Read Bima 1 KORINTUS 3 Bible Online

1 KORINTUS 3 - Bima bible

1 KORINTUS 3

¹Cina ra angi, sapodakaina nahu wati loaku nuntu ra nggahi lab̄o nggomid̄oho b̄une lab̄o dou mantau Roh Allah. Nahu cuma loa nuntu ra nggahi lab̄o nggomid̄oho b̄une lab̄o dou ma mbuipu mori b̄atu kane'e dunia; b̄une dou ma mbuipu to'i kea ade imbina d̄i Al Masih.

² Ntoina nahu cuma loaku mbei d̄i nggomid̄oho ngaha ra nono d̄i ru'u b̄a ana dou to'i kea, laina ngaha ra nono dou mana'e; b̄ara nggomid̄oho watipu tenggo tahomu d̄i ru'u b̄a ede. Pala ake rau nggomid̄oho mbuipu wati tenggomu d̄i ru'u b̄a ede,

³b̄ara nggomid̄oho mbuipu mori b̄atumu tabe'a manusia. B̄ara nggara nggomid̄oho mbuipu hiana ade ro ncao lab̄o sab̄ua lab̄o sab̄ua dou, ede natei katadaku b̄a one nggomid̄oho mbuipu mori b̄atumu tabe'a manusia, b̄une dou-dou ma watipu pata Ruma Hatalla?

⁴ Nggara warasi ma nggahi, ”Nami b̄atu la Paulus,” ro ma kalai manggahi, ”Nahu b̄atu la Apolos,” sab̄ua ede laina nakatadaku b̄a one nggomid̄oho ruku ra rawimu b̄une dou-dou dunia?

⁵Sapodakaina cousi la Apolos ede? Ro cousi la Paulus? Nami cuma ada ra ela Ruma Hatalla, ma wa'ura d̄ende ra wa'a nggomid̄oho ru'u imbikaimu d̄i Al Masih. Nami cuma kalampamu taki rambei b̄a Ruma Hatalla d̄i cua-cua ndai nami.

⁶ Nahu manggud̄a la Apolos mab̄uina, pala ndai Ruma Hatalla ma kawokona ranggud̄a ra congge.

⁷Ndad̄i ma penti eded̄u Ruma Hatalla, b̄ara Siaku ma kawokona. Ma nggud̄a ro ma b̄uina wati pentina;

⁸d̄uana ede samampa. Cua-cua d̄imatarima ufa mancihi ncao lab̄o ramakina.

⁹Nami eded̄u dou-dou ma sama-sama karawi d̄i ru'u Ruma Hatalla; ro nggomid̄oho eded̄u b̄une oma Ruma Hatalla. Nggomid̄oho eded̄u b̄une gedu Ruma Hatalla rau.

¹⁰Kai loamu rambei b̄a Ruma Hatalla, nahu kai maloa poda tu'u uma wa'ura tohoku dasa d̄i ru'u uma ede, ro dou makalai matu'u uma ese wawo dasa ede. Sanikina dou pab̄uaku tio kab̄aena b̄uneku sia tu'una ese wawo dasa ede.

¹¹B̄ara ndai Ruma Hatalla wa'ura toho wi'ina Ruma Isa Al Masih kai sab̄uampa dasa d̄i ru'u uma ede; wati wara dasa ma kalai.

¹²Wara ma katu'u ese wawo dasa ede kai kanina masa, wara ma kani salaka, wara ma kani wadu mata, wara rau ma kani haju, mpori mango atao rapa.

¹³Hasi rakarawi b̄a sanikina dou d̄imatada pea wakatu Al Masih mai mbalina. B̄ara ainaina ede afi d̄imakandad̄ina hasi rakarawi b̄a cua-cua dou d̄imatada. Afi d̄ima'uji ro makatantuna taho ra ihana hasi rakarawi ede.

¹⁴Nggara uma ratu'u b̄a dou ese wawo dasa ede tahana raka'a b̄a afi, dou ede d̄imatarima hadiana.

¹⁵Pala nggara hasi rakarawi b̄a dou ede ngga'ana, sia d̄imarugi; ndai sia d̄imasalama, pala b̄une dou ma losa lampa b̄atu afi.

¹⁶ Sab̄ua mab̄ade b̄a nggomid̄oho b̄a one nggomid̄oho eded̄u Bait Allah? Ro b̄a one Roh Allah mangge'e d̄ei ade nggomid̄oho?

¹⁷Nggara warasi dou ma ka'iha Bait Allah, Ruma Hatalla rau d̄imaka'ihana dou ede. B̄ara Bait Allah eded̄u rakalai d̄i ru'u Ruma Hatalla mpoampa, ro nggomid̄ohoku uma ede.

¹⁸Aina wara kone sab̄ua dou makeko weki ndaina. Nggara warasi dou d̄i ade weki nggomid̄oho ma'iu wekina loa timba ra lemba b̄atu ukura dunia ake, dou ede pab̄uaku ndad̄i sampulana, loakud̄u sia ndad̄i poda-poda loa timba ra lemba.

¹⁹ B̄ara rawi'ikai b̄a dunia loa timba ra lemba eded̄u sampula d̄i ntanda b̄a Ruma Hatalla. Ade Alkitab ratunti, ”Ruma Hatalla makumpana dou-dou maloa timba ra lemba ade loa ra b̄ade ndai siad̄oho.”

²⁰ Wara ra tunti ndake rau, ”Ruma nab̄adeku b̄a one fiki ra kananu dou-dou maloa timba ra lemba eded̄u fiki ra kananu ma wati wara onena.”

²¹B̄ara ndedena, aina wara kone sab̄ua dou maroi ro hanta manusia, b̄ara samenana wa'ura mbei ndad̄i ntaumu:

²²la Paulus, la Apolos, la Petrus, dunia ake, mori ra woko ro made, jamana ake atao jamana ma kento, samenana eded̄u ntaumu.

²³Ro nggomid̄oho eded̄u ntau Al Masih, ro Al Masih ntau Ruma Hatalla.