Read Bima 1 KORINTUS 7 Bible Online

1 KORINTUS 7 - Bima bible

1 KORINTUS 7

¹Ake nahu ne'e nuntu mab̄oha masa'ala rapehe b̄a nggomid̄oho ade suramu. Nggara sab̄ua dou mone wati nikana, ede taho.

²Pala b̄aib̄a wati b̄oha b̄a goda d̄i karawikai lampa rawi ma wati patu, ncewi tahopu sanikina dou mone ntauna wei ndaina. Ro sanikina dou siwe ntauna rahi ndaina.

³Rahi pab̄uaku kalampana d̄i pab̄ua karawi kai rahi kaina d̄i ru'u weina, ro wei pab̄uaku kalampana d̄i pab̄ua karawi kai wei kaina d̄i ru'u rahina; cua-cua kalampana d̄i pab̄ua karawi d̄i ru'u makalaina.

⁴Wei wati ntauna kuasa d̄i sarumbu ndaina; ma ntau kuasa d̄i sarumbuna eded̄u rahina. Ndede rau rahi wati ntauna kuasa d̄i sarumbu ndaina; ma ntau kuasa d̄i sarumbuna eded̄u weina.

⁵Aina kad̄o'omu weki sab̄ua lab̄o sab̄ua dou sacara rahi ra wei. Loa ru'u samporo wakatu, sura wekina d̄uana ede wa'ura sama-sama satuju. Ade ndedekaina cua-cua loa do'a kai wati wara mahako. Pala sawa'u b̄a ede, pab̄uapu nggomid̄oho mbali cua d̄eni kai cara rahi ra wei. Nggara watisi ndedena, pea nggomid̄oho loa b̄atu siwi b̄a roh seta, b̄ara nggomid̄oho wati wa'umu taha nawasu.

⁶Nahu nggahiku ake laina kai parenta, pala kai ngoa ra tei kataho.

⁷Sapodakaina nahu ncewi ca'uku nggara sara'a dou ndad̄i b̄une nahu. Pala cua-cua wa'ura tarima rambei b̄a Ruma Hatalla. Sab̄ua dou mantau bareka ra mbei ake, ma kalai mantau bareka rambei ede.

⁸D̄i ru'u b̄a dou-dou ma watipu nika ro d̄i ru'u b̄a dou-dou siwe ma wa'ura mbaru mboha, akeku ngoa ra tei kataho b̄a nahu: Nancewi tahopu nggomid̄oho ngge'empa mori kesemu b̄une nahu.

⁹Pala nggara nggomid̄oho wati wa'umu tapa nawasu, nggomid̄oho tahopu nikamu. B̄ara nancewi tahopu nggomid̄oho nikamu nggara nawasu panamu dawa'u taha.

¹⁰ D̄iru'u b̄a siad̄oho ma wa'ura nika, ake parenta nahu: (Sapodakaina laina nahu ma mbei parenta ake, pala Ruma.) Sab̄ua dou siwe ma wa'ura nika aina wi'i paki rahina.

¹¹Pala nggara wa'usi wi'i paki b̄a sia rahina, sia pab̄uaku wati ntau rahi mbali, atao mbali d̄i rahina. Ro rahi wati loana wi'i weina.

¹²D̄i ru'u b̄a ma kalai-lai, ngoa ra tei kataho b̄a nahu eded̄u: — ake ngoa ra tei kataho b̄a ndai nahu, laina Ruma — nggara sab̄ua dou ela Al Masih kaweina sab̄ua dou siwe ma wati imbi d̄i Al Masih, ro weina ngawa mori sama lab̄o sia, dou ede wati loana wi'i weina.

¹³Ro nggara dou siwe ela Al Masih karahina sab̄ua dou ma wati imbi d̄i Al Masih, ro rahina ede satuju mori sama lab̄o sia, ndad̄i weina ede wati loana wi'i rahina.

