Read Bima GALATIA 2 Bible Online

GALATIA 2 - Bima bible

GALATIA 2

¹ Sampuru upa mba'a sawa'u b̄a ede, nahu lao mbaliku aka Yerusalem lab̄o la Barnabas, ro wa'a la Titus rau.

²Nahu laoku d̄i Yerusalem b̄ara Ruma Hatalla wa'ura katadana d̄i nahu b̄a one nahu pab̄uaku lao. Ro edakai angi rakalai wa'u lab̄o dou-dou mana'ekai ta aka, ngoa kab̄ae b̄a nahu Haba Mataho rangoa ra kahaba b̄a nahu d̄i doud̄oho malaina Yahudi. B̄ara nahu wati ne'eku usaha nahu ntoina ro ma ake, lao ncaumpa.

³La Titus, ma lab̄ona nahu, eded̄u dou Yunani, pala sia wati d̄i pakasa d̄imab̄atu atora suna,

⁴konena wara doud̄oho ma pab̄ua lampa rawi ede. Siad̄oho eded̄u dou-dou ma lu'u cili d̄i ade golonga ndaita ro wa'a pahu kai cinata. Siad̄oho lu'u kai midi-midi d̄i palitikaina horikai weki mapoda ma wara d̄i ndaita b̄ara ndai sab̄ua lab̄o Ruma Isa Al Masih. Siad̄oho nane'e kambali ndaita d̄i ka'ada'an ma sarambakaina kai ada,

⁵pala nami wati okomu d̄i siad̄oho kone sato'i, b̄ara nami mane'e sandaka loakud̄u Haba Mataho ede ngge'empa asalina d̄i ru'u b̄a nggomid̄oho.

⁶ Konena ndede, wati wara lampa rawi-lampa rawi mab̄ou d̄iraho pab̄ua d̄i nahu b̄a dou-dou rawi'ikai dou mana'ekaina — ru'u nahu wati wara laina nggara siad̄oho loa atao wati, b̄ara Ruma Hatalla wati tiona pahu.

⁷Pala, doud̄oho rawi'ikai dou mana'e ede namangaku b̄a one Ruma Hatalla wa'ura mbeina taki ra puta d̄i nahu d̄imangoa ra kahaba Haba Mataho d̄i dou malaina Yahudi, sama b̄une Sia wa'ura mbeina taki ra puta d̄i la Petrus d̄imangoa ra kahaba Haba Mataho ede d̄i dou Yahudi.

⁸B̄ara Ruma Hatalla ma mbei d̄i la Petrus tenggo ra wa'u d̄imandad̄i rasu dou Yahudi, mbei rauna d̄i nahu tenggo ra wa'u d̄imandad̄i rasu dou malaina Yahudi.

⁹La Yakub, la Petrus, ro la Yahya, ma tada ndad̄i mana'ekai ela Ruma, namangaku b̄a one Ruma Hatalla nawa'ura mbei d̄i nahu taki ra puta rakalai ake. Ndad̄i siad̄oho japatangana lab̄o la Barnabas ro nahu kai tanda soba angikai. Edempara siad̄oho ro nami ngawa b̄a one nami d̄imakarawi d̄i woha bangsa-bangsa ma laina Yahudi, ro siad̄oho d̄i woha dou Yahudi.

¹⁰Sab̄uampa raho b̄a siad̄oho eded̄u loakud̄u nami ntanda ro eda dou mancoki mori. Ro nahu sana adeku karawi lampa rawi ede.

¹¹Wakatu la Petrus maina d̄i Antiokhia, nahu rojo kantiriku sia b̄ara ruku ra rawina mancara.

¹²Tampu'u-mpu'una sia doho ngaha samana lab̄o cina ra angi ma laina Yahudi. Pala sawa'u b̄a rongga doud̄oho ranggadu b̄a la Yakub, sia kad̄o'ona weki rad̄i cina ra angi malaina Yahudi ro watid̄u ngawa walina ngaha sama lab̄o siad̄oho, b̄ara nadahu d̄i doud̄oho ma ne'e suna sara'a dou.

¹³Cina ra angi Yahudi ma kalai rau b̄atu ruku ra rawi coro-coro b̄une la Petrus, ndad̄i la Barnabas rau b̄oha b̄a pangaru ruku ra rawi b̄une siad̄oho.

¹⁴Ndede eda b̄a nahu ruku ra rawi siad̄oho wati ncihi ncaona lab̄o lampa rawi mancihi Haba Mataho ede, nggahi nahu d̄i la Petrus d̄i tando sara'a dou ma wara ta ede, ”Nggara nggomi kai dou Yahudi wa'ura mori b̄une dou laina Yahudi, b̄ab̄auku ake nggomi ne'ekaimu pakasa dou-dou makalai mori b̄une dou Yahudi?”

¹⁵Poda b̄atu rangganakai, nami eded̄u dou Yahudi ro laina ”dou laina Yahudi ma dosa.”

¹⁶ Konena ndede nami mab̄ade b̄a one dou taho mbali lab̄o Ruma Hatalla b̄ara imbina d̄i Ruma Isa Al Masih, ro laina b̄ara kalampana hukum Taurat. Ndai nami rau imbi d̄i Ruma Isa Al Masih mpa, loakud̄u nami taho mbali lab̄o Ruma Hatalla kai ncai imbi nami ede, laina b̄ara nami kalampamu hukum Taurat. B̄ara kai kalampa hukum Taurat wati kone sab̄ua dou rau maloa taho mbali lab̄o Ruma Hatalla.

¹⁷Nami usahamu taho mbali lab̄o Ruma Hatalla kai ncai mori sab̄ua lab̄o Al Masih. Pala nggara sawa'ura karawi b̄une ede, palasi nami mbuipu ”dou-dou madosa” rau b̄une doud̄oho laina Yahudi, sab̄ua ake aona b̄ara Al Masih ma kandad̄ina nami dosa? Tantu wati!

¹⁸Nggara tampu'u tu'u mbalisi b̄a nahu hukum Taurat rawa'u d̄umba b̄a nahu, ndad̄i nahu teiku b̄a one nahu wa'ura ndad̄i dou masapa hukum.

¹⁹Pala nahu wa'ura made d̄i hukum Taurat — rahade b̄a ndai hukum ede — loakud̄u nahu loa mori ru'u Ruma Hatalla. Nahu wa'ura salib lab̄o Al Masih.

²⁰Ake laina nahu wali ma mori, pala Al Masih ma mori d̄ei weki nahu. Mori ake ra'iu b̄a nahu eded̄u mori b̄a imbi d̄i Ana Ruma Hatalla ma meci ra ca'u nahu ro ma wa'ura koroba weki-Na ru'u nahu.

²¹Nahu wati wi'ikaiku mod̄ana anugera rambei b̄a Ruma Hatalla. Misamparakai salamakai loa d̄i rakakai to'a d̄i hukum Taurat, ndad̄i madena Al Masih wati wara onena.