Read Bima 1 KORINTUS 9 Bible Online

1 KORINTUS 9 - Bima bible

1 KORINTUS 9

¹Sab̄ua laina nahu ake dou mahori weki? Sab̄ua nahu ake laina rasu? Sab̄ua nahu watipu parana edaku Isa Ruma ndaita? Sab̄ua nggomid̄oho laina hasi karawi nahu d̄i ru'u Ruma?

²Nggara dou-dou makalai rau wati ne'ena mangaku nahu kai rasu, kone sato'ikaina nggomid̄oho mamangakuku ede! B̄ara morimu kai dou ela Al Masih eded̄u bukuti b̄a one nahu sab̄ua dou marasu.

³Nggara dou marojo nahu, nahu d̄imacambe kandake:

⁴Sab̄ua nahu wati ntauku hak matarima ngaha ra nono b̄ara karawi nahu?

⁵Sab̄ua nahu wati ntauku hak wa'a sab̄ua dou wei ela Al Masih ade lampa ra laokai nahu, b̄une rakarawi b̄a cina ra angi Ruma Isa ro b̄a rasu-rasu makalai, lu'u rau la Petrus?

⁶Atao cuma la Barnabas ro nahumpa rapab̄ua mangupa ngaha ndai kese?

⁷Wati wara anggota tentara ma pab̄ua ongko sarumbu ndaina d̄i ade barisana lewa! Wati wara dou makanggihi ma nggud̄a anggo d̄i nggarona edempara wati ngahana hasi anggo rad̄i nggaro ede! Wati wara ompu jimba ma ntadi jimba, edempara wati nonona susu rad̄i jimba-jimbana ede!

⁸Nahu nuntuku ede laina b̄a cuma dasa ma biasa ade rawi sanai-nai, pala b̄ara Alkitab manggahina lampa rawi ede rau.

⁹ D̄i ade Buku Musa ratunti, ”Capi ma wunga tonda-tonda gando d̄i kalosakai isi gando rad̄i wurina, aina pulamu asana.” Sab̄ua capi d̄i tio b̄a Ruma Hatalla?

¹⁰Atao ede ranggahi d̄i ru'u ndai? Poda ede ratunti d̄i ru'u ndai. B̄ara dou ma karawi oma ro dou ma karaso gando nawa'ura patu d̄imakarawi kai ne'ena tarima sarundena rad̄i hasi karawina.

¹¹ Nami wa'ura parimu d̄ei maraso d̄i ade morimu. Ndad̄i nggara nami pakomu bareka-bareka mapahu barang rad̄i nggomid̄oho, sab̄ua ede aona nami maraho ma'ipi mboto rad̄i nggomid̄oho?

¹²Nggara dou-dou makalai wara hak mane'e ake d̄i nggomid̄oho, sab̄ua laina namisi mancewi ntau hak wali ntewi kaisi lab̄o siad̄oho? Pala nahu watipu kaniku hak ede. Pala nahu ncewi ca'upu tanggu sara'ana au-au nggara wontuna sab̄ua lampa rawi matapa ngoa ra kahaba Haba Mataho mab̄oha Al Masih.

¹³ Nggomi tantu mab̄adeku b̄a one dou ma karawi d̄ei Bait Allah natarima ngaha ra nono siad̄oho rad̄i Bait Allah. Ro dou-dou ma uru hid̄i d̄onggo ra mbei kai koroba, naraka sarundena rad̄i koroba rad̄onggo ra mbei ta ede.

¹⁴ Ndede rau Ruma wa'ura katantuna b̄a one dou ma ngoa ra kahaba Haba Mataho ede pab̄ua d̄imaraka ngaha ra nono rad̄i ngoa ra kahabana ede.

¹⁵Pala watipu parana nahu kani kone sab̄ua hak-hak ede. Ro nahu tuntiku sura ake lai rauna kai makasu loakud̄u lampa rawi-lampa rawi ede d̄ikarawi ake d̄i ru'u nahu. Ncewi tahopu madeku, nggara mborana lampa rawi d̄i banggakai b̄a nahu ede.

