Read Bima ROMA 7 Bible Online

ROMA 7 - Bima bible

ROMA 7

¹Cina ra angi! Nggomid̄oho sara'ana wa'ura patamu hukum. Ndad̄i, nggomid̄oho mab̄adeku b̄a one kuasana hukum d̄i sab̄ua-b̄ua dou, nab̄ohaku cuma sa'umu mori dou ede.

²Sab̄ua dou siwe ma ntau rahi, contona, nad̄ikiku b̄a hukum d̄i rahina pala sa'umu mori rahina. Nggara nawa'usi made rahina, weina ede hori weki d̄i hukum ma d̄ikina d̄i rahina ede.

³Nggara dou siwe ede mori samana lab̄o mone ma kalai wakatu mbuipu mori rahina, ndad̄i dou siwe ede d̄ipehekai najina. Pala nggara wa'usi made rahina, ndad̄i sacara hukum, dou siwe ede wa'ura hori weki. Ro nggara sia nika walina lab̄o mone ma kalai, ndad̄i sia wati jinana.

⁴Ndede rau lab̄o nggomid̄oho, cina ra angiku. D̄ihukum Taurat nggomid̄oho wa'ura made, b̄ara nggomid̄oho wa'ura kasab̄ua lab̄o sarumbu Al Masih ro ndad̄i ntau Sia rawa'ura kamori mbali rad̄i madena. Sia rakamori rad̄i madena loakud̄u ndai ndad̄i wara onena d̄iru'u Ruma Hatalla d̄i ade mori ra woko ndaita.

⁵B̄ara, ntoina ndaita mori b̄atu tabe'a-tabe'a manusia. D̄iwakatu ede kane'e mamaikaina dosa, ma wontu b̄ara warana hukum agama, makuasa ade sarumbu ndaita. B̄ara ndedena ndai karawita lampa rawi ma kamaina made.

⁶Pala ake ndai watid̄u d̄iki wali b̄a hukum Taurat. Ndaita wa'ura made d̄i hukum ma ntoina makuasakai ndaita. Ndai watid̄u b̄atuta cara ma ntoi, b̄atu hukum ratunti. Ake ndaita b̄atu cara mab̄ou raturu tei b̄a Roh Allah d̄i ndaita.

⁷ Nggara ndedesi, auku d̄i loa nggahi b̄a ndaita? B̄ara hukum Taurat madab̄ae? Tantu wati! Pala hukum edeku ma rateina nahu mab̄oha dosa. Nahu wati d̄imab̄ade na'e ade ede auku, nggara watisi ranggahi b̄a hukum Taurat, ”Aina na'e ade.”

⁸Kai hukum Taurat, dosa naraka ncai d̄imakamaikaina samenana kane'e ma na'e ade d̄ei ade nahu; b̄ara nggara watisi wara hukum Taurat, dosa rau namade.

⁹Nahu ntoina moriku kai wati wara hukum Taurat. Pala wakatu wontu hukum agama, dosa tampu'ura morina

¹⁰ro nahu made. Ndad̄i hukum Taurat ede ma sarambakaina d̄i ne'ena mambei mori, mala nakamaiku made d̄iru'u b̄a nahu.

¹¹ B̄ara kai hukum Taurat ede, dosa nawehaku ncai d̄i tipu ro hadekaina nahu.

¹²Hukum Taurat ramaina ta Ruma Hatalla, ro sanikina rakaukai ade hukum ede ramaina ta Ruma Hatalla, ndad̄ina adi ro nataho.

¹³Sab̄ua ake aona ma taho ede makamaina made d̄iru'u b̄a nahu? Tantu wati! Dosaku ma kamaina made ede. Kai kanina ma taho, dosa makamaina made d̄iru'u b̄a nahu, loakud̄u tabe'a-tabe'a dosa d̄i eda poda. Kai parenta-parenta Ruma Hatalla, nabukutira b̄a one nawancuku iha ra dab̄aena dosa.

¹⁴Ndai tab̄adeku b̄a one hukum Taurat ramaina ta Roh Allah; pala nahu ake manusia mamapu ra rome. Nahu wa'ura landa ru'u d̄imandad̄i ada dosa.

¹⁵ B̄ara ndai nahu wati loaku ka'ao au rarawi ndaiku. Lampa rawi-lampa rawi rane'e karawi b̄a nahu, ede wati karawi b̄a nahu; pala lampa rawi-lampa rawi daca'u b̄a nahu, pala edeku d̄i karawi b̄a nahu.

¹⁶Nggara karawisi b̄a nahu lampa rawi-lampa rawi ma wati ncihi ncao lab̄o rakane'e b̄a nahu, ede aona nahu kamangaku b̄a one hukum Taurat ede taho.

¹⁷Ndad̄i, lai walina nahu sapodakaina ma karawina ede, malaisi dosa ma kuasakaina sarumbu nahu.

¹⁸Nahu kab̄ade b̄a one wati wara kone au-au rau ma taho d̄i ade weki nahu; eded̄u d̄i ade tabe'a manusia kaiku. B̄ara wara d̄i ne'e b̄a nahu d̄i karawi mataho, pala wati sanggo kalampa b̄a nahu.

¹⁹Nahu wati karawiku ma taho rane'e karawi b̄a nahu; pala nahu kakarawiku lampa rawi-lampa rawi ma dab̄ae, rawati ne'e karawi b̄a nahu.

²⁰Nggara kalampasi b̄a nahu lampa rawi-lampa rawi rawati ne'eku karawi, ede laina nahu ma karawina lampa rawi-lampa rawi ede, malaisi dosa ma kuasakai d̄i sarumbu nahu.

²¹Ndad̄i, nahu wehaku nggahi cumpukaina b̄a one hukum akeku ma nenti nggahi ra rawi: eded̄u nggarasi nahu ne'eku karawi ma taho, ndad̄i ma dab̄aempa ma wontu d̄i nahu.

²²Ade nahu naca'u hukum Allah,

²³pala nahu kawaraku weki b̄a one ade sarumbu nahu wara rau hukum makalai ma nenti nggahi ra rawi — eded̄u hukum ma wati ncihi ncao lab̄o hukum ramangaku b̄a fiki ra kananu nahu. B̄ara ndedena nahu d̄iki b̄a hukum dosa manenti nggahi ra rawi d̄i ade sarumbu nahu.

²⁴Ndakeku ka'ada'an nahu: nahu kato'a d̄i hukum Allah lab̄o fiki ra kananu nahu, pala kai tabe'a manusia nahu, nahu ka'oko ro b̄atuku dosa. Nawancuku dab̄aena nahu ake! Couku d̄imane'e kasalama nahu rad̄i ade sarumbu ake ma wa'a nahu d̄ei made? Syuku d̄i Ruma Hatalla! Sia nane'e kasalama nahu kai ncai Ruma Isa Al Masih.