Read Bima 1 KORINTUS 12 Bible Online

1 KORINTUS 12 - Bima bible

1 KORINTUS 12

¹Ake mab̄oha bareka-bareka rambei b̄a Roh Allah. Mab̄oha ede, ne'e b̄a nahu cina ra angiku b̄ade ma sapodakaina.

²Kawarapu b̄a one aipu wakatu nggomid̄oho watipu patamu Ruma, nggomid̄oho b̄oha b̄a pangaru d̄imab̄atu berhala ma mpongi.

³D̄i b̄ade b̄a nggomid̄oho b̄a one dou rad̄ende ra wa'a b̄a Roh Allah wati loana nggahi, ”Ihara Isa!” Ndede rau wati kone sab̄ua dou maloa nggahi, ”Isa eded̄u Ruma!” Nggara dou ede watisi ra d̄ende ra wa'a b̄a Roh Allah.

⁴ Wara mboto pahuna bareka rad̄i Rah Allah, pala sara'ana rambei b̄a Roh ma sab̄uampa.

⁵Wara mboto pahu karawi d̄ikarawi wea d̄i ru'u Ruma, pala Ruma d̄ikarawi wea ede, Ruma ma sab̄ua raumpa.

⁶Wara mboto carana d̄ikarawi wea karawi Ruma, pala ma mbei tenggo ra wale ru'u ede d̄i sanikina dou eded̄u Ruma Hatalla ma sab̄ua raumpa.

⁷D̄i taho kai ndai sara'a, Roh Allah karawi d̄i sanikina dou kai cua-cua ndaina.

⁸D̄i sab̄ua dou, mbei b̄a Roh ede d̄imaloa nuntu kai cara wibawa. D̄i ma kalai mbei b̄a Roh ma sama ede mbeina sanggo d̄i loakaina ngoa ra tei kab̄ae mab̄oha Ruma Hatalla.

⁹Roh ma sab̄ua ede rau mambei d̄i dou ma sab̄ua, loa ma heba poda ru'u imbikai d̄i Al Masih; pala ru'u ma kalai Roh ede mbeina kuasa d̄i katahokai supu dou.

¹⁰D̄i sab̄ua dou rambei kuasa d̄imakarawi b̄isa ra guna ro dimakalai rambei bareka d̄imangoana nia-nia Ruma Hatalla. D̄i ma kalai wali Roh ede mbeina sanggokai d̄imab̄ila-b̄ila ma b̄eku bareka rad̄i Roh Allah ro mab̄eku ma laina. Wara rambei sanggo d̄i manuntu kai mboto pahu bahasa ma b̄isa ra guna, ro wara rau rambei sanggo d̄imangoa ra tei kab̄ae aona bahasa ede.

¹¹Sara'ana ede rakarawi b̄a Roh ma sab̄ua ede raumpa; cua-cua dou rambei bareka ma cua ndaina b̄une rakane'e b̄a ndai Roh ede.

¹² Al Masih eded̄u b̄une sarumbu manusia; sarumbu ede sab̄ua, pala mboto anggota. Sara'a anggota ede, konena mboto, pala sab̄uampa sarumbu.

¹³Ndede rau ndai sara'a, nataho dou Yahudi ro dou laina Yahudi, nataho ada-ada ro dou-dou malaina ada; sara'a ndaita wa'ura kandeu karaso b̄a Roh ma sama, loakud̄u ndai kandad̄ina sab̄ua d̄i sarumbu Al Masih ede. Sara'a ndai rauta iu poda Roh ma sab̄ua ede.

¹⁴B̄ara ndai sarumbu ede wati sab̄ua anggotampa pala mboto anggotana.

¹⁵Nggara nggahisi b̄a ed̄i, ”Nahu laina rima, b̄a ndedena nahu laina anggota sarumbu,” ede laina aona b̄ara ed̄i ede laina anggota sarumbu.

¹⁶Ro nggara nggahisi b̄a fiko, ”B̄ara nahu laina mada, ndad̄i nahu laina anggota sarumbu,” ede rau laina aona fiko ede laina anggota sarumbu.

¹⁷Misakai sara'a sarumbu ede ndad̄ina mada mpoa, b̄uneku sarumbu ede loakaina ringa? Atao sara'a sarumbu ede ndad̄ina fikompa, b̄uneku sarumbu ede loana sangufi?

¹⁸Eda b̄a ndaita b̄a one Ruma Hatalla matoho anggota-anggota ede d̄i sarumbu. Cua-cua tohona d̄i hid̄ina b̄a Ruma Hatalla bune rakane'e ndai-Na.

¹⁹Nggara sara'ana cuma sab̄uampa anggotana, b̄eku d̄ipehekai sarumbu?

²⁰Ndad̄i poda wara mboto anggota, pala sarumbu cuma sab̄uampa.

²¹B̄ara ndedena, mada wati loana nggahi d̄i rima, ”Nahu wati paraluku d̄i nggomi!” atao tuta manggahi d̄i ed̄i, ”Nahu wati paraluku nggomi!”

²²Ndede walija anggota-anggota sarumbu rawi'ikai mapu ede, nawancuku paralu b̄a ndaita;

²³ro anggota-anggota rawi'ikai b̄a ndai wati ipi wara co'ina, ede anggota-anggota d̄i ipi kaco'i b̄a ndaita. Anggota-anggota sarumbu ma wati edamu ntikana, edeku mancewi d̄i kandad̄i au b̄a ndaita.

²⁴Anggota-anggota sarumbu ma wa'ura eda wea ntikana, watid̄u paralu d̄i kandad̄i au b̄a ndai. Ruma Hatalla wa'ura atona sarumbu ndaita ndede pahuna ndad̄ina anggota-anggota ma kura wara co'i d̄i ipi kaco'i.

²⁵Ade ndedekaina sarumbu ede watira ncengga-ncenggana; cua-cua anggota nakandad̄i auku sab̄ua lab̄o makalaina.

²⁶Nggara sab̄ua anggota mancoki, samenana anggota makalai nancoki rau; nggara sab̄ua anggota d̄i roi, samenana anggota makalaina naneo ade rauna.

²⁷Sara'a nggomid̄oho eded̄u sama-sama sarumbu Al Masih ro cua-cua nggomid̄oho rau eded̄u anggota sarumbu ede.

²⁸ Ndede rau ade ela Ruma, Ruma Hatalla wa'ura katantuna hid̄i d̄i cua-cua dou: Tampu'u-mpu'ukaina rasu-rasu; kad̄uakaina nabi-nabi, katolukaina guru-guru, edempara siad̄oho ma karawina mab̄isa ra guna, sawa'u b̄a ede siad̄oho ma d̄i mbei karunia d̄imakataho supu dou, atao d̄imabantu dou makalai, atao d̄imana'ekaina dou, atao d̄imanuntu kai mboto bahasa ma b̄isa ra guna.

²⁹Siad̄oho laina rasu sara'a, atao nabi, atao guru. Wati sara'ana mantau kuasa d̄imakarawi b̄isa ra guna,

³⁰atao d̄imakataho supu dou, atao d̄imanuntu kai mboto bahasa ma b̄isa ra guna, atao d̄imangoa ra tei aona eli bahasa ede.

³¹B̄a ndedena, pab̄uapu usaha kapoda b̄a nggomid̄oho d̄i rakakaimu bareka ma ipi penti. Pala makento ake nahu maturu tei nggomid̄oho ncai ma'ipi taho.