Read Bima 1 KORINTUS 11 Bible Online

1 KORINTUS 11 - Bima bible

1 KORINTUS 11

¹ B̄atupu conto nahu, b̄une nahu rau b̄atuku conto Al Masih.

²Nahu roiku nggomid̄oho b̄ara nggomid̄oho kawara ncaumu nahu ro b̄atumu ratei b̄a nahu d̄i nggomid̄oho.

³Pala ne'e b̄a nahu nggomid̄oho b̄ademu sab̄ua lampa rawi wali, eded̄u b̄a one ma ndad̄i mana'ekaina d̄i sanikina dou mone eded̄u Al Masih; ma ndad̄i mana'ekai d̄i wei eded̄u rahi, ro ma ndad̄i mana'ekai d̄i Al Masih eded̄u Ruma Hatalla.

⁴Nggara sab̄ua dou mone wakatu do'ana atao wakatu karonggana haba rad̄i Ruma Hatalla d̄i tando dou mamboto, kani tod̄u tuta, ndad̄i dou ede nakatuna ra kab̄awaku Al Masih.

⁵Ro nggara sab̄ua dou siwe wakatu do'ana atao wakatu karonggana haba rad̄i Ruma Hatalla d̄i tando dou mamboto, wati tod̄una tuta, ndad̄i dou siwe ede nakab̄awa ra katunaku rahina ma ndad̄i mana'ekai d̄i wekina. Ede samampa b̄une-b̄uneta tuta dou siwe ede wa'ura b̄oru.

⁶B̄ara nggara dou siwe wati ne'ena tod̄u tutana nancewi tahopu dompo honggona. Pala nggara dou siwe d̄ib̄oru tutana atao radompo honggona, ndad̄i ede katuna ra kab̄awa d̄i ru'u b̄a sia. B̄ara ndedena ncewi tahopu sia tod̄una tuta.

⁷ Dou mone wati paraluna kani tod̄u tuta, b̄ara sia nakatadaku wa'a wekina ro na'e ra ntoruna Ruma Hatalla. Pala dou siwe nakatadaku na'e ra ntoru dou mone.

⁸ B̄ara dou mone watira kandad̄i rad̄i dou siwe, dou siweku rakandad̄i rad̄i dou mone.

⁹Dou mone wati rakandad̄i rau d̄i ru'u mapentikai dou siwe, malaisi dou siwe kandad̄i ru'u kapentikai dou mone.

¹⁰B̄ara ndedena, d̄i kasanakai ade samenana mala'eka, dou siwe pab̄uaku kanina tod̄u tuta d̄i ru'u tanda b̄a one sia awa mai b̄a kuasa rahina.

¹¹Konena ndede ade mori ra woko ndai dou ela Al Masih, dou siwe wati kid̄i kesena, hori weki rad̄i dou mone, ro dou mone rau wati kid̄i kesena, hori weki rad̄i dou siwe.

¹²Kone dou siwe masarambana, rakandad̄i rad̄i dou mone, pala sawa'u b̄a ede dou mone ranggana b̄a dou siwe; ro samenana ramaina ta Ruma Hatalla.

¹³Coba ndai nggomid̄oho timbapu lampa rawi ake: Sab̄ua taho dou siwe do'a d̄i Ruma Hatalla, d̄i tando dou mamboto, wati tod̄una tuta?

¹⁴Ranginakai b̄a dou mamboto, nggomid̄oho wa'ura tei b̄a one dou mone nggara naru honggo, ede wati patuna.

¹⁵Pala d̄i ru'u b̄a dou siwe, rambei honggo d̄i ru'u sia d̄i mab̄onto tutana ro honggo manaru eded̄u d̄i banggakaina.

¹⁶Nggara warasi ma ne'e cence ncihi mab̄oha masa'ala ake, d̄i loa nggahi b̄a nahu eded̄u nataho ndaita ro ela-ela Ruma Hatalla makalaina, ranginakai cuma ntauna sab̄uampa rabiasakai ede ade ela Ruma; ari mai b̄a ede wati warana.

¹⁷Mab̄oha ma kento ake, nahu wati roiku nggomid̄oho. Eda angi sambeamu laina mbeimu ma taho, malaisi ma wati taho.

