Read Bima ROMA 8 Bible Online

ROMA 8 - Bima bible

ROMA 8

¹Ake watid̄u wara walina hukum d̄iru'u b̄a siad̄oho ma mori sab̄ua lab̄o Ruma Isa Al Masih.

²B̄ara hukum Roh Allah ma kandad̄ina ndai mori sab̄ua lab̄o Ruma Isa Al Masih wa'ura hori kalosana nahu rad̄i hukum ma kamaikaina dosa ro made.

³Au d̄i daloa karawi b̄a hukum agama, b̄ara ndai manusia mamapu ra rome, ede wa'ura karawi b̄a Ruma Hatalla. Ruma Hatalla makakoana kuasa dosa ade tabe'a manusia kai nggaduna Ana ndai-Na, ma mai ade ka'ada'ana sama lab̄o manusia ma dosa, d̄imafura wea dosa.

⁴Ruma Hatalla karawina ede loakud̄u kane'e-Na rakatada ade hukum Taurat ede loa d̄ikalampa ade weki ndaita ma mori b̄atu Roh Allah ro laina b̄atu tabe'a manusia.

⁵Dou-dou ma mori b̄atu tabe'a manusia, nafiki ra kananu ncauku au d̄i kane'e b̄a tabe'a manusia. Pala dou-dou ma mori b̄atu Roh Allah, nafiki ra kananu ncauku d̄i kane'e b̄a Roh Allah.

⁶Nggara fiki ra kananumu kuasakai b̄a tabe'a manusia, ndad̄i nakamaiku made. Pala nggara fiki ra kananumu kuasakai b̄a Roh Allah, ndad̄ina eded̄u mori ro taho ra ntai lab̄o Ruma Hatalla.

⁷Dou ma fiki ra kananuna kuasakai b̄a tabe'a manusia, dou ede namusu angina lab̄o Ruma Hatalla; b̄ara dou ede wati oko ro b̄atuna d̄i Hukum Allah, ro io romo sia wati loana oko ro b̄atu d̄i hukum Allah.

⁸Dou-dou ma mori b̄atu tabe'a manusia, wati loana kasana wea ade Ruma Hatalla.

⁹Pala nggomid̄oho wati mori b̄atumu tabe'a manusia. Nggomid̄oho mori b̄atu Roh Allah — nggara, tantuna, Roh Allah poda-poda nentina nggahi ra rawi d̄i ade sarumbumu. Dou ma wati ntau Roh Al Masih, dou ede laina ntau Al Masih.

¹⁰Pala nggara Al Masih mori d̄i ade sarumbumu, ndad̄i kone sarumbumu d̄imamade b̄ara dosa, pala Roh Allah mambei mori d̄i ru'umu, b̄ara hubungamu lab̄o Ruma Hatalla wa'ura taho.

¹¹ Nggara Roh Allah, ma kamorina Al Masih rad̄i madena, mori ade sarumbumu, ndad̄i Sia ma rakamori Al Masih rad̄i madena ede, d̄imakamori rau sarumbumu ma loa made ede. Sia karawina ede kai Roh-Na ma mori d̄ei nggomi.

¹²B̄ara ndedena, cina ra angi, ndai tantau su'u ra tundu; pala laina su'u ra tundu d̄i tabe'a manusia; ndai wati paraluna mori b̄atu d̄i ne'ena.

¹³B̄ara nggara nggomid̄oho mori b̄atumu tabe'a manusia, ndad̄i nggomid̄oho d̄imamade; pala nggara kai kuasa Roh Allah, nggomid̄oho mahade ncauku ruku ra rawi-ruku ra rawimu ma dosa, ndad̄i nggomid̄oho d̄imamori.

¹⁴Dou-dou rad̄anda ra wa'a b̄a Roh Allah, eded̄u ana-ana Ruma Hatalla.

¹⁵ B̄ara Roh, rambei b̄a Ruma Hatalla d̄iru'u nggomid̄oho, wati d̄i ndawina nggomid̄oho ndad̄i ada ndad̄ina nggomid̄oho morimu d̄i ade dahu. Pala Roh Allah ede nakandad̄iku nggomid̄oho ana-ana Ruma Hatalla. Ro kai kuasa Roh Allah ede, ndai outa Ruma Hatalla ede, ”Ama, io Ama-ku!”

¹⁶Roh Allah sama-sama lab̄o roh ndaita nakatadaku b̄a one ndai eded̄u ana-ana Ruma Hatalla.

¹⁷Nggara ndai eded̄u ana-ana-Na, ndad̄i ndai rau eded̄u pasaka-Na d̄imatarima bareka-bareka rasadia b̄a Ruma Hatalla d̄iru'u ana-ana-Na. Ndai d̄imatarima sama-sama lab̄o Al Masih au rawa'u sadia b̄a Ruma Hatalla d̄iru'u-Na; b̄ara nggara ndaita ncoki ra susa sama-sama lab̄o Al Masih, ndai d̄ikad̄ese ra kantasa rau sama-sama lab̄o Sia.

¹⁸Samenana ncoki ra susa ra'iu b̄a ndai ake, nggahi b̄a nahu, wati loata ntewikai sama sakali kai d̄ese ra ntasa ma d̄ikatadana d̄i ndaita.

¹⁹Sara'a isi dunia nangena kai wancu ne'e poda adena d̄i wakatuna Ruma Hatalla katadana ana-ana-Na.

