Read Bima 1 KORINTUS 6 Bible Online

1 KORINTUS 6 - Bima bible

1 KORINTUS 6

¹B̄ab̄au warakaina d̄i ade weki nggomid̄oho ma disa lao aka hakim ma wati pata Ruma Hatalla, d̄i da'awakaimu cina ra angi masama imbi, nggara sia nancaosi lab̄o cinana ede? B̄ab̄auku sia wati rahokaina ela Ruma Hatalla makanggorina parakara ede?

²Sab̄ua nggomid̄oho wati b̄ademu b̄a one ela Ruma Hatalla d̄imaparesa ncihi ra ncara dunia ake? Ndad̄i, nggara podasi nggomid̄oho d̄imaparesa ncihi ra ncara dunia ake, sab̄ua nggomid̄oho wati sanggomu kanggori parakara-parakara pengadila ma wati wara aona?

³Sab̄ua nggomid̄oho wati b̄ademu b̄a one ndai d̄ima'adina mala'eka-mala'eka? Ncewi wali parakara mori ra woko sanai-nai!

⁴Ndad̄i nggara wontusi parakara-parakara b̄une ede, sab̄ua nggomid̄oho mada'awaku d̄i dou-dou ma wati wara b̄ora sama sakali ade ela Ruma?

⁵Wancuku kamaja weki! Tantu d̄i ade weki nggomid̄oho wara sab̄ua dou ma loa poda timba ra lemba d̄imakanggori cence ncihi d̄i weki nggomid̄oho ma sama-sama ela Al Masih!

⁶Pala d̄i ade weki nggomid̄oho malo'o ra da'awa parakara cinamu masama-sama imbi d̄i dou ma laina ela Al Masih!

⁷Aina kone lao wa'a parakaramu d̄i dou malaina ela Al Masih; warana cence ncihi d̄i ade weki nggomid̄oho wa'ura ndad̄i koa d̄i ru'u nggomid̄oho. Nancewi tahopu karawina d̄i nggomid̄oho mawati adi, atao karugina!

⁸Pala ndai nggomid̄oho ma karawi d̄i dou makalai kai wati adi. Ndai nggomid̄oho rauku ma karugi dou makalai. Ro ede karawi b̄a nggomid̄oho d̄i cina ra angimu masama imbi!

⁹Sab̄ua mab̄ade b̄a nggomid̄oho b̄a one dou-dou ma wati b̄atu kane'e Ruma Hatalla, wati d̄imandad̄i anggota Karaja'an Allah? Aina b̄ohakai b̄a tipu! Dou-dou ma karawi sampu ra nggele, dou-dou ma nemba berhala, ma jina, makarawi lampa rawi d̄imajakai d̄i sama siwe atao sama mone,

¹⁰ma mpanga, ma na'e ade, ma ca'u nono d̄i mawukai, ma ca'u nuntu ka'iha dou makalai, ro ma gisi ntau dou makalai — samenana dou b̄une ede wati d̄imandad̄i anggota ela Karaja'an Allah.

¹¹Pila-pila dou d̄i ade weki nggomid̄oho ntoina ruku ra rawimu b̄une ede. Pala ake nggomid̄oho wa'ura cola wea, d̄ikaraso rad̄i dosa ro d̄i kancihi d̄i ade ngara Ruma Isa Al Masih ro b̄ara kuasa Roh Allah.

¹² Wara ma nggahi b̄a one sanikina dou loa karawi sara'a au-au. Pala d̄i ru'u b̄a nahu wati sara'ana mawara one. Ndad̄i konena nahu loa karawi au-au, pala nahu wati ne'eku co'o sarumbuku d̄i kuasakai b̄a au-au.

¹³Wara rau ma nggahi b̄a one ngaha ra nono eded̄u d̄i ru'u b̄a loko, ro loko rasadia ru'u ngaha ra nono. Pala sara'a d̄uana ede d̄i kani kambora b̄a Ruma Hatalla. Sarumbu manusia wati loa d̄ikani ru'u warakai campo angi ma sampu ra nggele, pala cuma ru'u karawi wea d̄i ru'u Ruma. Ro Ruma d̄imajaga ra sandaka sarumbu ede.

¹⁴Ruma Hatalla wa'ura kamorina Ruma Isa rad̄i madena, ndede rau Ruma Hatalla d̄imakamori ndaita kai kuasa-Na.

¹⁵Cina ra angi mab̄adeku b̄a one sarumbumu eded̄u anggota sarumbu Al Masih. Ndad̄i, sab̄ua loaku nahu maweha sab̄ua anggota sarumbu Al Masih edempara kandad̄i kai anggota sarumbu sab̄ua dou masunda? Sakali-kali wati!

¹⁶ Atao kombi nggomid̄oho watipu b̄ademu b̄a one dou ma campo lab̄o sab̄ua dou masunda, nandad̄i sab̄ua lab̄o dou masunda ede! B̄ara ade Alkitab ratunti, ”D̄uana ede nandad̄i sab̄ua.”

¹⁷Pala dou ma kasab̄ua wekina lab̄o Ruma, Roh Ruma lab̄o roh dou ede nandad̄i sab̄ua.

¹⁸Kad̄o'o lab̄opu wekimu ruku ra rawi ma sampu ra nggele. B̄ara sara'a dosa makalai rakarawi b̄a dou, ndad̄ina ari mai b̄a sarumbu dou ede. Pala dou ma karawi ma sampu ra nggele, aona karawina dosa d̄i ru'u b̄a sarumbu ndaina.

¹⁹ Nggomid̄oho pab̄uapu b̄ademu b̄a one sarumbumu eded̄u hid̄i ngge'ekai Roh Allah. Roh ede ngge'e d̄ei nggomid̄oho. Ro ndai Ruma Hatalla ma mbei Roh ede d̄i nggomid̄oho. Sarumbu nggomid̄oho laina ntau ndaimu. Ede ntau Ruma Hatalla.

²⁰Ruma Hatalla wa'ura welina nggomid̄oho ro wa'ura cola kanggorina. B̄ara ndedena, kanipu sarumbumu sandede pahuna ndad̄ina Ruma Hatalla d̄i kad̄ese ra kantasa.