¹⁸Saramba-rambakaina ringa b̄a nahu, b̄a one ade edakai angi menamu wara golonga ma wati ncihi ncao. Ro iu b̄a nahu haba ede napodaku.

¹⁹Wara romo mbi'a ra ncengga d̄i ade weki nggomid̄oho, loakud̄u tadana peade cou-cou dou ela Al Masih masapodakaina.

²⁰Pala wunga kab̄oro weki nggomid̄oho, rakarawi b̄a nggomid̄oho ede laina do'a jamu Ruma.

²¹B̄ara wunga ngaha, nggomid̄oho cua lepi weha ngaha ndaimu, sampe wara ma daraka au-au, pala ma kalai sampe mawuna.

²²B̄ab̄auku ndedekaina? Sab̄ua laina nggomid̄oho mantau uma? Nggomid̄oho maloa ngaha ra nono ta ede! Atao nggomid̄oho mane'e kab̄awa ra katuna ela Ruma Hatalla ro kamaja dou-dou mancoki mori? Auku d̄i pab̄ua nggahi b̄a nahu d̄i nggomid̄oho? Pab̄uaku roi b̄a nahu nggomid̄oho? Wati! Sakali-kali nahu wati d̄imaroi nggomid̄oho.

²³B̄ara ratei b̄a nahu d̄i nggomid̄oho, ede tarima b̄a nahu rad̄i ndai Ruma: b̄a one ai mangad̄i ede wakatu Isa, Ruma ndaita d̄onggo d̄i dou-dou ma musu-Na, Sia wehana roti,

²⁴ro sawa'u b̄a Sia rentana tarima kasi d̄i Ruma Hatalla b̄a roti ede, tob̄e-tob̄e b̄a Sia roti ede kai rima-Na, edempara nggahina, ”Akera sarumbu-Ku rad̄onggo d̄i ru'u nggomid̄oho. Karawipu ake d̄i kawarakaimu Nahu.”

²⁵ Ndede rauja sawa'u b̄a nggori ngaha, weha b̄a Sia piala anggo edempara nggahina, ”Anggo ake eded̄u rasake mab̄ou Ruma Hatalla, rakasaha kai ra'a-Ku. Sanikina nono b̄a nggomid̄oho ake, karawipu lampa rawi ake d̄i kawarakaimu Nahu.”

²⁶Poda sanikina nggomid̄oho ngahamu roti ro nonomu anggo ake, nggomid̄oho ngoa ra kahabamu madekai Ruma, sampe Sia maina.

²⁷B̄ara ndedena, dou ma ngaha roti Ruma atao manono anggo Ruma kai cara ma wati patu, dou ede nadosa d̄i Ruma ma wa'ura koroba sarumbu lab̄o ra'a-Na.

²⁸Ndad̄i, sanikina dou pab̄uaku paresa weki ndai wa'una, ede ampona loa ngaha roti ro nono anggo ede.

²⁹B̄ara dou nangahasi roti ro nono anggo kai wati paresana b̄a one jamu ede mawara d̄apo angi lab̄o sarumbu Ruma, dou ede ngaha ra nono d̄i tarimakaina hukuma Ruma Hatalla d̄i weki ndaina.

³⁰B̄ara ndedena mboto d̄i ade weki nggomid̄oho ma supu ro marome, ro wara rau ma made.

³¹Pala nggara paresa wa'usi b̄a ndaita weki ndai, ndai wati d̄ihukum b̄a Ruma Hatalla.

³²Pala nggara ndai d̄ihukum b̄a Ruma Hatalla, Sia nacamboku ndaita, loakud̄u ndai wati b̄oha b̄a hukuma masama-sama lab̄o dunia ake.

³³B̄ara ndedena, cina ra angiku, nggara kab̄orosi weki nggomid̄oho d̄imangaha wakatu do'a jamu Ruma, nggomid̄oho pab̄uapu cua ngena angi.

³⁴Nggara warasi ma hid̄o, sia pab̄uaku ngaha wa'u d̄i umana. Nggara karawi b̄a nggomid̄oho lampa rawi ake, edakai angi sambeamu wati d̄imakamai kai hukuma rad̄i Ruma Hatalla d̄i weki ndaimu. Mab̄oha masa'ala-masa'ala ma kalai, nahu d̄imangoa kab̄ae nggomid̄oho, nggara maisi nahu peade.