Read Bima 1 KORINTUS 1 Bible Online

1 KORINTUS 1 - Bima bible

1 KORINTUS 1

¹ Cina ra angi ela Ruma Hatalla d̄i Korintus! Nggomid̄oho wa'ura ou b̄a Ruma Hatalla d̄imandad̄i ela-Na b̄ara nggomid̄oho ntau Ruma Isa Al Masih masama-sama lab̄o samenana dou tab̄e-b̄e ma nemba Ruma ndaita Isa Al Masih, eded̄u Ruma siad̄oho ro Ruma ndai rauja. Nahu, Paulus, ro cina ndai la Sostenes, mapamao loa to'impa Ruma Hatalla Ama ndaita ro Ruma Isa Al Masih mbeina bareka lab̄o taho ra ntai d̄i ru'u b̄a nggomid̄oho. Nahu tuntiku sura ake kai rasu Isa Al Masih, rahanta b̄a ndai Ruma Hatalla ro kai rakane'e b̄a ndai rau-Na.

⁴Nahu matarima kasi ncau d̄i Ruma Hatalla mab̄oha nggomid̄oho, b̄ara nggomid̄oho mawa'ura tarima rahama rad̄i Ruma Hatalla kai ncai Ruma Isa Al Masih.

⁵B̄ara nggomid̄oho mawa'ura ndad̄i ntau Al Masih, ndad̄i morimu ntau ra wara ade samenana lampa rawi. Loa ra tingi mab̄oha samenana nawancuku d̄eina, ro nggomid̄oho loamu tei loa ra tingi ede.

⁶Ede nateiku b̄a one haba mab̄oha Al Masih wa'ura ipi lu'u d̄eina d̄i ademu,

⁷ndad̄ina nggomid̄oho wati iumu kura kone sab̄ua bareka rau, wunga nggomid̄oho ngenamu Ruma ndaita Ruma Isa Al Masih mamai ro d̄i eda b̄a samenana dou.

⁸Ndai Al Masih d̄imajaga ro horuna nggomid̄oho sampe cumpukaina; loakud̄u wakatu Sia mai mbalina, nggomid̄oho d̄i raka eda wati wara ma'ihamu.

⁹Ruma Hatalla loa d̄i imbi poda. Siaku Ruma Hatalla ma wa'ura ouna nggomid̄oho d̄imandad̄i sab̄ua lab̄o ana-Na, eded̄u Isa Al Masih, Ruma ndaita.

¹⁰Cina ra angi! Kai ngara Ruma ndaita Ruma Isa Al Masih, nahu maraho loakud̄u nggomid̄oho sara'ana sab̄ua nggahi ra eli; b̄aib̄a wara mbi'a ra ncengga d̄i woha nggomid̄oho. Pab̄uapu nggomid̄oho kasab̄ua weki, sab̄ua ade ro sab̄ua fiki rakananu.

¹¹B̄ara, dou-dou rad̄i iwa ra weki Kloe mai ngoana d̄i nahu b̄a one wara cence ncihi d̄i woha nggomid̄oho.

¹² Ringa b̄a nahu eded̄u b̄a one d̄i ade woha nggomid̄oho wara ma nggahi, ”Nahu b̄atu Paulus,” wara rau ma nggahi, ”Nahu b̄atu la Apolos,” ma kalai manggahi, ”Nahu b̄atu la Petrus,” ma kalai wali manggahi, ”Nahu b̄atu Al Masih.”

¹³Sab̄ua loaku Al Masih d̄i cengga-cengga! La Paulus wati madena d̄isalib d̄i ru'u nggomid̄oho! Nggomid̄oho rau watira kandeu karaso d̄i ru'u ndad̄ikaimu anamori la Paulus.

¹⁴ Syukura nahu wati kandeu karasoku kone sab̄ua dou d̄i ade weki nggomid̄oho, selasi la Krispus ro la Gayus.

¹⁵Ai to'ina warakaina kone sab̄ua dou manggahi b̄a one nahu wa'ura kandeu karasoku sia d̄imandad̄i anamori nahu. (

¹⁶ Oh io, la Stefanus ro iwa ra wekina, nahu romo makandeu karasona siad̄oho. Pala ari mai b̄a ede, kawara b̄a nahu, wati wara dou makalai wali rakandeu karaso b̄a nahu.)