¹⁴B̄ara rahi ma wati imbina napatuku d̄imandad̄i anggota ela Ruma Hatalla b̄ara nikana lab̄o wei ma wa'ura ndad̄i ntau Ruma Hatalla. Ndede rau wei ma wati imbi patu d̄imandad̄i anggota ela Ruma Hatalla, b̄ara nikana lab̄o rahi ma wa'ura ndad̄i ntau Ruma Hatalla. Nggara watisi ndedena, ana-ana siad̄oho tantu b̄une ana-ana makafi, sapodakaina ana dou to'i-to'i ede wi'ikai anggota ela Ruma Hatalla!

¹⁵Pala nggara dou ma wati imbi ede wi'i pakina wei atao rahina ma ela Al Masih, aina tapamu sia. Ade lampa rawi ake nggomid̄oho hori weki, b̄ara Ruma Hatalla nane'e loakud̄u nggomid̄oho mori kai taho-taho.

¹⁶B̄ara nggomi kai wei — ma wa'ura imbi d̄i Ruma — b̄uneku Nggomi loakaimu b̄ade pasti b̄a one nggomi wati loamu kasalama rahimu? Ndede rau nggomi rahi ma'ela Al Masih, b̄uneku nggomi loamu b̄ade kai pasti b̄a one nggomi wati loamu kasalama weimu?

¹⁷Pab̄uapu cua-cua ndai atona mori ra wokona b̄atu rad̄ende ra wa'a b̄a Ruma b̄une wa'ura katantu b̄a Ruma Hatalla d̄iru'una wakatu Ruma Hatalla ouna d̄ima'imbi d̄i Sia. Edeku atora ratei b̄a nahu d̄i sanikina ela Ruma.

¹⁸Ibara ndake, nggara sab̄ua-b̄ua dou wa'ura suna aipu wakatu sia tarimana ou b̄a Ruma Hatalla, ndad̄i aina dou ede ne'ena kambora tanda-tanda suna ede. Ndede rau nggara sab̄ua dou rawatipu suna wakatu sia tarimana ou b̄a Ruma Hatalla, aina dou ede rahona suna.

¹⁹B̄ara b̄atu atora suna atao wati b̄atu, d̄uana sama-sama wati ntauna ao au-au. Ma penti eded̄u b̄atu parenta-parenta Ruma Hatalla.

²⁰Pab̄uaku sanikina dou ngge'empa mori ade ka'ada'an b̄une aipu sia tarimana ou b̄a Ruma Hatalla.

²¹Nggara wakatu nggomid̄oho d̄i'ou, nggomid̄oho eded̄u sab̄ua dou ada, edera nggomid̄oho susamu fikira kananu lampa rawi ede. Pala pea nggara nggomid̄oho rakamu ncai d̄imahori weki, kanipu ncai ede.

²²B̄ara sab̄ua dou ada ma wa'ura imbi d̄i Ruma, eded̄u dou Ruma ma hori weki, ro sab̄ua dou mahori weki ma wa'ura imbi d̄i Ruma, eded̄u ada Al Masih.

²³Ruma Hatalla wa'ura welina nggomid̄oho ro wa'ura cola kanggorina. B̄ara ndedena, aina nggomid̄oho d̄onggomu weki ru'u d̄imandad̄i ada manusia.

²⁴Ndad̄i cina ra angi konena b̄uneb̄e wali ka'ada'amu wakatu d̄i'ou, pab̄uapu nggomid̄oho ngge'empa morimu b̄une ede sama-sama lab̄o Ruma Hatalla.

²⁵Ake mab̄oha dou-dou ma watipu nika. Mab̄oha lampa rawi ede, nahu wati tarimaku parenta au-au rad̄i Ruma. Pala kai dou ma b̄ara rahama Ruma patu d̄i imbi, nahu kane'e ngoa ra tei kataho.

²⁶Kawarasi samenana susa ra ncoki ma d̄i dahukai ake, iu b̄a nahu ncewi tahopu nggara dou ede ngge'empa kalampana mori b̄une ka'ada'ana ake.

²⁷Nggara nggomid̄oho mawa'usi ntau wei aina usahamu hori weki lab̄o weimu ede. Nggara nggomi watipu ntaumu wei edera ngupa wei.

