Read Bima ROMA 9 Bible Online

ROMA 9 - Bima bible

ROMA 9

¹Au ma d̄i nggahi b̄a nahu ake eded̄u poda b̄ara nahu ntau Al Masih. Nahu wati cowaku. Ade mpida nahu rad̄anda ra wa'a b̄a Roh Allah, makatenggona nahu rau b̄a one nggahi ra eli nahu ake poda.

²Nahu nawancuku ncoki adeku ro ade nahu nasusa ra ncoki

³b̄ara cina ra angi nahu ma sab̄ua bangsa lab̄o nahu. B̄ara d̄iru'u b̄a siad̄oho, ndai nahu rela d̄i b̄a'a b̄a Ruma Hatalla ro d̄i kancengga rad̄i Al Masih.

⁴ Siad̄oho eded̄u ela rakad̄ale ro Ruma Hatalla kandad̄ina siad̄oho ana-ana ndai-Na, ro katadana kuasa-Na d̄i siad̄oho. Sia ndawina sake lab̄o siad̄oho ro mbeina d̄i siad̄oho hukum Taurat. Ruma Hatalla ngoana d̄i siad̄oho b̄uneku siad̄oho pab̄uana sambea ro siad̄oho wa'ura tarima rauna rasake-sake-Na.

⁵Siad̄oho ede londo ra mai rad̄i wa'i ra waro ndaita. Al Masih sacara manusia ramaina tabangsa siad̄oho. Sia nancewi ese d̄i samenana. D̄ese rantasa d̄iru'u Ruma Hatalla santoi-ntoina! Amin.

⁶Nahu nggahiku laina aona b̄a one rasake Ruma Hatalla watid̄u d̄ikani wali; pala laina sara'a dou Israel eded̄u ela ra kad̄ale b̄a Ruma Hatalla.

⁷ Wati sara'a londo ra mai Ibrahim eded̄u ana-ana Ruma Hatalla. B̄ara Ruma Hatalla nggahina d̄i Ibrahim, ”Cuma londo ra mai Ishak mpoampa d̄i pehekai londo ra maimu.”

⁸Ede aona b̄a one londo ra mai Ibrahim mandad̄i ana-ana Ruma Hatalla, eded̄u cuma londo ra maina ranggana b̄ara rasake Ruma Hatalla; ro laina sara'a londo ra maina.

⁹ B̄ara rasake Ruma Hatalla eded̄u b̄une ake, ”Aipu wakatu ra katantukai, Nahu d̄imambali, ro la Sara d̄imantau sab̄ua ana mone.”

¹⁰Ro ake rau: Ribka manggana ana mone d̄uana rad̄i sab̄ua ama, eded̄u la Ishak wa'i rawaro ndaita.

¹¹Sawatipu b̄a ranggana ana dou to'i d̄uana ede, Ruma Hatalla nawa'ura katantu rakad̄ale-Na ru'u makento. Rakad̄ale Ruma Hatalla ede wati wi'ikai weki d̄i au raloa karawi b̄a dou, pala wi'ikai weki d̄i ou b̄a ndai Ruma Hatalla. B̄ara aipu wakatu ana mone la Ribka d̄uana ede watipu loana karawi au-au ma taho atao ma iha,

¹² Ruma Hatalla nawa'ura nggahi d̄i la Ribka, ”Ma tua d̄imakarawi wea ma to'i.”

¹³ Ade Alkitab ratunti b̄a one Ruma Hatalla nggahi ndakena, ”La Yakub meci ra ca'u b̄a Nahu, pala la Esau wati ca'u b̄a Nahu.”

¹⁴Auku nggahi cumpukai b̄a ndaita ake? B̄ara Ruma Hatalla ede wati adina? Wa'ura tantu Ruma Hatalla ma'adi!

¹⁵ B̄ara Ruma Hatalla manggahi d̄i la Musa, ”Nahu d̄imaturu teina rahama d̄i dou rane'ekai b̄a Nahu tei rahama, ro Nahu d̄imatei kasi ade-Ku d̄i dou rane'ekai b̄a Nahu tei kasi ade.”

¹⁶Ndad̄i, kaputusa Ruma Hatalla ede wati wi'ikai weki d̄i relana manusia atao d̄i usaha manusia, malaisi d̄i rahama Ruma Hatalla mpa d̄iru'u b̄a dou rakad̄ale-Na ede.