¹⁷Al Masih nggaduna nahu laina d̄imakandeu karaso dou, malaisi d̄imangoa ra kahaba Haba Mataho rad̄i Ruma Hatalla; ro ede rau pab̄ua d̄i karawi b̄a nahu kai wati kani loa ra b̄ade nuntu ra nggahi sacara manusia, loakud̄u kuasa rad̄i made Al Masih d̄i salib wati lao ncauna.

¹⁸B̄ara d̄iru'u b̄a dou-dou ma lao aka ma'iha ra leli, haba mab̄oha made Al Masih d̄i salib cuma nuntu cowampa. Pala, d̄i ru'u b̄a ndai rakasalama b̄a Ruma Hatalla, haba ede ndad̄i cara Ruma Hatalla tei katada kai kuasa-Na.

¹⁹ B̄ara ade Alkitab, nggahi Ruma Hatalla, ”Loa timba ra lemba dou maloa Nahu d̄imakakacona, ro loa ka'ao dou-dou mantau ilimu Nahu d̄imakamborana.”

²⁰ Auku onena dou-dou maloa ede? Auku onena dou-dou ma ntau ilimu? Auku onena siad̄oho mantau ilimu dunia ake? Ruma Hatalla wa'ura tei katadana b̄a one loa timba ra lemba dunia ake eded̄u cuma nggahi cowampa!

²¹B̄ara b̄uneb̄e wali loana manusia, sia wati loana pata Ruma Hatalla kai ncai loa ndaina. Pala b̄ara loa timba ra lemba Ruma Hatalla, ndad̄i ndai Sia loana mbei salama d̄i dou-dou ma imbi d̄i Sia kai ncai haba rawa'a rangoa b̄a nami rawi'ikai nggahi cowa b̄a dunia.

²²Dou Yahudi naraho pab̄uaku b̄isa ra guna d̄i ru'u bukuti ro dou Yunani nakapentiku loa timba ra lemba dunia ake.

²³Pala ndaita ake cuma ngoa ra kahabata Al Masih mamade d̄i salib. Haba ede nasingguku ade dou Yahudi, ro nawi'ikaiku nggahi cowa b̄a dou-dou malaina Yahudi.

²⁴Pala d̄i ru'u b̄a dou-dou rawa'u ou b̄a Ruma Hatalla — nataho dou Yahudi ro dou malaina Yahudi — haba ede eded̄u cara Ruma Hatalla tei rakatadakaina kuasa ro timba ra lemba-Na.

²⁵B̄ara ma tada sampula d̄i Ruma Hatalla, eded̄u mawancuku loa timba ra lemba ntewi kaisi loa timba ra lemba manusia; ro ma tada rome d̄i Ruma Hatalla, edeku mancewi tenggo ntewi kaisi tenggo ra wale manusia.

²⁶Cina ra angi! Kawarapu b̄uneku ka'ada'amu wakatu Ruma Hatalla ouna nggomid̄oho. Cuma sato'impa rad̄i ade weki nggomid̄oho ma loa timba ra lemba, atao mantau kuasa atao ma'ese b̄ora kai ntanda b̄a manusia.

²⁷B̄ara poda Ruma Hatalla sangaja kad̄alena ma wi'ikai b̄a dunia ake sampula, loakud̄u dou-dou maloa ndad̄i maja. Ro Ruma Hatalla nakad̄ale rauku ma mapu ra rome rawi'ikai b̄a dunia ake, loakud̄u dou-dou ma na'e kante'e ndad̄i maja.

²⁸Ruma Hatalla kad̄alena dou rawi'i ka'awa b̄a dou, rakab̄awa ra katuna b̄a dou, ro ma wati wara onena rawi'ikai b̄a dunia ake, loakud̄u Ruma Hatalla kalelina rawi'ikai mapenti b̄a dunia.

²⁹Ade ndedekaina wati wara kone sab̄ua dou maloa kasombo weki d̄i tando Ruma Hatalla.

³⁰Ndai Ruma Hatalla ma kandad̄ina loakud̄u nggomid̄oho sab̄ua lab̄o Ruma Isa Al Masih. Kai ncai Al Masih, ndai kandad̄ina loa timba ra lemba, ro kai ncai Sia rau Ruma Hatalla kandad̄ina ndai ncihi taho mbali lab̄o weki ndai-Na, kandad̄ina ndai ela-Na rakalaina, ro hori kalosana ndaita.

³¹ Ndad̄i, b̄une ratunti ade Alkitab, ”Dou ma ne'e kabangga weki, pab̄uaku banggakaina au rakarawi b̄a Ruma.”