Read Bima 1 KORINTUS 10 Bible Online

1 KORINTUS 10 - Bima bible

1 KORINTUS 10

¹ Cina ra angi! Nggomid̄oho pab̄uapu kawara au ma randad̄i d̄i wa'i ra waro ndai aipu siad̄oho b̄atuna Musa. Siad̄oho sara'a rakanggawo b̄a apu, ro kai salamana sapana Moti Kala.

²D̄i ade apu ro moti ede siad̄oho rakasab̄ua d̄imandad̄i dou-dou mab̄atu Musa, siad̄oho sara'ana rakandeu karaso d̄ei apu ro d̄ei moti ede.

³ Siad̄oho sara'ana ngahana ngaha ra nono ade maraso ma sama,

⁴ ro nonona nono ade maraso ma sama. Siad̄oho sara'ana nono rad̄i doro wadu ade maraso ma b̄atuna siad̄oho; doro wadu ede eded̄u ndai Al Masih.

⁵ Konena ndede, Ruma Hatalla wati sanana d̄i mboto kai dou rad̄i siad̄oho, ro b̄a ndedena timba-timba siad̄oho nambaru mbanta d̄i so sarae.

⁶ Samenana ede ndad̄i conto d̄i ru'u b̄a ndai, d̄imakawarana ndai loakud̄u aina ne'emu lampa rawi-lampa rawi ma iha ra dab̄ae b̄une siad̄oho.

⁷ Ro loakud̄u ndai aina nemba berhala b̄une rakarawi b̄a sarunde wekina d̄i ade weki siad̄oho. Ade Alkitab ratunti, ”Ndad̄i bangsa ede tampu'u ngaha ra nono, ro tari d̄i ru'u nemba berhala.”

⁸ Ndai wati loa karawi ma sampu ra nggele b̄une rakarawi b̄a sarunde weki rad̄i ade weki siad̄oho. B̄ara d̄ua mpuru tolu riwu dou ade weki siad̄oho made ade sanai b̄ara karawina ede.

⁹ Ndai wati loata coba-coba Ruma b̄une rakarawi b̄a sarunde wekina rad̄i ade weki siad̄oho ntoina, ndad̄ina siad̄oho made noto b̄a sawa mawari.

¹⁰ Ndai wati loa rauta bada red̄e; b̄une rakarawi b̄a sarunde weki rad̄i ade weki siad̄oho ntoina, ndad̄ina siad̄oho hade b̄a Mala'eka mataki hade.

¹¹Sara'a lampa rawi ede ndad̄ina d̄i siad̄oho d̄imandad̄i conto d̄i ru'u b̄a dou-dou makalai. Ro sara'ana ede ratunti rau d̄imandad̄i ngoa ra kawara d̄i ndai. B̄ara ndaita ake mori d̄i wakatu cumpukai jamana.

¹²Dou ma kacai wekina makid̄i kante'e, aina kabare; aina sampe sia mab̄una.

¹³Sanikina coba'a ra'iu b̄a nggomid̄oho eded̄u coba'a ma biasa d̄i iu b̄a manusia. Pala Ruma Hatalla mato'aku d̄i rasake-Na. Sia wati d̄imaco'o nggomid̄oho d̄i coba mancewi rad̄i sanggomu. Wakatu nggomid̄oho b̄oha b̄a coba'a, Sia d̄imambeina ncai d̄i tenggokaimu loakud̄u nggomid̄oho wa'umu taha.

¹⁴B̄ara ndedena, cina ra angi rameci ra ca'u b̄a nahu, pab̄uapu nggomid̄oho kad̄o'o weki d̄i nembakaimu berhala.

¹⁵Nahu nuntu ra nggahiku d̄i nggomi b̄une d̄i ru'u dou-dou ma ntau hikima. Pab̄uapu nggomid̄oho timba b̄a ndaimu nggahi nahu ake.

¹⁶ D̄i wakatu ndaita nono anggo kai renta tarima kasi d̄i Ruma Hatalla, sab̄ua laina ede naturu teiku b̄a one ndai sab̄ua lab̄o Al Masih d̄ei made-Na? Ro d̄i wakatu ndaita cengga-cengga roti ru'u d̄i ngaha sama-sama, sab̄ua laina ede naturu teiku b̄a one ndai sab̄ua d̄ei sarumbu Al Masih?