¹⁷ B̄ara ade Alkitab ratunti, ”Ruma Hatalla nggahina d̄i sangaji Mesir, ’Nahu makandad̄i nggomi sangaji d̄iru'u sab̄ua ne'e akempa, eded̄u loakud̄u kai nggomi, Nahu d̄imatei rakatadana kuasa-Ku ro ndawiku ngara Nahu d̄imambou d̄i sara'a dunia.’ ”

¹⁸Ndad̄i, Ruma Hatalla nantau rahama d̄i sab̄ua-sab̄ua dou, nggara ne'esi kandede b̄a Ruma Hatalla. Ro Ruma Hatalla nandawiku sab̄ua-b̄ua dou ndad̄i tera tutana, nggara ne'esi kandede rau b̄a Ruma Hatalla.

¹⁹Nggomid̄oho d̄imanggahi d̄i nahu, ”Nggara ndedesi b̄ab̄auku Ruma Hatalla mbuipu ne'ena kancara manusia? Wati kone sab̄ua dou maloana tapa kane'e Ruma Hatalla!”

²⁰ Pala, nggomid̄oho! Nggomid̄oho cuma manusiampa. Ro nggomid̄oho wati loamu kadisa weki cambe d̄i Ruma Hatalla! Sab̄ua loaku pot b̄unga sod̄i d̄i dou ma randawina, ”B̄ab̄auku ita ndawi kandakekaimu mada?”

²¹Sab̄ua laina dou ma ndawi pot b̄unga ede nantau hak karawi dana lili ede b̄era ne'e b̄a adena! Rad̄i sakab̄ore dana lili, dou ede nantau hak ndawi d̄ua mbua pahu pot b̄unga: sab̄ua ma ntika, ro ma kalaina wati ipi ntikana.

²²Ndede rauku d̄i au randawi b̄a Ruma Hatalla. Sia naniaku b̄oho kai mbani-Na ro nakatadaku kuasa-Na. Pala Sia nasaba d̄i siad̄oho ma pab̄ua d̄ihukum b̄ara ndawina mbani Ruma Hatalla.

²³Ruma Hatalla nania rauku d̄i tei katadana d̄i ndai taho ra ntai mawancu mboto ralua-Na d̄i ndai rakasi kai b̄a ade-Na. Ndai wa'ura sadiana d̄imatarima taho ra ntai ede.

²⁴Ndai rawa'ura ou-Na, laina d̄i bangsa Yahudi mpoa, pala rad̄i bangsa-bangsa makalai rau.

²⁵ B̄ara d̄i ade buku Nabi Hosea, nggahi Ruma Hatalla, ”Dou-dou ma laina ela-Ku, d̄i pehe b̄a Nahu ’Ela-Ku’. Bangsa ma wati meci ra ca'u b̄a Nahu, d̄i pehe b̄a Nahu ’Meci raca'u-Ku’.

²⁶ Ro tab̄e hid̄i ranggahi d̄i dou, ’Nggomi laina ela Nahu,’ ta'edeku dou-dou ede d̄i pehekai ana-ana Ruma Hatalla ma mori.”

²⁷ Nabi Yesaya manggahi kapodana mab̄oha bangsa Israel, ”Konena poda mboto bangsa Israel b̄une mboto sarae d̄i moti, cuma sato'impa ma d̄imaraka salama;

²⁸b̄ara Ruma nab̄ab̄u rociku kai hukuma d̄i sara'a isi dunia.”

²⁹ Yesaya nggahi ndake rauna, ”Paina Ruma Hatalla Ma Wancu Na'e Kuasa wati wi'ina d̄i ndaita londo ra mai, pasti ndai sara'a wa'ura ndad̄i b̄une Sodom ro Gomora.”

³⁰Ndad̄i, nggahi cumpukaina, eded̄u ake: Bangsa-bangsa makalaina malaina Yahudi wati usahana loakud̄u hubunga siad̄oho lab̄o Ruma Hatalla ndad̄i taho mbali. Pala b̄ara siad̄oho imbina, ndad̄i Ruma Hatalla ndawina hubunga siad̄oho lab̄o Sia ndad̄i taho mbali.

³¹Pala, dou-dou Yahudi na'usaha ncauku to'a d̄i hukum loakud̄u hubunga siad̄oho lab̄o Ruma Hatalla ndad̄i taho mbali. Pala siad̄oho wati loana.

³²B̄ab̄auku siad̄oho wati loakaina? B̄ara siad̄oho karawina ede wati kai ncai imbina d̄i Ruma Hatalla, malaisi kai ncai usaha ndai siad̄oho. Ndad̄i siad̄oho mbo'o satununa d̄i ”Wadu satunukai”.

³³ Mab̄oha wadu ede d̄i ade Alkitab ratunti ndake, ”Tio kab̄aepu ake: D̄i Sion wa'ura wi'i toho b̄a Nahu sab̄ua wadu ma d̄imakandad̄ina dou satunu; eded̄u sab̄ua wadu na'e ma d̄imakandad̄ina mbo'o dou. Pala dou ma imbi d̄i Sia wati d̄imasinci ade.”