Read Bima 2 KORINTUS 1 Bible Online

2 KORINTUS 1 - Bima bible

2 KORINTUS 1

¹ Cina ra angi ela Ruma Hatalla d̄i Korintus ro samenana ela Ruma Hatalla d̄isara'ana Akhaya. Nahu, Paulus, rasu Isa Al Masih, rahanta kai kane'e b̄a Ruma Hatalla, masama-sama lab̄o cina ndaita la Timotius.

²Mapamao raho-raho to'impa Ruma Hatalla, Ama ndaita ro Ruma Isa Al Masih mbeina bareka ro taho ra ntai d̄iru'u b̄a nggomid̄oho.

³D̄ese ra ntasa Ruma Hatalla, Ama b̄a Ruma ndaita Isa Al Masih. Sia Ama ma wancu taho ade, ro Sia Ruma Hatalla ma mbei tenggo ra wale ade mpida d̄iru'u manusia.

⁴Sia nakatenggoku ade nami d̄ei sanikina susa ra ncoki ra'iu b̄a nami, loakud̄u kai tenggo ra wale ratarima b̄a nami rad̄i Ruma Hatalla ede, nami rau maloa katenggo wea ade mpida samenana dou ma ade susa ra ncoki.

⁵Susa ra ncoki ra'iu b̄a Al Masih wa'ura mboto iu b̄a nami rau. Ro kai ncai Al Masih rau, ade mpida nami wancuku katenggona.

⁶Nggara nami ma'iu ncoki, ede d̄imakatenggona ademu, ru'u salamakaimu. Nggara ade nami d̄ikatenggo, ndad̄i nggomid̄oho rau d̄ikatenggo, ndad̄ina nggomid̄oho d̄imalembo ade d̄ei susa ra ncoki b̄une nami ma susa ra ncoki rau.

⁷Nami ma'imbi ncau ro wati iumu mbali mbua mab̄oha nggomid̄oho, b̄ara nami mab̄adeku b̄a one nggomid̄oho mab̄atu iu susa ra ncoki lab̄o nami. Ro b̄ara ndedena nggomid̄oho b̄atu rau d̄i katenggo sama-sama lab̄o nami.

⁸ Cina ra angi! Ne'e b̄a nami nggomid̄oho b̄ademu mab̄oha ncoki ra'iu b̄a nami d̄i dana ra rasa Asia. Susa ra ncoki ra'iu b̄a nami ede na'ipiku tanina d̄id̄ana nami, ndad̄i nami wa'ura kompo kananumu d̄imamori;

⁹d̄i'iumu b̄une wa'ura b̄ab̄u kai hukuma madempa. Pala lampa rawi ede ndad̄ina loakud̄u nami aina wi'i wekimu d̄itenggo ra wale weki ndaimu, malaisi d̄i Ruma Hatalla ma kamorina dou mamade.

¹⁰Sia ma wa'ura kasalamana nami rad̄i bahaya made ma na'e ede. Ro Sia rau ma kasalamana nami peade d̄i ainain-ainain makento, b̄ara d̄i Siaku d̄ine'e podakai b̄a nami.

¹¹Nami ma'imbi b̄a one kai do'a-do'amu d̄iru'u nami, Ruma Hatalla nakasalamaku nami rad̄i ihakai. Ruma Hatalla naca'u mbei bareka nami d̄icambekaina do'a mboto d̄i ru'u b̄a nami, ro b̄ara ndedena mboto dou marenta tarima kasi d̄i Ruma Hatalla.

¹²Nami bangga, b̄ara ade mpida nami ka'imbi podana ade nami b̄a one mori nami d̄i dunia ake mapenti poda ndapo angi nami lab̄o nggomid̄oho wa'ura kalampa b̄a nami kai rela ro nira ade. Karawi b̄a nami ede, laina kai timba ra lemba manusia, pala kai timba ra lemba rambei b̄a Ruma Hatalla.

¹³Ratunti b̄a nami d̄i nggomid̄oho eded̄u cuma mab̄oha lampa rawi ma loa d̄ibaca ra ka'ao b̄a nggomid̄oho. Ake nggomid̄oho wati laomu ka'ao poda d̄i nami, pala raho b̄a nahu nggomid̄oho poda-poda loamu ka'ao nami. Ade ndedekaina, d̄i wakatu mai Ruma Isa peade nggomid̄oho d̄imabangga d̄i nami, b̄une nami rau mabangga d̄i nggomid̄oho.

¹⁵B̄ara imbi poda ede ndad̄i nahu sarambakai niaku d̄imamai lamba nggomid̄oho loakud̄u nggomid̄oho rakamu bareka d̄ua kali lipa.

¹⁶ Nahu ne'e mai lamba nggomid̄oho ade lampa ra laokaiku aka Makedonia ro sai waliku d̄i nggomid̄oho ade lampa dula mbalikaiku, loakud̄u nggomid̄oho bantumu nahu lampa lao wali ake Yudea.

¹⁷Pala nahu wa'ura rungkaku niaku ede; sab̄ua ede nakatadaku b̄a one ade nahu ede wati tenggona? Wakatu ndawi nia, sab̄ua nahu ndawiku nia b̄une ne'e ndai nahu, samporo nggahi, ”Io,” ro samporo ”Wati”?

¹⁸Kai ngara Ruma Hatalla ma loa d̄i imbi, sake nahu d̄i nggomid̄oho laina ”Io” ro ”Wati”.

¹⁹ B̄ara Ruma Isa Al Masih, Ana Ruma Hatalla, rangoa ra kahaba d̄i nggomid̄oho b̄a la Silas, Timotius, ro b̄a ndai nahu laina dou ”Io” ro ”Wati”. Pala Sia eded̄u cambe kai ”Io” rad̄i Ruma Hatalla.

²⁰B̄ara kai ncai Sia Ruma Hatalla wa'ura nggahina ”Io” d̄i sara'a sake-Na. Kai dasa edeku ndai rentata ”Amin” d̄i Ruma Hatalla b̄ara Ruma Isa Al Masih. Karawikai b̄a nami b̄une ede loakud̄u kad̄ese ra kantasa Ruma Hatalla.

²¹Ndai Ruma Hatalla marandawina nami ro nggomid̄oho tenggo kasab̄ua lab̄o Al Masih; Sia raura marakad̄ale kalai ndai d̄iru'u weki-Na.

²²Ru'u ede Ruma Hatalla wa'ura kasahana ndaita ndad̄i ntau-Na ro mbeina roh-Na d̄ei ade ndaita ru'u d̄i nenti b̄a one Sia d̄imambei ru'u ndaita sara'a rasake-Na.

²³Ruma Hatalla sakasi nahu — b̄ara Sia nab̄ade isi ade nahu — b̄a one nahu wati ndad̄ina lao aka Korintus, b̄ara nahu wati ne'eku kasusa ade nggomid̄oho.

²⁴Nahu wati pakasaku nggomid̄oho mab̄oha auku d̄ipab̄ua imbi b̄a nggomid̄oho, b̄ara nggomid̄oho mawa'ura ipi imbimu d̄i Al Masih. Nahu b̄a karawi samampa lab̄o nggomid̄oho loakud̄u nggomid̄oho naha taho ra ntikamu.