Read Bima 1 KORINTUS 15 Bible Online

1 KORINTUS 15 - Bima bible

1 KORINTUS 15

¹Ro ake, cina ra angi ne'e b̄a nahu nggomid̄oho kawara mbalimu d̄i Haba Mataho rad̄i Ruma Hatalla rangoa ra kahaba b̄a nahu ntoina d̄i nggomid̄oho. Nggomid̄oho tarimamu ro imbimu d̄i Al Masih b̄ara Haba Mataho ede.

²Nggara nggomid̄oho nenti kapodamu d̄i au rangoa ra kahaba b̄a nahu ede, ndad̄i Haba Mataho ede makasalamana nggomid̄oho; selasi nggomid̄oho imbi kai wati loamu ka'ao.

³ Au rakarongga b̄a nahu d̄i cinad̄oho eded̄u rawa'u tarima rau b̄a nahu. Ma penti poda, b̄une ratunti ade Alkitab, nahu karonggaku d̄i nggomid̄oho b̄a one Al Masih madena b̄ara dosa-dosa ndaita;

⁴ b̄a one Sia d̄i umbu, pala sawa'u b̄a ede d̄ikamori mbali d̄i ainaina katolukaina. Ede ratunti rau ade Alkitab.

⁵ Nahu ngoa rauku nggomid̄oho b̄a one Al Masih ra kamori mbali ede katada rauna weki-Na d̄i la Petrus, ro sawa'u b̄a ede d̄i sampuru d̄ua rasu.

⁶Sawa'u b̄a ede Sia katadana weki rau d̄i ncewi lima ratu dou anamori-Na sakali lalo. Mboto rad̄i doud̄oho ede mbuipu morina ake, cuma pila-pila doumpa ma wa'ura made.

⁷Sawa'u b̄a ede Al Masih katada rauna weki d̄i la Yakub ro sawa'u b̄a ede d̄i sara'a rasu.

⁸ Macumpukai podana Sia katadana weki d̄i nahu rau — nahu b̄une ana dou to'i ranggana watipu raka wakatuna!

⁹ Nahu eded̄u rasu Ruma ma sumpu awana. Nahu wati patuna d̄ipehekai rasu, b̄ara nahu wa'ura kancokiku ela Ruma Hatalla.

¹⁰Pala b̄ara rahama Ruma Hatalla nahu ndad̄ikaiku b̄une ka'ada'ana ake. Ro wati lao ncauna Ruma Hatalla kangampu weana nahu. Mala nahuku ma karawi kapoda ade ntewi kaisi sara'a rasu ma kalai. Pala ede sapodakaina laina ra'usaha nahu; ede ra'usaha Ruma Hatalla ma meci ra ca'u nahu ro ma karawi sama lab̄o nahu.

¹¹Ndad̄i, rad̄i cou-cou rau nggomid̄oho tarimamu Haba Mataho ede — sab̄ua ede rad̄i nahu atao rad̄i rasu-rasu ma kalai — ede wati b̄unena. Ma penti eded̄u nami ngoa ra kahabamu Haba Mataho ede ro nggomid̄oho imbimu.

¹²Nggara rangoa ra kahaba b̄a nami ede eded̄u b̄a one Al Masih wa'ura kamori mbali rad̄i madena, b̄ab̄auku d̄i ade weki nggomid̄oho warakai ma nggahi b̄a one dou mamade wati d̄ikamori mbali?

¹³Nggara podasi dou mamade wati d̄ikamori mbali, ede aona Al Masih rau wati rakamori mbali rad̄i madena.

¹⁴Ro nggara Al Masih wati rakamori mbali rad̄i madena, ndad̄i wati wara onena nami ngoa ra kahabamu au-au ro wati wara one rauna nggomid̄oho imbimu, b̄ara ra'imbimu ede wati ntauna dasa au-au.

¹⁵Ncewi ese mai b̄a ede, natada b̄ara nami macowa mab̄oha Ruma Hatalla, b̄ara nami ngoa ra kahabamu b̄a one Ruma Hatalla wa'ura kamori mbalina Al Masih rad̄i madena, sapodakaina Ruma Hatalla wati kamori mbalina Sia — nggara podasi dou mamade wati d̄ikamori mbali!

¹⁶B̄ara nggara dou mamade wati d̄ikamori mbali, ndad̄i Al Masih rau wati d̄ikamori mbali rad̄i madena.

¹⁷Ro nggara Al Masih wati d̄ikamori mbali ndad̄i imbimu ede hampa b̄a kane'e b̄a ndai mpoampa; ede aona nggomid̄oho mbuipu d̄ei ka'ada'ana dosa ro wati ntaumu ne'e sama sakali.

¹⁸Ede ao rauna b̄a one dou-dou ela Al Masih ma wa'ura made, wati wara rau d̄i rakana.

