Read Bima 2 KORINTUS 2 Bible Online

2 KORINTUS 2 - Bima bible

2 KORINTUS 2

¹B̄ara ndedena nahu wa'ura nggahi kapodaku nahu wati d̄imakancoki wea ade nggomid̄oho, nggara mai lambasi b̄a nahu nggomid̄oho.

²B̄ara nggara kancoki weasi b̄a nahu ade nggomid̄oho, cou waliku d̄imaloa rere wea ade nahu, nggara lainsi doud̄oho ede rau rawa'u kasusa wea b̄a nahu adena?

³B̄ara ndedena nahu tuntiku sura ede d̄i nggomid̄oho. Nahu wati ne'eku mai lamba nggomid̄oho, edempara kasusa wea b̄a nggomid̄oho adeku sapodakaina nggomid̄oho mapab̄ua kad̄ihi wea ade nahu. B̄ara nahu ka'imbi nggara nahu neo adeku, ndad̄i sara'ana nggomid̄oho neo ade raumu.

⁴Nahu tuntiku d̄iru'u nggomid̄oho kai ade ma ncoki ra tani kai mboto b̄oho oi mada. Nahu laina ne'eku loakud̄u nggomid̄oho ndad̄i ncoki ademu, pala loakud̄u nggomid̄oho kawaramu weki b̄a one nahu wancuku meci ra ca'uku nggomid̄oho.

⁵Nggara warasi dou ma kamaina ncoki ade, ndad̄i lampa rawi ede karawi b̄a sia laina d̄iru'u nahu, malaisi d̄iru'u nggomid̄oho sara'ana atao d̄i nggomid̄oho sarunde weki. Nahu wati ne'eku ipi toku d̄i sia.

⁶Ru'u dou b̄une ede, hukuma d̄ib̄ab̄ukai d̄i sia b̄a mbotokai d̄iwoha nggomid̄oho wa'ura ncihi.

⁷Ake nggomid̄oho pab̄uapu kangampu wea sia ro d̄imakau kapoda ade sia wali loakud̄u sia aina ipi ncoki adena sampe kompokai kananuna.

⁸B̄ara ndedena raho b̄a nahu, loakud̄u nggomid̄oho katada mbalimu d̄i sia b̄a one nggomid̄oho poda-poda meci ra ca'umu sia.

⁹Nahu tuntiku sura ede d̄i nggomid̄oho kai ne'eku uji nggomid̄oho, sab̄ua nggomid̄oho mane'e ncau b̄atu ngoa ra tei b̄a nahu.

¹⁰Nggara nggomid̄oho kangampu weamu dou ma wa'ura karawi mancara d̄i nggomid̄oho, ndad̄i nahu rau makangampu wea dou ede. B̄ara au rawa'u kangampu wea b̄a nahu — nggara nawarasi ma paralu d̄i kangampu wea — ede kangampu wea b̄a nahu d̄itando Al Masih d̄i tahokai nggomid̄oho.

¹¹Nahu karawi kaiku ede loakud̄u Ibilis wati wehana ncai d̄i kuasakaina ndaita; b̄ara ndaita b̄ade niana.

¹² Aipu wakatu rongga nahu d̄i Troas kai ne'eku ngoa ra kahaba Haba Mataho mab̄oha Al Masih. Ruma wa'ura henggana ncai d̄iru'u b̄a nahu d̄ikarawikai d̄i hid̄i ede.

¹³Pala nahu darura adeku b̄ara watipu eda angi lab̄o cina ndaita la Titus ta aka. Ndad̄i nahu rahoku weki d̄i dou-dou d̄i hid̄i ede edempara laoku aka Makedonia.

¹⁴Pala syuku d̄i Ruma Hatalla! Sia mad̄ende ra wa'a ncau nami ru'u b̄atu rau ade lampa ndiha ngolukai Al Masih b̄ara nami mori kasab̄ua lab̄o Sia. Ruma Hatalla kanina nami loakud̄u haba mab̄oha Al Masih mbou b̄une ngolo mengi ma tambua tab̄e-b̄e.

¹⁵B̄ara nami eded̄u b̄une ngolo kamaya ma mengi, raka'a b̄a Al Masih d̄iru'u Ruma Hatalla. D̄iru'u b̄a doud̄oho ma wunga lao raka d̄i lelikaina, nami ake b̄une wou made ma hademu; pala d̄iru'u doud̄oho ma wunga d̄i kasalama wea, nami b̄une ngolo mengi ma wa'a mori ra woko. Couku ma wa'una sanggo kancihi rawi ake?

¹⁷Nami laina b̄une mboto dou ma kalampa haba rad̄i Ruma Hatalla b̄une barang-barang landa ra lajompa. D̄ine'e b̄a nahu eded̄u taho raso, b̄ara nami rakaukai b̄a Ruma Hatalla. Ro ndai Ruma Hatalla ma'edana b̄a one nami karonggamu haba ede kai ada-ada Al Masih.