Read Bima ROMA 6 Bible Online

ROMA 6 - Bima bible

ROMA 6

¹Nggara ndedesi, auku d̄i loa nggahi b̄a ndaita? Sab̄ua pab̄uaku ndai karawi ncauku dosa loakud̄u Ruma Hatalla nanaha meci ra ca'una ndaita?

²Tantu wati! Dosa watid̄u kuasa walina d̄i ndaita, ndad̄i, b̄uneku loa ndaita mori ncau-ncau lab̄o karawi dosa?

³Sab̄ua mab̄ade b̄a nggomid̄oho b̄a one wakatu ndai imbita ndai kandeu karaso d̄i ade Ruma Isa Al Masih? Ake aona ndaita d̄i kasab̄ua lab̄o made-Na.

⁴ Kai imbi ede, ndaita ra'umbu sama lab̄o Al Masih ro made sama-sama lab̄o Sia, loakud̄u b̄une Al Masih rakamori mbali rad̄i madena b̄a kuasa Ama ma d̄ese ra ntasa; ndede rau ndai loata kalampa mori ma b̄ou.

⁵Nggara ndai wa'ura ndad̄i sab̄ua lab̄o Al Masih, b̄ara ndai b̄atu made sama-sama lab̄o Sia, ndai d̄imandad̄i sab̄ua lab̄o Sia rau b̄ara ndai b̄atuta rakamori mbali b̄une Sia.

⁶Ndaita b̄adeku b̄a one tabe'a ndai ma ntoi kai manusia kaita wa'ura made sama-sama lab̄o Al Masih aka haju salib loakud̄u kuasa tabe'a ndaita ma dosa ede d̄i kaleli; ade ndedekaina ndaita watid̄u ka'ada b̄a dosa wali.

⁷B̄ara nggara sab̄ua-b̄ua dou mamade, dou ede d̄i hori kalosa rad̄i kuasa dosa.

⁸Nggara ndai wa'ura made sama-sama lab̄o Al Masih, ndai ta'imbiku b̄a one ndai rau d̄imamori sama-sama lab̄o Sia.

⁹B̄ara ndaita b̄adeku b̄a one Al Masih wa'ura kamori mbali rad̄i madena ro Sia wati d̄imamade wali; made watid̄u ntauna kuasa wali d̄i weki-Na.

¹⁰Made ra'iu b̄a Al Masih eded̄u made d̄i dosa. Ede ndad̄ina cuma sakalimpa d̄iru'u santoi-ntoina. Ro mori rakalampa-Na wakatu ake eded̄u mori d̄iru'u Ruma Hatalla.

¹¹Nggomid̄oho pab̄uapu wi'ikai wekimu made rad̄i dosa, pala mori ade hubunga ma rapu lab̄o Ruma Hatalla kai ncai Ruma Isa Al Masih.

¹²Ai walina co'omu dosa makuasakai morimu ma samporo ede b̄ab̄ai b̄a nggomid̄oho b̄atumu kane'ekaimu ma dab̄ae.

¹³Ai rauna nggomid̄oho d̄onggomu anggota sarumbumu d̄ikuasakai b̄a dosa ru'u d̄i karawikai kane'emu ma dab̄ae. Pala d̄onggopu wekimu d̄i Ruma Hatalla kai dou rawa'u peso rad̄i made mai d̄i mori. D̄onggopu sara'a sarumbumu d̄i Ruma Hatalla loakud̄u d̄i kani d̄imakarawi rakane'ekai b̄a Ruma Hatalla.

¹⁴Dosa wati loana kuasakai d̄i nggomid̄oho, b̄ara nggomid̄oho watid̄u morimu d̄i ade hukum Taurat pala d̄i ade rahama Ruma Hatalla.

¹⁵Ake, b̄uneku nggahi cumpukaina? Sab̄ua loaku ndai karawi dosa, b̄ara ndai watid̄u d̄i ade kuasa hukum Taurat, malaisi d̄i ade kuasa rahama Ruma Hatalla? Sakali-kali wati!

¹⁶Sab̄ua mab̄ade b̄a nggomid̄oho b̄a one nggara nggomid̄oho d̄onggomu sarumbumu d̄i sab̄ua-b̄ua dou d̄imakarawi au rane'ena ndad̄i nggomid̄oho eded̄u ada dou rato'akai b̄a nggomid̄oho ede — kombisi ada dosa ma wa'a nggomid̄oho aka made, atao ada ma to'a d̄i Ruma Hatalla, ro ade ndedekaina taho mbalina lab̄o Ruma Hatalla.

¹⁷Pala syuku d̄i Ruma Hatalla! B̄ara ntoina nggomid̄oho ndad̄imu ada dosa, pala ake nggomid̄oho kai kapoda ademu to'a d̄i ngoa ra tei mancihi rawa'u mbei d̄iru'umu.

¹⁸Nggomid̄oho wa'ura hori kalosa rad̄i dosa, ro ake ndad̄i ada d̄iru'u kane'e Ruma Hatalla.

¹⁹B̄ara kananumu na'ipiku mapuna, nahu makani conto-conto ka'ada b̄a dosa lokud̄u namod̄aku d̄i loa ka'ao b̄a nggomid̄oho. Ntoina nggomid̄oho d̄onggomu sara'a sarumbumu kai ada d̄iru'u lampa rawi-lampa rawi ma sampu ro ma dab̄ae d̄iru'u b̄a au rakane'emu ma dab̄ae. Ndede rau ake, pab̄uapu nggomid̄oho d̄onggo sara'a sarumbumu kai ada d̄iru'u b̄a kane'e Ruma Hatalla, ru'u b̄a kane'e Ruma Hatalla ma kalai ndaina.

²⁰Wakatu nggomid̄oho raka'ada b̄a dosa, nggomid̄oho wati ra kuasakai b̄a kane'e Ruma Hatalla.

²¹Aipu wakatu ede auku labamu ratarima b̄a nggomid̄oho ade lampa rawi-lampa rawi ma wakatu ake nggomid̄oho mamajaku d̄imakarawi? Ruku ra rawi-ruku ra rawi ede cuma d̄imawa'a madempa!

²²Pala ake nggomid̄oho wa'ura hori kalosa wea rad̄i dosa, ro mandad̄i ada Ruma Hatalla. D̄irakamu laba eded̄u nggomid̄oho d̄ikaraso wea b̄ara ndedena d̄imaraka mori masapodakaina ro ma'ederahid̄i.

²³B̄ara ufa dosa eded̄u made; pala anugera Ruma Hatalla eded̄u mori masapodakaina ro ma'ederahid̄i d̄i ade Ruma Isa Al Masih.