¹⁹Nggara pamao ndai d̄i Al Masih hampa b̄a mori ndai ade dunia ake mpoa, ndad̄i rad̄i sara'a ela manusia d̄i ade dunia ake, ndaira ma ipi ncoki ru'u!

²⁰Pala Al Masih wa'ura kamori mbali rad̄i madena. Akeku d̄i nenti b̄a one dou-dou ma wa'ura made d̄ikamori mbali.

²¹B̄ara made lu'una d̄ei dunia kai kanina sab̄ua dou, ndede rauja mori mbali rad̄i made d̄i mbei d̄i manusia kai kani sab̄ua dou rau.

²²B̄une samenana manusia made b̄ara sab̄ua golonga lab̄o la Adam, ndede rau sara'a d̄ikamori, b̄ara lu'u d̄i sab̄ua golonga lab̄o Al Masih.

²³Pala cua-cua d̄i kamori b̄atu gilirana: Saramba-rambana Al Masih; sawa'u b̄a ede wakatu Sia mai mbalina peade, b̄atu b̄a gilira dou-dou ma lu'u ntau Al Masih.

²⁴Edempara rakara wakatu cumpukaina, eded̄u nad̄onggosi b̄a Sia Karaja'an d̄i Ruma Hatalla Ama-Na, sawa'u b̄a Sia kalelina sara'a pamarenta, sara'a kuasa ro sara'a tenggo ra wale; edempara Sia d̄onggona kuasana d̄i Ruma Hatalla, Ama-Na.

²⁵ Al Masih pab̄ua parenta ncau sampe Ruma Hatalla ndawina sara'a musu Al Masih okona d̄i Al Masih.

²⁶Musu ma cumpukai d̄ikakoa eded̄u made.

²⁷ Ade Alkitab ratunti b̄une ake, ”Ruma Hatalla wa'ura ndawina samenana au-au oko d̄i Sia.” Tadara b̄a one ranggahi ”samenana au-au” ede wati lu'u ndai Ruma Hatalla, ma randawi samenana ede oko d̄i Al Masih.

²⁸Pala sawa'u b̄a samenana d̄i kakoa d̄iparentakai b̄a Al Masih, ndad̄i ndai Sia, eded̄u Ana Ruma Hatalla, d̄ima'oko weki-Na d̄i Ruma Hatalla ma rawa'u ndawi samenana na'oko d̄i Sia. Ndad̄i ndai Ruma Hatalla rau d̄imaparenta sara'ana.

²⁹Nggara dou mamade wati d̄ikamori mbali, b̄ab̄auku warakaina dou d̄i kandeu karaso ru'u dou mamade? D̄i aukaina siad̄oho karawikaina lampa rawi ede? Nggara podasi dou mamade wati d̄ikamori mbali sama sakali wati d̄i kamori mbali, d̄i aukaina siad̄oho karawikaina lampa rawi ede?

³⁰Ro d̄i aukai rau nami ne'emu ncao ntando lab̄o bahaya sanikina wakatu?

³¹Cina ra angi! Sanikina ainaina nahu kawa'u taha susa ra ncoki b̄ara nahu bangga d̄i mori ra wokomu b̄ara nggomid̄oho wa'ura imbimu d̄i Ruma Isa Al Masih, Ruma ndaita.

³² Nggara ede cuma ta manusia mpoa, auku ncewina d̄i ru'u b̄a nahu d̄i lewakaiku b̄une-b̄uneta aoku lab̄o binata-binata mambani d̄i kota ake, d̄i Efesus? Nggara podasi dou mamade wati d̄i kamori mbali, nancewi tahopu ndai b̄atuta pribahasa ake: ”Mai ndai tangaha ra nono ro kad̄ihi-d̄ihi ade, b̄ara naisi ndaita made.”

³³Aina b̄ohakai b̄a keko! Rewo ma dab̄ae naka'ihaku ruku ra rawi ma taho.

³⁴Kawarapu wekimu ake, ro aina karawi dosa wali. Nggomid̄oho pab̄uapu maja, b̄ara ade wekimu wara ma watipu pata Ruma Hatalla.

³⁵Kombisi wara ma sod̄i, ”B̄uneku dou mamade d̄i kamori mbali? Sarumbu ma b̄uneku d̄imbei d̄i siad̄oho, sawa'u b̄a siad̄oho d̄i kamori mbali?”

³⁶Sampula poda! Nggara nggomid̄oho nggud̄amu d̄ei d̄i ade dana, d̄ei ede wati d̄imawoko, nggarasi d̄ei ede watipu made wa'una.

³⁷Ro d̄ei ranggud̄a b̄a nggomid̄oho d̄i ade dana ede — kombisi d̄ei gando atao d̄ei makalai — eded̄u isi d̄ei ede mpoa, laina sara'a ranggud̄a ra congge d̄imawoko peade.

