Read Bima 2 KORINTUS 12 Bible Online

2 KORINTUS 12 - Bima bible

2 KORINTUS 12

¹Io romo wati wara ncewina d̄i kabangga-banggakai weki, pala nahu kane'e rau kabangga weki kai lampa rawi ratei b̄a Ruma d̄i nahu ade wahyu atao raka eda rakatada b̄a Ruma.

²Nahu pataku sab̄ua dou ela Al Masih sampuru upa mba'a ma uluna rahanta d̄i hid̄i ma ese poda d̄i saroga. (Nahu wati b̄adeku sab̄ua sarumbuna poda-poda rahanta atao ede cuma sab̄ua ra'eda rakatada b̄a Ruma — Ruma Hatalla mpoampa ma b̄adena.)

³Nahu manggahi mboda sakali wali; Nahu kab̄ade b̄a one dou ake rahanta kalu'u d̄i Firdaus. (Nahu watija b̄adeku sab̄ua sarumbuna poda-poda rahanta atao ede cuma ra'eda rakatada b̄a Ruma mpoampa — Ruma Hatalla mpoampa ma b̄adena.) Ta aka dou ede ringana lampa rawi-lampa rawi ma wati loa d̄i nuntu b̄a manusia ro wati rakau manusia d̄imapehena.

⁵Mab̄oha dou edeku d̄i ne'e kabangga-bangga b̄a nahu, laina mab̄oha weki ndai nahu. Mab̄oha weki nahu, cuma lampa rawi-lampa rawi ma tei mapu ra rome nahu edempa, d̄i ne'e kabangga-bangga b̄a nahu.

⁶Pai ne'esi b̄a nahu rau kabangga-bangga au-au, nahu wati ne'eku ndad̄i dou b̄iko b̄ako manggahi kabangga-bangga weki cowa; nahu d̄i manggahi ma poda. Pala nahu kapi'i ade, loakud̄u wati wara dou ma kacai nahu ncewi d̄i au rawa'u eda b̄a sia rakarawi b̄a nahu atao rawa'u ringa b̄a sia nggahi nahu.

⁷Pala loakud̄u nahu aina ipi sombo b̄ara ra'eda rakarongga b̄a Ruma ma heba poda ede, nahu rambeina supu d̄i sarumbuku ma ndad̄i ncai Ibilis. Supu ede rambeina d̄imab̄oe nahu loakud̄u nahu wati ndad̄i sombo.

⁸Tolu kali nahu do'a d̄i Ruma loakud̄u supu ede mborana rad̄i nahu.

⁹Pala cambe b̄a Ruma, ”Anugera rambei b̄a Nahu d̄i nggomi wa'ura ncihi d̄iru'umu; b̄ara kuasa-Ku nawancuku tenggona nggara nggomi ede ade ka'ada'ana mapu ra rome.” B̄ara ndedena nahu ncewi neo adeku bangga kai mapu ra romeku, b̄ara romesi nahu, ndad̄i d̄i wakatu edera iu b̄a nahu Al Masih masandaka nahu kai tenggo ra wale-Na.

¹⁰Ndad̄i nahu neo adeku kai mapu ra romeku, nahu neo adeku nggara b̄ara Al Masih nahu d̄i fitina, nahu iuku susa, d̄i fou-fou ro nahu iuku ncoki ra susa. B̄ara nggara nahu rome, ndad̄i d̄i wakatu edeku tenggo nahu.

¹¹Poda nahu ruku ra rawiku b̄une dou masampula — pala nggomid̄oho marandawi nahu ndad̄i ndede. Sapodakaina nggomid̄ohoku ma pab̄ua roi nahu. B̄ara kone nahu wati ntauna one au-au, nahu wati d̄imakoa d̄i ”rasu-rasu” ma heba poda ede!

¹²B̄isa ra guna-b̄isa ra guna ro lampa rawi maheba poda ro karawi-karawi ma na'e-na'e wa'ura katadana kai saba d̄i nggomid̄oho d̄imabukutina b̄a one nahu sab̄ua dou rasu.

¹³D̄ei lampa rawi auku nggomid̄oho kura ra'uru wea, ntewi kaisi lab̄o ela Ruma ma kalai? Selasi d̄ei lampa rawi akempa: b̄a one nahu wati kasusaku nggomid̄oho d̄ima'ongko nahu. Kangapu weapu nahu d̄i ncara ede!

¹⁴Ake wa'ura katolu kalikaina nahu sadia d̄imamai lamba nggomid̄oho. Ro nahu wati ne'eku kasusa nggomid̄oho, b̄ara d̄i ne'e b̄a nahu laina au rantau nggomid̄oho, malaisi wekimu. B̄ara laina ana ma pab̄ua ngupa ngaha ru'u dou matuana, pala dou matuaku mapab̄ua ngupa ngaha d̄iru'u anana.

¹⁵B̄ara ndedena, kai sana ade nahu rela koroba samenana au-au d̄iru'umu, konena weki ndai nahu rau. Nggara nahu ndede meci ra ca'uku nggomid̄oho, sab̄ua patu nggomid̄oho kura meci ra ca'umu nahu?

¹⁶Nggomid̄oho satuju b̄a one nahu wati paranaku kasusa nggomid̄oho. Pala wara ma nggahi b̄a one nahu ake kuku keko; b̄a one nahu maraka laba rad̄i nggomid̄oho b̄ara kuku keko nahu.

¹⁷B̄uneku loana! Sab̄ua kai ncai dou-dou ranggadu b̄a nahu d̄i nggomid̄oho ede nahu karoku kanaha d̄i nggomid̄oho?

¹⁸Nahu wa'ura kauku la Titus lao lamba nggomid̄oho, ro kau b̄a nahu cinata ela Al Masih makalai ede lao lab̄o sia. Sab̄ua la Titus wehana kanaha d̄i nggomid̄oho? Pala nami d̄ua karawikai sab̄uampa ne'e masama ro kalampa kai cara-cara ma sama!

¹⁹Loa ndad̄i nggomid̄oho kacaimu nami sandake ra'ai ake wunga usahamu d̄i horukai weki d̄i nggomid̄oho? Ncara na'e nggomid̄oho! Ruma Hatalla nab̄ade b̄a one samenana ranggahi nami ede eded̄u b̄atu rane'e Al Masih. Ro samenana rakarawi b̄a nami eded̄u d̄imatu'u mori ra woko ademu maraso.

²⁰Nahu dahu adeku b̄a one d̄i wakatu mai lamba b̄a nahu nggomid̄oho peade, nahu rakaku nggomid̄oho wati b̄une au rakane'e b̄a nahu, ro nggomid̄oho rakamu nahu wati b̄une au rakane'e b̄a nggomid̄oho. Ai to'ina peade wara ma ncao, hiana, mbani, makapenti ru'u ndaina, mafitina, sad̄u'u angi, sombo ro kakaco.

²¹Nahu kadahu nggara-nggara wakatu mai nahu peade Ruma Hatalla nakab̄awaku nahu d̄i tando nggomid̄oho ro nahu d̄imanangi b̄ara mboto ade weki nggomid̄oho makarawi dosa ntoina, wati rungkana ro wati denggana karawi ruku ra rawi-ruku ra rawi siad̄oho ma sampu ra nggele, sampu ro wati ncihi ncaona.