Read Bima 2 KORINTUS 13 Bible Online

2 KORINTUS 13 - Bima bible

2 KORINTUS 13

¹ Ake eded̄u makatolu kalikaina nahu mai lambaku nggomid̄oho. Ade Alkitab ratunti, ”Sanikina parakara pab̄uaku wara d̄ua atao tolu dou sakasi d̄imambei sakasi, ede ampona saha parakara ede.”

²Dou-dou d̄i wakatu ntoina wa'ura karawina dosa ro sara'a dou makalaina, wa'ura ngoa ra kawara ulu b̄a nahu aipu mai lambaku nggomid̄oho kad̄ua kalikaina. Ake, wunga d̄o'o nahu lab̄o nggomid̄oho, nahu mangoa rakawara mbali b̄a one nggara mai walisi nahu, wati kone sab̄ua dou ade weki siad̄oho d̄imahori weki rad̄i hukuma.

³Ndad̄i nggomid̄oho d̄imaraka sara'a bukuti rane'e b̄a nggomid̄oho b̄a one Al Masih poda-poda nuntuna kai ncai nahu. Nggara rojosi b̄a Al Masih d̄i nggomid̄oho, sia wati rojona kai mapu, ndede wali Sia nateiku kuasa-Na d̄i woha nggomid̄oho.

⁴Poda wunga wakatu Sia d̄isalib, Sia mapu, pala ake Sia mori b̄ara Kuasa Ruma Hatalla. Nami rau mapu ade mori nami masab̄ua lab̄o Al Masih, pala nggara ncao ntandosi lab̄o nggomid̄oho, nami rau tenggo lab̄o Al Masih b̄ara kuasa Ruma Hatalla.

⁵Uji tiopu b̄a nggomid̄oho weki ndaimu sab̄ua nggomid̄oho poda-poda mori kai dasa imbi d̄i Al Masih! Pasti nggomid̄oho ma iu weki b̄a one Ruma Isa Al Masih wara d̄ei nggomid̄oho! — Lai walina nggara nggomid̄oho wati imbi podamu.

⁶Ne'e b̄a nahu nggomid̄oho iupu weki b̄a one nami laina dou ma wati taha uji.

⁷Nami mado'a d̄i Ruma Hatalla raho to'impa Sia ngawana bantu nggomid̄oho b̄aib̄a dakarawimu mancara. Laina d̄i turu teikai b̄a one nami ake poda loamu kalampa taki ra puta, pala loakud̄u nggomid̄oho kalampamu au rakane'e b̄a Ruma Hatalla — co'opu tadana nami mawati wara hasi karawi, wati b̄unena!

⁸B̄ara nami wati loamu karawi au-au ma wati ncihi ncao kai ma poda ncihi, nami pab̄ua b̄atu ma ncihi.

⁹Nami neo ademu nggara nami mapu ro nggomid̄oho matenggo. Nami mado'a rau loakud̄u nggomid̄oho ndad̄i sampuruna.

¹⁰B̄ara ndedena nahu tuntiku sura ake d̄i wakatu nahu watipu wara d̄i woha nggomid̄oho. Ade ndedekaina, maisi nahu peade, watid̄u rojo ka'ipi b̄a nahu d̄i nggomid̄oho kai kani kuasa ra mbei b̄a Ruma d̄i nahu. Kuasa ede rambei d̄i katu'ukai nggomid̄oho, laina d̄imakalelina.

¹¹Cumpukaina, cina ra angi, pab̄uapu nggomid̄oho neo ade, ro usahapu ndad̄i sampuruna. Tarima aopu samenana ngoa ra tei kataho b̄a nahu. Pab̄uapu nggomid̄oho sab̄ua ade ro mori taho lab̄o lenga. Ruma Hatalla Mawancu meci ra ca'u ro makataho ede d̄imasama lab̄ona nggomid̄oho.

¹²Cua salam meci angi kai sama-sama ela Al Masih. Samenana ela Ruma Hatalla nggaduna salama d̄i nggomid̄oho.

¹³Anugera Ruma Isa Al Masih ro meci ra ca'u Ruma Hatalla ro Roh Allah mad̄ende ra wa'a nggomid̄oho sara'ana! Salam do'a nami, Paulus