³⁸Ndai Ruma Hatalla d̄imambei d̄i ru'u d̄ei ede pahu ma b̄une rantanda-Na ede taho d̄i ru'u nggud̄a ra congge ede. Ru'u saniki pahu d̄ei, Ruma Hatalla mbeina pahu nggud̄a ra congge-Na cua-cua ndaina.

³⁹Sarumbu mahluk samenana ma ntau nawa wati sara'ana sama. Manusia nantau sab̄ua pahu sarumbu, binata-binata nantau pahu sarumbu ma kalai; nasi-nasi nalai wali pahu sarumbuna, ro uta-uta nalai wali pahu sarumbuna.

⁴⁰Ndede rau lab̄o sara'a ma wara ese langi ro sara'a ma wara d̄i dana. Sara'a ma wara ese langi cua-cua ntika ndaina, ro sara'a ma wara d̄i dana ndede rau.

⁴¹Ntikana liro wati samana lab̄o ntikana wura. Ntara-ntara rau nantau ntika ndaina, mala ntara-ntara ede cua-cua lai rau ntikana.

⁴²Ndedeku lampa rawina peade lab̄o dou-dou ma made rakamori mbali. Sarumbu ra'umbu ede eded̄u sarumbu ma loa mbai, pala sarumbu rakamori mbali, eded̄u sarumbu madaloa iha.

⁴³Wunga wakatu sarumbu ede d̄i umbu, sarumbu ede wati ntikona ro mapu; pala wakatu sia d̄i kamori mbali, sia eded̄u sarumbu ma ntika ro tenggo.

⁴⁴Wakatu d̄i umbu, sarumbu ede sarumbu rad̄i dunia; pala sawa'u b̄a mori mbali, ndad̄i sarumbu ede sarumbu rambei b̄a Roh Allah. Wara sarumbu ma rad̄i dunia, wara rau sarumbu ma rad̄i Ruma Hatalla.

⁴⁵ Ade Alkitab ratunti b̄une ake, ”Manusia ma sarambakaina, eded̄u la Adam, ndad̄i mahluk ma mori,” pala la Adam ma cumpukaina eded̄u Roh ma mbei mori.

⁴⁶Ma mai ulu poda eded̄u sarumbu kasa, laina ma roh ra nawa. Ma roh ra nawa mai kentona.

⁴⁷La Adam ma sarambakaina rakandad̄i kai dana, pala la Adam ma kad̄uakaina maina rad̄i saroga.

⁴⁸Dou-dou dunia ake eded̄u b̄une la Adam ma sarambakaina, rakadand̄i kai dana, pala dou-dou saroga eded̄u b̄une Sia ma mai rad̄i saroga.

⁴⁹B̄une santika ndai ake eded̄u b̄une la Adam rakandad̄i kai dana, ndad̄i peade ndai d̄imandad̄i b̄une Sia ma rad̄i saroga ede.

⁵⁰Aona nggahi nahu, cina ra angi eded̄u: sarumbu rakandad̄i kai ra'a ra hi'i, wati loana lu'u d̄ei Karaja'an Allah; ro sarumbu ma loa made wati loana d̄imandad̄i ederahid̄i.

⁵¹ Tio kab̄aepu rahasia ake: Wati sara'ana ndai d̄imamade, pala ndai sara'ana d̄imarungka weki.

⁵²Lampa rawi ede d̄imandad̄i sadeka ade saped̄a mada, wunga wakatu tarompe d̄i ka'eli ru'u cumpukaina. B̄ara wunga wakatu ringamu eli tarompe ede, dou-dou mamade d̄i kamori mbali kai sarumbu ma ederahid̄i, ro ndai sara'ana d̄i rungka.

⁵³Sarumbu ndai ma loa made ake pab̄ua d̄i cepe kai sarumbu d̄imadaloa made, ro sarumbu ma rad̄i dunia pab̄ua d̄i cepe kai sarumbu ma rad̄i saroga.

⁵⁴ Nggara sarumbu ma loa made wa'ura cepe kai sarumbu ma daloa made, ro sarumbu ma rad̄i dunia wa'ura cepe kai sarumbu ma rad̄i saroga, d̄i wakatu ede ampona ndad̄i au rawa'u tunti ade Alkitab, ”Made wa'ura kambora; ngolu wa'ura raka!”

⁵⁵ ”Oe made, tab̄eku ngolumu? Oe made, tab̄eku warimu?”

⁵⁶Wari made eded̄u dosa, ro dosa nakalampaku kuasanakai hukum agama.

⁵⁷Pala syuku d̄i Ruma Hatalla; Sia mbeina d̄i ndai ngolu kai ncai Isa Al Masih, Ruma ndaita!

⁵⁸B̄ara ndedena, cina ra angi rameciku, pab̄uapu nggomid̄oho tenggo ro kante'e. Karawi ncaupu d̄i ru'u Ruma kai kapoda ade, b̄ara nggomid̄oho mamade b̄a one sara'a rakarawi b̄a nggomid̄oho d̄i ru'u Ruma, wati mpoana.