²⁸Pala nggara nggomid̄oho manikasi, ede laina dosa. Ndede rau nggara sab̄ua dou sampela siwe nikana, laina aona sia dosa. Cuma, siad̄oho ma nika ede d̄imasatando angi lab̄o mboto susa ra ncoki. Ro ne'e b̄a nahu nggomid̄oho wati b̄oha b̄a susa ra ncoki ede.

²⁹Aona nggahi nahu ndake, cina ra angi: Ndai wati ntauta wakatu mamboto wali. Tampu'u ake, sanikina dou ma wa'ura ntau wei pab̄uapu mori b̄une-b̄uneta sia watipu wara weina;

³⁰dou ma nangi, mori b̄une-b̄uneta sia wati susa adena; dou ma hari, b̄une-b̄uneta sia wati d̄ihi adena; dou ma wa'ura weli, b̄une-b̄uneta sia wati ntauna au-au;

³¹ro dou ma kani barang-barang ade lampa rawi-lampa rawi dunia, pab̄uapu mori b̄une-b̄uneta sia wati karepo b̄a lampa rawi ede. B̄ara watid̄u ntoi walina dunia ake, ade ka'ada'ana d̄i wakatu ake, d̄imambora!

³²Ne'e b̄a nahu loakud̄u nggomid̄oho hori weki rad̄i susa ra ncoki. Dou ma wati ntau wei nakasab̄uampa fiki ra kananuna d̄i lampa rawi mab̄oha Ruma, b̄ara sia nane'e kasana Ruma.

³³Pala dou ma wa'ura ntau wei d̄imamboto fiki ra kananu lampa rawi dunia ake, b̄ara sia nane'eku kasana wea ade weina;

³⁴ndad̄ikaina fiki ra kananuna wa'ura ncengga-ncengga. Sab̄ua dou siwe ma wati ntau rahi, atao sab̄ua dou siwe sampela, d̄imamboto fikira kananu d̄ilampa rawi mab̄oha Ruma, b̄ara sia nane'eku sarumbu ra nawana ndad̄i ntau Ruma Hatalla. Pala sab̄ua dou siwe ma wa'ura ntau rahi, nakasab̄uaku fiki ra kananu d̄i lampa rawi dunia ake, b̄ara sia nane'e kasana wea ade rahina.

³⁵Nahu tuntikaiku samenana ede ru'u tahokai ndai nggomid̄oho, laina ne'eku kanta ake ro ede. D̄i ne'e b̄a nahu loakud̄u nggomid̄oho karawipu ma poda ra patumpa, ro loakud̄u nggomid̄oho kasab̄uamu fiki ra kananumu d̄i Ruma.

³⁶Nggara sab̄ua dou iuna weki wati kalampana ma patu ra ambi d̄i ru'u dou sod̄ina, nggara sia watisi wa'una taha nawasuna, ro sia iuna paralu nika lab̄o dou sampela siwe ede, co'opu sia karawina au ma d̄i'iuna taho. Sia wati dosana, nggara siad̄oho nanikasi.

³⁷Pala nggara sab̄ua-b̄ua dou wa'ura wehana kaputusana d̄ei adena, ru'u wati d̄imanika lab̄o dou sod̄ina ro ranggahina ede wati kai pakasa, ndad̄i rakarawina ede taho, sura sia tenggona karawi ede.

³⁸Sapodakaina, dou ma nika taho ruku ra rawina, ro dou ma wati nika ncewi taho wali ruku ra rawina.

³⁹Sab̄ua dou siwe ma wa'ura nika nasab̄ua lab̄o rahina cuma santoi mori rahina. Nggara wa'usi made rahina, dou siwe ede loa nika wali lab̄o dou raca'una; sura rahina ede dou ela Al Masih.

⁴⁰Pala sia nancewi laba nggara sia wati nika walina. Ede kananu ndai nahu, pala iu b̄a nahu b̄a one ranggahi b̄a nahu ede eded̄u kai kuasa Roh Allah.