Read Bima 1 KORINTUS 5 Bible Online

1 KORINTUS 5 - Bima bible

1 KORINTUS 5

¹ Nahu sapodakaina wa'ura tarimaku ncundu b̄a dou b̄a one ade weki nggomid̄oho wara rawi masampu ra nggele ma wa'ura ipi lalo: Wara rad̄i weki nggomid̄oho ma jina lab̄o ina cempena. Dou-dou ma wati pata Ruma rau wati karawina b̄une ede!

²Konena ndede, nggomid̄oho mbuipu ese ademu. Sapodakaina nggomid̄oho pab̄uaku ncoki ade, ro kalosapu ra'ade woha nggomid̄oho dou ma karawi lampa rawi ede.

³Kai sarumbu kasa nahu d̄o'o rad̄i nggomid̄oho, pala kai ade mpida nahu wara d̄i woha nggomid̄oho. Ndad̄i, nahu ne'eku karawi b̄une-b̄uneta nahu wara d̄i woha nggomid̄oho, ”Kai ngara Ruma Isa Al Masih, nahu makatadana b̄a one dou ma wa'ura karawi-rawi ma ndede ipi sampu ra nggele, pab̄ua d̄i hukum!” Nggara nggomid̄oho kab̄orosi wekimu, wi'ikaipu nahu wara d̄i woha nggomid̄oho, ro kai kuasa Ruma ndaita Isa,

⁵pab̄uapu d̄onggo b̄a nggomid̄oho dou ede d̄i ru'u b̄a Ibilis loakud̄u sarumbu dou ede lelina ro ade ndedekaina rohna d̄ikasalama wakatu Ruma mai mbalina.

⁶ Wati patuna nggomid̄oho iumu sombo. Kombisi nggomid̄oho wa'ura b̄ademu ranggahi b̄a dou matua-tua, ”B̄uha ma sato'i nakandad̄iku sara'a rancambu ndad̄i teka!”

⁷ Paki wa'upu b̄uha ma ntoi ede, eded̄u b̄uha dosa, loakud̄u nggomid̄oho ndad̄i b̄une adona ma b̄ou, raso rad̄i b̄uha dosa ma ntoi, ro nahu kab̄ade b̄a one nggomid̄oho poda ndedemu. B̄ara, Aruraja Paskah ndai wa'ura sadia, b̄ara Al Masih ma ndad̄i jimba Paskah ndaita, wa'ura korobakai.

⁸ Ndad̄i, mai ndaita kandihaku ngaha Aruraja ndai ede kai roti ma wati wara b̄uha, eded̄u roti ma ndad̄i tanda raso ra asalina lab̄o sara'a ma ncihi ncao d̄i ade Ruma Hatalla. Aina ndai kandihata Aruraja Paskah ede kai roti ma wara b̄uha ma ntoi, eded̄u b̄uha dosa ro rawi ma'iha ra dab̄ae.

⁹D̄i ade sura nahu ma uluna, ngoa b̄a nahu d̄i nggomid̄oho loakud̄u aina rewomu lab̄o dou masampu ra nggele.

¹⁰Ma Aona nggahi nahu laina dou masampu ra nggele atao mana'e ade, atao makukukeko atao manemba berhala masama sakali wati patana Ruma Hatalla. Laina! Nahu laina makasuku d̄i siad̄oho; b̄ara nggara nggomid̄oho pab̄ua kad̄o'omu weki lab̄o siad̄oho, ndad̄i tantu nggomid̄oho paralu losa mpoimu rad̄i dunia ake.

¹¹Aona nggahi nahu eded̄u, nggomid̄oho aina rewo lab̄omu dou ma mangaku wekina dou ela Al Masih, pala dou ede masampu ra nggele, atao na'e ade, atao manemba berhala, atao maca'u nuntu ka'iha dou makalai, atao maca'u mawu, atao mampanga. Kone doho ngaha lab̄o dou ede ai rauna!

¹² Poda paresa ncihi ra ncara dou-dou malaina ela Al Masih ede laina urusan nahu. Ndai Ruma Hatalla d̄imaparesa ncihi ra ncara siad̄oho. Pala mab̄oha anggota-anggota elamu, sab̄ua laina ndai nggomid̄ohosi d̄imaparesa ncihi ra ncara siad̄oho? Ade Alkitab ratunti, ”Katesapu dou ma'iha ra dab̄ae d̄i ade weki nggomid̄oho.”