggahi mapa'i ra piri.

¹⁵ Langga siad̄oho naroci nggara nane'esi kancoki ra hade dou.

¹⁶Lelikai ro susakai, d̄i pari b̄a siad̄oho tab̄eb̄e.

¹⁷Siad̄oho nambuda d̄i ncai mataho ra ntika,

¹⁸ ro wati lia ra horomana Ruma Hatalla.”

¹⁹Ake ndai tab̄adera b̄a one samenana ratunti ade hukum Taurat, eded̄u d̄iru'u b̄a dou-dou ma wara ade parentakai b̄a hukum ede. Ade ndedekaina wati wara kone sab̄ua dou rau maloa mbei alasa au-au wali ro sara'a dunia loa d̄i da'awa b̄a Ruma Hatalla.

²⁰ B̄ara wati wara kone sab̄ua dou rau ma d̄ikancihi d̄itando Ruma Hatalla b̄a one dou ede karawina lampa rawi ma wara ade Hukum Taurat. Sapodakaina hukum ede cuma turu teina d̄i manusia b̄a one manusia madosa.

²¹Pala ake Ruma Hatalla wa'ura teina ncai b̄uneku manusia loakaina taho mbali lab̄o Sia; ro carana ede wati d̄iki angina lab̄o hukum Taurat. Buku-buku Musa ro buku-buku nabi-nabi edeku makatadana lampa rawi ede,

²² b̄a one Ruma Hatalla makaloana manusia taho mbali lab̄o Sia, cuma nggara manusia imbina d̄i Ruma Isa Al Masih. Ruma Hatalla karawina ndakekaina d̄iru'u b̄a samenana manusia ma imbi d̄i Al Masih; b̄ara wati wara laina:

²³Samenana dou wa'ura dosa ro d̄o'o rad̄i Ruma Hatalla ma ne'e mbei salama siad̄oho.

²⁴Cuma b̄ara anugera Ruma Hatalla rambei mpoana, hubunga manusia lab̄o Ruma Hatalla d̄ikancihi; carana eded̄u: manusia rahori kalosa rad̄i dosa b̄a Ruma Isa Al Masih.

²⁵Ruma Hatalla nggaduna Ruma Isa Al Masih d̄imatangguna hukuma dosa ndaita ro d̄imakanggori mbani Ruma Hatalla d̄i ndaita. Ra'a Al Masih ro imbi ndaita rakani-Na kai ncai d̄i horikaina ndai rad̄i mbani-Na. Kai ncai ake Sia karawina ma'adi poda. Sia wati hukumna siad̄oho madosa d̄i jamana ma ulu, b̄a one Sia mangena wakatuna mai kai Al Masih ro d̄imafurana dosa siad̄oho.

²⁶Pala ake Sia nahukumku dosa dib̄ukutikaina b̄a one Sia adi. Kai cara ede Sia natei katadaku b̄a one weki ndai-Na mancihi; ro Sia kancihina d̄i sanikina dou ma imbi d̄i Ruma Isa, Sia manggahi b̄a one dou ede wati wara ncarana d̄i tando Ruma Hatalla.

²⁷B̄ara ndedena wati wara walina alasa ru'u ndaita d̄i kabangga-banggakai weki. B̄ab̄auku ndedekaina? Sab̄ua b̄a one ndai kalampata ratunti ade Hukum Taurat? Laina. Pala b̄ara imbita.

²⁸B̄ara nggahi cumpukaina eded̄u ndake: B̄ara imbina dou kancihi d̄i tando b̄a Ruma Hatalla, laina b̄ara karawi b̄a sia au ratunti ade Hukum Taurat, malaisi b̄ara sia imbina d̄i Ruma Isa Al Masih.

²⁹Atao Ruma Hatalla ede Ruma Hatalla dou Yahudi mpoampa? Sab̄ua Sia laina Ruma Hatalla bangsa makalai rau? Io romo Sia Ruma Hatalla bangsa makalai rau!

³⁰ B̄ara Ruma Hatalla cuma sab̄uampa. Siara ma kaloana dou-dou mawa'ura suna taho mbalina lab̄o Ruma Hatalla b̄ara siad̄oho imbina. Ro Sia rauku makaloana dou-dou bangsa makalai taho mbali lab̄o Ruma Hatalla; ede rau b̄ara siad̄oho imbina.

³¹Sab̄ua ake aona b̄ara ndai imbita d̄i Al Masih, paki b̄a ndaita hukum Taurat? Sama sakali wati! B̄ara kai imbi b̄a ndaita ede, kaco'i b̄a ndai hukum ede.