¹⁶B̄ara, nggara ede cuma masa'ala ngoa ra kahaba Haba Mataho rad̄i Ruma Hatalla, ndad̄i nahu wati ntauku hak d̄i kabangga-banggakai weki, b̄ara Ruma Hatalla wa'ura parentana nahu d̄imakarawina. Ihara nahu, nggara nahu wati ngoa ra kahaba Haba Mataho ede!

¹⁷Pai kalampasi b̄a nahu karawi ede kai kane'e b̄a ndai nahu, ndad̄i nahu loa ntau ne'e d̄imaraka ufa. Pala nahu ngoa ra kahabaku Haba Mataho ede b̄ara d̄i pab̄ua karawi. Nahu rambei taki ra puta b̄a Ruma Hatalla d̄imakarawina ede.

¹⁸Nggara ndedesi, ufa nahu au? Ake ufana: b̄a one nahu loaku ngoa ra kahaba Haba Mataho ede kai wati kataniku kone sab̄ua dou rau d̄ima'ongko nahu, b̄ara nahu wati tuntuku hak-hak nahu kai dou mangoa ra kahaba Haba Mataho ede.

¹⁹Nahu ake laina ada cou-cou; nahu hori weki. Kone ade ndedekaina, nahu wa'ura kandad̄iku weki nahu ake ada d̄i ru'u samenana dou. Nahu karawikaiku ede loakud̄u nahu ngoluku samboto-mboto poda dou ru'u Al Masih.

²⁰D̄i ru'u b̄a dou Yahudi, nahu karawiku b̄une dou Yahudi loakud̄u nahu kangolukaiku dou Yahudi d̄i ru'u Al Masih. D̄i ru'u dou-dou ma mori mab̄atu hukum Musa, nahu karawiku b̄une-b̄une nahu d̄iki b̄a hukum ede, kone sapodakaina nahu wati d̄iki b̄a ede. Nahu karawikaiku ede loakud̄u nahu loa hintiku siad̄oho ndad̄i ela Al Masih.

²¹D̄i ru'u b̄a dou malaina Yahudi, nahu karawiku b̄une sab̄ua dou malaina Yahudi, ma mori ari mai b̄a hukum Musa. Nahu karawikaiku ede loakud̄u loa hinti b̄a nahu siad̄oho ndad̄i ela Al Masih. Pala ede laina aona nahu wati to'aku d̄i parenta-parenta Ruma Hatalla; nahu kuasakai b̄a parenta-parenta Al Masih.

²²D̄i ade woha dou-dou ma imbina mapoda wati tenggo, nahu rau karawiku b̄une sab̄ua dou ma imbina mawati tenggo loakud̄u nahu loa hintiku siad̄oho ndad̄i ela Al Masih. Porona, nahu ndad̄i sara'ana ru'u samenana dou loakud̄u kai ncai ma b̄uneb̄e rau nahu loa kasalama sarundena ade weki siad̄oho.

²³Sara'a ede karawi b̄a nahu d̄i ru'u Haba Mataho rad̄i Ruma Hatalla ede. Loakud̄u nahu rau b̄atu tarima bareka.

²⁴Nggomid̄oho tantu mab̄adeku b̄a one d̄i ade paralombakai samenana weki b̄atu rai, pala cuma sab̄ua dou matarima hadia. B̄ara ndedena raipu mandede pahu ndad̄ina nggomid̄oho matarimaku hadiana.

²⁵Sanikina dou ma wunga ade latiha, natahaku adena d̄ei samenana lampa rawi. Sia karawikaina ede b̄ara sia ne'ena kakondo kai kondo b̄unga juara, eded̄u b̄unga d̄imaroci male. Pala ndai ake wa'u taha ade d̄ei samenana lampa rawi b̄ara ndai ne'eta kakondo kai kondo b̄unga ma wati d̄imamale.

²⁶B̄ara ndedena nahu raiku kai ne'e ma tantu. B̄une ade taji tinju, nahu wati turu b̄oeku.

²⁷Nahu kaco'ompa sarumbuku d̄i tei kai toku sampe nahu loa podaku. Nahu karawi ndedekaiku, b̄ara nahu wati ne'eku sampe ndad̄ina b̄a one sawa'u b̄a nahu receku dou makalai b̄atu d̄ei paralomba ede, ndai nahu d̄i tula.