Read Bima ROMA 5 Bible Online

ROMA 5 - Bima bible

ROMA 5

¹Ake ndai wa'ura kancihi b̄ara imbita. Ro b̄ara ndedena ndai morita d̄i ade dame lab̄o Ruma Hatalla kai ncai Ruma ndai Isa Al Masih.

²B̄ara ndai imbita d̄i Ruma Isa, ndad̄i Sia nakaloaku ndaita ma'iu meci ra ca'u b̄a Ruma Hatalla, ro kai meci ra ca'u ndad̄ina ndaita mori ake. B̄ara ndedena ndai neo adeta, b̄ara ndaita ntau kane'e b̄ara ndaita d̄ima'iu d̄ese ra ntasa Ruma Hatalla!

³Ro ari mai b̄a ede, ndai rau neo adeta d̄i ade susa ra ncoki, b̄ara ndai tab̄adeku d̄i ade susa ra ncoki nakandad̄iku dou ndad̄i caha,

⁴ro d̄i ade caha ede nakandad̄iku dou taha uji; akeku d̄imakawokona rakane'emu.

⁵Rane'emu b̄une ake wati d̄imakato'i wea ade ndaita, b̄a one ade ndaita wa'ura kanggini b̄a Ruma Hatalla kai meci ra ca'u-Na. Ruma Hatalla karawina ede kai ncai b̄a Roh-Na, nawa'ura mbeina d̄i ndaita.

⁶Wakatu ndaita ade ka'ada'ana wati poda wa'uta, Al Masih made d̄iru'u ndaita d̄i wakatu ma ncihi ncao rakatantu b̄a Ruma Hatalla; sapodakaina ndaita eded̄u dou-dou ma d̄o'o rad̄i Ruma Hatalla.

⁷D̄iru'u sab̄ua dou ma adi rau nanggonggiku dou mane'e made. Kombi d̄iru'u sab̄ua-b̄ua dou ma taho, wara rau dou ma disa made.

⁸Pala Ruma Hatalla katadana meci ra ca'u-Na ma na'e d̄i ndaita wakatu Al Masih madena d̄iru'u ndaita aipu wakatu ndaita mbuipu dou madosa.

⁹Ake ndaita wa'ura taho mbali lab̄o Ruma Hatalla kai ncai mboho ra'a Al Masih; b̄ara ndedena pasti ndai d̄i kasalama rauna rad̄i mbanikai Ruma Hatalla b̄a Al Masih.

¹⁰Nggara aipu wakatu ndaita musu angi lab̄o Ruma Hatalla, ndai kadame mbali lab̄o Sia kai ncai made Ana-Na, au walipu ake sawa'u b̄a ndapo angi ndaita wa'ura taho mbali lab̄o Ruma Hatalla, tantu ndaita d̄i kasalama rauna kai ncai mori Al Masih.

¹¹Ro ncewi ari mai b̄a ede, ndai neo ade rau kai tahona Ruma Hatalla d̄i ade Ruma ndaita Isa Al Masih. B̄ara kai Al Masih, ndaita ake ta'iuku ndapo angi ndaita ma taho ede lab̄o Ruma Hatalla.

¹² Dosa lu'una ade dunia kai ncai sab̄ua dou, ro rad̄i dosa ede wontuna made. Ndad̄ina, made ede nanggete d̄i samenana ela manusia, b̄ara sara'ana dou wa'ura dosa.

¹³Sawatipu b̄a hukum Taurat rambei, dosa wa'ura wara d̄i ade dunia. Pala dosa wati d̄i da'awa, b̄ara wati wara hukum ma loa d̄i sapa.

¹⁴Pala, tampu'u aipu jamana Adam sampe d̄i jamana Musa, made nakuasa d̄i samenana ela manusia. Mala dou-dou ma wati wara sapa kai cara ma sama b̄une rakarawi b̄a Adam, dou-dou ede b̄oha rau d̄i kuasakai b̄a made. Adam eded̄u gambara Sia d̄imamai kento.

¹⁵Pala d̄uana ede wati samana; b̄ara ncewi na'epu anugera b̄a Ruma Hatalla nggara ntewi kaisi rawi rasapa b̄a Adam. Rawi ra sapa b̄a sab̄ua dou kandad̄ina mboto dou mamade. Nawancuku ncewi na'e walina ndad̄ina meci ra ca'u rambei b̄a Ruma Hatalla ro hadia salamakai rambei-Na d̄iru'u b̄a ndede mboto dou, kai ncai tahona ade sab̄ua Dou, eded̄u Ruma Isa Al Masih.

¹⁶Rambei b̄a Ruma Hatalla rau nawancuku ncewi na'ena ntewi kaisi dosa dou ma sab̄ua ede. B̄ara sawa'u b̄a sab̄ua dou karawina rasapana ede, losa lalo penghakimana, ”Ncara rawi”. Pala sawa'u b̄a mboto dou makarawi dosa maira rambei b̄a Ruma Hatalla ma katadana, ”Wati wara ncara”.

¹⁷B̄ara rawi rasapa b̄a sab̄ua dou, made nanggete tab̄e-b̄e kai ncai sab̄ua dou ede. Nawancuku ncewi na'e wali ndad̄ina au rakarawi b̄a sab̄ua dou ma kalai, eded̄u Ruma Isa Al Masih. Kai ncai Sia, Ruma Hatalla naluaku anugera-Na d̄iru'u b̄a dou mamboto, ro kai mbei mpoana kaloana siad̄oho taho mbali lab̄o Ruma Hatalla; siad̄oho d̄imakuasa d̄i dunia ake kai ncai Al Masih.

¹⁸Ndad̄i, b̄une santika rawi rasapa b̄a sab̄ua dou, ndad̄ikaina samenana manusia d̄i hukum, ndede rau rakarawi b̄a sab̄ua dou ma b̄atu kane'e Ruma Hatalla, ndad̄ikaina samenana dou d̄i kaloa hori kalosa rad̄i hukuma-Na ro d̄i raka mori.

¹⁹Ro b̄une santika mboto dou mandad̄i dou madosa b̄ara sab̄ua dou mawati to'a, ndede rau kaloana dou mamboto d̄imataho mbali lab̄o Ruma Hatalla b̄ara sab̄ua dou mato'a d̄i Ruma Hatalla.

²⁰Ma rambei hukum Taurat eded̄u ndai Ruma Hatalla. Pala nanaha usaha b̄a manusia d̄i to'a kai hukum ede, nanaha sapa b̄a siad̄oho ro nadosa d̄i Ruma Hatalla. Pala nanaha karawi dosa manusia, Ruma Hatalla nanaha meci ra ca'una siad̄oho.

²¹Ndaita pab̄ua made b̄ara ndai karawita dosa. Pala Ruma Hatalla nameci ra ca'uku ndaita ro nambeiku ncai d̄i ndaita d̄imataho mbali lab̄o Sia. Ro b̄ara hubunga ndaita lab̄o Ruma Hatalla wa'ura taho mbali, Sia mbei rauna mori masapodakaina ro ma'ederahid̄i d̄iru'u ndaita kai ncai Ruma Isa Al Masih, Ruma ndaita.