¹⁷B̄ara wara sab̄uampa roti, ro ndai sara'a ngaha rad̄i roti ma sab̄ua ede rau, ndad̄i ndai ma mboto ake eded̄u sab̄ua sarumbu.

¹⁸ Coba tio kab̄aepu dou-dou Yahudi, siad̄oho ma ngaha ngaha ra nono rad̄onggo ra mbei ese wawo hid̄i d̄onggo rambei kai koroba, eded̄u dou-dou ma sab̄ua lab̄o hid̄i ede.

¹⁹Auku aona nggahi nahu ede? Berhala atao ngaha ra nono rambei rad̄onggo d̄i ru'u berhala ede, sara'ana wati wara ntauna ao poda.

²⁰ Au rad̄onggo ra mbei d̄i hid̄i koroba d̄i ru'u berhala wati d̄i d̄onggo ra mbei d̄i ru'u Ruma Hatalla, malaisi d̄i ru'u roh-roh seta. Ro nahu wati ne'eku nggomid̄oho sab̄ua lab̄o roh seta.

²¹Nggomid̄oho wati loamu nono rad̄i piala anggo Ruma, ro d̄i piala anggo roh seta rau. Nggomid̄oho wati loamu ngaha d̄i meja Ruma, ro d̄i meja roh seta rau.

²² Atao ndai ne'eta kandad̄i Ruma hiana ade? Sab̄ua ndai ncewi tenggo ntewi kaisi Ruma?

²³ Nggahi dou, ”Ndai loa karawi au-au rane'e ndai.” Ncihi! Pala wati sara'a rane'e ndai ede ntauna one. ”Ndai loa karawi au-au rane'e b̄a ndai” — pala wati sara'a rane'e ndai ede katu'una mori ra woko ndaita.

²⁴Aina kone sab̄ua dou mampou kapodana d̄i ru'u paralu ndai mpoana. Sanikina dou pab̄uaku founa d̄i ru'u b̄a dou makalai rau.

²⁵Nggomid̄oho loa ngaha au-au ralanda d̄i amba uta hi'i. Aina paliti ulumu, konena wara daca'u b̄a ade mpidamu.

²⁶ B̄ara ade Alkitab ratunti, ”Dunia ake lab̄o samenana isina eded̄u ntau Ruma.”

²⁷Nggara nggomid̄oho na'undasi ngaha b̄a dou ma laina ela Al Masih, ro nggomid̄oho tarimamu ra'unda ede ngahapu au rasadiana d̄i ru'umu. Aina paresamu ramaina tab̄e ngaha ra nono ede, b̄aib̄a wara makatani d̄ei ade mpidamu.

²⁸Pala warasi ma nggahi d̄i nggomid̄oho, ”Ngaha ra nono ake wa'ura d̄onggo ra mbei d̄i berhala,” aina ngahamu ngaha ra nono ede, b̄ara ntandamu penti dou ede ro b̄ara eli ade mpida.

²⁹Aona nggahi nahu laina eli ade mpidamu, pala eli ade mpida dou ede. Kombisi wara ma sod̄i, ”Io, b̄ab̄auku ra ne'e b̄a nahu pab̄ua d̄i kahampa b̄a eli ade mpida dou makalai?

³⁰Nggara nahu kangahasi ngaha ra nono lab̄o tarima kasihku d̄i Ruma Hatalla, b̄ab̄auku dou nuntu ka'ihakaina nahu b̄a ngaha ra nono ede, sapodakaina nahu wa'ura tarima kasihku d̄i Ruma Hatalla b̄a ngaha ra nono ede?”

³¹Au rau karawi b̄a nggomid̄oho — nggomid̄oho ngaha atao nggomid̄oho nonomu — karawi sara'apu ede d̄i kad̄ese ra kantasakaimu Ruma Hatalla.

³²Moripu b̄une ede ndad̄i nggomid̄oho wati ndawimu dou makalai karawi dosa; nataho siad̄oho dou Yahudi atao dou laina Yahudi atao ela Ruma Hatalla.

³³Moripu b̄une nahu. Nahu ka'usahaku kasana wea ade samenana dou ade sara'ana lampa rawi, kai wati wara ne'e b̄a nahu kapenti d̄i ru'u b̄a weki ndai. Ne'e b̄a nahu loakud̄u samenana siad̄oho loa d̄ikasalama.