²⁰ B̄ara isi dunia lab̄o isina wa'ura co'o d̄imandad̄i ndub̄u, laina ne'e b̄a ndaina, pala b̄ara Ruma Hatalla maco'o kandedena. Konena ndede wara rau d̄i ne'e ake:

²¹b̄a one d̄i sab̄ua wakatu dunia lab̄o isina d̄i hori kalosa rad̄i kuasa ma kalelina ro b̄atu d̄ihori d̄i mori masana ro d̄ikad̄ese ra kantasa sama-sama lab̄o ana-ana Ruma Hatalla.

²²Ndai tab̄adeku b̄a one sampe wakatu ake sara'a dunia lab̄o isi-isina naweta b̄ara ncoki ra susana b̄une ina masusa ro ncoki wunga wakatu ngganana.

²³ Lab̄o laina sara'a dunia lab̄o isi-isina mpoa ma weta; ndai rau taweta d̄i ade mpida ndaita. Ndai wa'ura tarimata Roh Allah kai rambei b̄a Ruma Hatalla ma sarambakaina, pala ndai mbui raupu ngenata Ruma Hatalla mahori kalosa sara'a sarumbu ndaita ro kandad̄ina ndai ana-ana-Na.

²⁴B̄ara kai rapamaota, ndad̄i ndai kasalamana. Pala nggara au rapamao b̄a ndai ede wa'ura eda b̄a ndaita, ndad̄i ede laina rapamao wali. B̄ara cousi mambuipu d̄i ne'ena au rawa'ura edana?

²⁵Pala nggara ndai pamaota au rawatipu eda b̄a ndaita, ndad̄i ndaita ngena kai saba.

²⁶Ndede rau Roh Allah mai bantuna ndaita nggara mapu ro romesi ndaita. B̄ara ndai wati b̄adeta b̄uneku sapodakaina ndai tado'asi; ndai Roh ede malao ncao tando lab̄o Ruma Hatalla d̄imaraho ro dod̄ona d̄iru'u b̄a ndaita ro kai ne'ena ma poda ndad̄ina wati raka d̄i renta.

²⁷Ndad̄i Ruma Hatalla, ma b̄ade isi ade manusia, naloa ka'ao d̄i ne'e b̄a Roh ede; b̄ara Roh ede maraho poda-poda d̄i Ruma Hatalla d̄iru'u b̄a ela Ruma Hatalla, ro nancihi ncao kai d̄i kane'e b̄a Ruma Hatalla.

²⁸Ndai tab̄adeku b̄a one Ruma Hatalla ma'ato samenana lampa rawi, ndad̄ina wara hasi ma taho d̄iru'u b̄a dou-dou ma meci ra ca'u Sia ro ra'ou-Na mancihi ncao lab̄o rania-Na.

²⁹Siad̄oho rawa'u kad̄ale b̄a Ruma Hatalla, wa'ura katantu rauna ra'aipu saramba wa'una d̄imandad̄i sama lab̄o Ana-Na, eded̄u Ruma Isa Al Masih. Ade ndedekaina ana-Na ede mandad̄i sarambakaina d̄i ade weki cina ra angi mamboto.

³⁰Dou rakatantu ulu b̄a Sia, Sia ouna siad̄oho, siad̄oho ra'ou ede, Sia ma kancihina ro siad̄oho rakancihi ede d̄ima'edana d̄ese ra ntasa-Na.

³¹Auku d̄i loa nggahi ake mab̄oha samenana ede? Nggara Ruma Hatalla nahorusi ndai, couku mawa'una ao ndai?

³²Ana ndai-Na wati d̄i kancaja-Na, malaisi rad̄onggo-Na ru'u kapentikai ndai sara'a; Sab̄ua Sia wati d̄imambei d̄i ndai samenana ma kalai?

³³Couku ma loana da'awa ndai ela rakad̄ale b̄a Ruma Hatalla, nggara ndai Ruma Hatalla makatadana b̄a one ndai wati ncarata?

³⁴Sab̄ua wara dou ma ne'e kancara ndaita? Ruma Isa Al Masih ma horuna ndai peade! Siaku ma wa'ura made, atao Siaku rawa'u kamori mbali rad̄i made ro nawara d̄i Ruma Hatalla d̄i hid̄i ma na'e kuasa.

³⁵Sab̄ua wara ma loa tapa Al Masih mameci ra ca'u ndaita? Sab̄ua naloa susa ra ncoki matapana, atao rawi mancoki, atao kancoki atao sarahid̄o, atao ncoki mori, atao bahaya, atao made?

³⁶ Ade Alkitab ratunti ndake, ”Sanaru ainaina madad̄oho mori d̄i ade bahaya made b̄ara Ita. Madad̄oho rakarawi b̄une jimba d̄i ne'e sambele.”

³⁷Wati! Mala d̄i ade sara'ana ede ndai rakata ngolu masampuruna b̄a Sia ma meci ra ca'u ndaita!

³⁸B̄ara nahu ka'imbi podaku b̄a one d̄i sara'a dunia, nataho madena, ro mori ra woko, nataho mala'eka, ro mantau kuasa, nataho kadahu-kadahu wunga ake, ro kadahu-kadahu d̄i jamana makento atao tenggo ra wale-tenggo ra wale makalaina;

³⁹nataho lampa rawi-lampa rawi ma d̄i langi, nataho lampa rawi d̄i ade dunia atao au-au rau ma kalai, samenana ede wati loana tapa Ruma Hatalla meci ra cau'una ndaita, b̄une wa'ura katada-Na kai ncai Isa Al Masih, Ruma ndaita.