Read Bima 1 KORINTUS 2 Bible Online

1 KORINTUS 2 - Bima bible

1 KORINTUS 2

¹Cina ra angi! Aipu nahu maiku d̄i nggomid̄oho ro ngoa ra kahabaku d̄i nggomid̄oho mab̄oha nia Ruma Hatalla ma watipu b̄ade b̄a dunia, nahu wati kaniku timba ra lemba dunia ake atao nuntu ra nggahiku ma caru-caru.

²B̄ara nahu wa'ura nia poda b̄a adeku b̄a one salama nahu wara sama-sama lab̄o nggomid̄oho, nahu wati d̄imangoa au-au, selasi mab̄oha Ruma Isa Al Masih; b̄a one Sia wa'ura made d̄i salib.

³ Wakatu nahu wara ade woha nggomid̄oho, nahu mapu ra rome ro b̄ib̄i b̄a dahuku.

⁴Haba rakarongga b̄a nahu d̄i nggomid̄oho wati rakarongga b̄a nahu kai nggahi ra eli ma loa weha ade b̄atu timba ra lemba manusia. Nahu karonggaku ede kai cara ma bukutina b̄a one Roh Allah mantau kuasa.

⁵Nahu karawi ndedekaiku, loakud̄u imbi nggomid̄oho d̄i Al Masih wati kai dasa timba ra lemba manusia, malaisi kai dasa kuasa Ruma Hatalla.

⁶Konena ndede, d̄i ade weki dou-dou ma mori ra woko imbina wa'ura tenggo poda, nahu poda ranuntuku mab̄oha loa timba ra lemba. Pala timba ra lemba ake laina timba ra lemba dunia, atao timba ra lemba dou-dou ma kuasa jamana ake, ma kuasana d̄imambora.

⁷Timba ra lemba rakatada b̄a nahu ede, eded̄u timba ra lemba rad̄i Ruma Hatalla. Timba ra lemba ede wati b̄ade b̄a dunia, pala Ruma Hatalla wa'ura sadiana d̄i ru'u sana taho ra ntaikai ndaita sawatipu kandad̄ina dunia ake.

⁸Wati wara kone sab̄ua dou d̄i ade weki dou-dou makuasa jamana ake ma b̄ade mab̄oha timba ra lemba ede. B̄ara, nggara nawa'usi b̄ade b̄a siad̄oho tantu siad̄oho wati d̄imasalib Ruma ma d̄ese ra ntasa ede.

⁹ Pala mapoda lampa rawi ede eded̄u b̄une ratunti ade Alkitab, ”Au rawati parana eda ro ringa b̄a manusia, ro wati parana wontu rauna ade fiki ra kananu manusia, edeku d̄i sadia wea b̄a Ruma Hatalla d̄i ru'u b̄a dou-dou ma meci ra ca'u Sia.”

¹⁰Pala Ruma Hatalla wa'ura katadana d̄i ndaita kai kanina Roh-Na. Roh Allah ede natio kab̄aeku samenana au-au, sampe d̄i nia Ruma Hatalla kone ma ipi cili weki rau.

¹¹B̄ara ma b̄ade isi ade sab̄ua-b̄ua dou eded̄u roh ndai dou ede. Ndede rau mab̄oha Ruma Hatalla. Ma b̄ade isi ade Ruma Hatalla eded̄u Roh ndai Ruma Hatalla!

¹²Ro ndai wati rambei roh dunia ake, malaisi Roh rad̄i Ruma Hatalla, loakud̄u b̄ade sara'a b̄a ndaita rambei b̄a Ruma Hatalla d̄i ru'u ndaita.

¹³B̄ara ndedena, ngoa kab̄aesi b̄a nami lampa rawi mab̄oha Ruma Hatalla d̄i dou-dou ma ntau Roh Allah, nami wati ngoa ra katadamu b̄atu timba ra lemba manusia, malaisi b̄atu ngoa ra tei b̄a Roh Allah.

¹⁴Dou ma wati ntau Roh Allah, wati loana tarima au rakatada b̄a Roh ede. B̄ara ru'u dou ede lampa rawi-lampa rawi ede b̄une lampa rawi masampulampa. Dou ede wati loana ka'ao, b̄ara lampa rawi-lampa rawi ede cuma loa d̄i nilai kai ade maraso.

¹⁵Dou ma ntau Roh Allah naloa nilai samenana au-au, pala wati wara kone sab̄ua dou maloana nilai sia.

¹⁶ Ade Alkitab ratunti; ”Couku ma b̄ade fiki ra kananu Ruma? Ro couku maloa ngoa ra tei kataho Sia?” Ndaimpa ma ntau fiki ra kananu ma sama lab̄o Al Masih!