Read Bima 1 KORINTUS 13 Bible Online

1 KORINTUS 13 - Bima bible

1 KORINTUS 13

¹Nahu kone kaloa nuntu kai mboto pahu bahasa manusia, kone kai bahasa mala'eka rau, pala nahu wati meci ra ca'uku dou makalai, ndad̄i nggahi ra eli nahu ede cuma eli ma kancere kai wati wara aona.

² Nahu kone kaloa karongga haba rad̄i Ruma Hatalla, ro kaloa ka'ao sara'a lampa rawi ma ipi d̄ei, ro kab̄ade menaku ro wancuku imbi d̄i Ruma Hatalla sampe loaku rungka ngge'e doro, pala nahu wati meci ra ca'uku dou makalai, ndad̄i nahu wati wara one podana.

³Kone sara'a ntau nahu, sadekakai b̄a nahu d̄i dou mancoki mori, ro d̄onggo b̄a nahu weki ndaiku d̄i ka'a, pala nahu wati meci ra ca'uku dou-dou makalai, ndad̄i sara'ana ede wati wara poda onena.

⁴Dou ma meci ra ca'u dou-dou makalai saba lab̄o taho adena. Sia wati ipi wu'u adena, wati nuntuna mab̄iko b̄ako, wati sombo.

⁵Sia wati sombona, wati kasa, sia wati pakasana dou makalai d̄imab̄atu rakane'e b̄a ndaina, sia wati roci iha adena, ro wati wi'ina d̄ei adena au rarawi dou.

⁶Dou ma meci ra ca'u dou makalai, wati ca'una ma'iha ro madab̄ae, sia cuma sanampa d̄i rawi mataho.

⁷Sia nawa'uku taha d̄i samenana ro nane'e imbi d̄imataho poda d̄i sanikina dou; ade ka'ada'an ma b̄une b̄e rau dou ma meci ra ca'u ede wati parana mbora rane'ena ro nasaba ngena d̄i sara'ana au-au.

⁸Wati parana d̄imawara wakatu dou cua daca'u ro damecikaina angi. Wakatu ake wara dou ma loa karongga haba rad̄i Ruma Hatalla, pala pea sia d̄imadengga karongga haba ede. Ake wara ma loa nuntu kai mboto pahu bahasa ma b̄isa ra guna, pala pea sia d̄imadengga nuntu kai bahasa-bahasa ede. Ake wara dou ma b̄ade mboto pahuna lampa rawi, pala pea au rab̄ade b̄a siad̄oho ede d̄i nefana.

⁹B̄ara, loa ra tingi ndaita ro sanggo b̄a ndai d̄imakarongga haba rad̄i Ruma Hatalla, mbuipu kura tahona.

¹⁰Pea d̄imaraka wakatuna Ruma Hatalla makandad̄i sara'ana sampuruna, ro ma wati sampuruna ede d̄imambora.

¹¹Aipu nahu mbuipu to'iku, nahu nuntuku b̄une ana dou to'i, nahu ka'iu b̄une ana dou to'i, ro nahu kananuku b̄une ana dou to'i. Ake nahu wa'ura na'e, ruku ra rawiku ma b̄une ana dou to'i wa'ura pakiku.

¹²Au ra'eda b̄a ndaita wakatu ake eded̄u b̄une ninu ma gawu d̄i saninu. Pala pea ndai d̄ima'eda kab̄ae lalo. Ake nahu watipu b̄ade sara'aku, pala pea nahu d̄imab̄ade sara'a sama b̄une Ruma Hatalla mab̄ade sara'a mab̄oha weki nahu.

¹³Ndad̄i, ru'u wakatu ake wara tolu mbua lampa rawi d̄i pab̄ua ngge'empa d̄i karawi b̄a ndaita: imbi, pamao ro cua meci ra ca'u angi. Ma ipi penti poda rad̄i tolu mbua ede eded̄u meci ra ca'u dou-dou makalai.