Read Bima GALATIA 3 Bible Online

GALATIA 3 - Bima bible

GALATIA 3

¹Cina ra angi dou-dou Galatia! Nggomid̄oho nawancuku sampulamu! Cou mawa'ura pangaruna nggomid̄oho? Madena Al Masih d̄i salib wa'ura ngoa kab̄ae poda b̄a nahu kai taho poda d̄i nggomid̄oho!

²Ngoapu d̄i nahu sab̄ua lampa rawi ake: Sab̄ua nggomid̄oho wa'ura tarima aomu Roh Allah b̄ara kalampamu hukum Taurat, atao b̄ara nggomid̄oho ringamu Haba Mataho rad̄i Ruma Hatalla ro imbi d̄i Al Masih?

³B̄ab̄auku nggomid̄oho ipikaimu sampula! Nggomid̄oho wa'ura tampu'umu mori mab̄ou kai Roh Allah, sab̄ua ake nggomid̄oho ma ne'e raka sampuruna kai tenggo ra wale ndaimu?

⁴Sab̄ua nabata sara'a rawa'u iu b̄a nggomid̄oho ede? Kaisi batana!

⁵Ruma Hatalla mbeina Roh-Na d̄i nggomid̄oho ro kawarana b̄isa ra guna-b̄isa ra guna d̄i woha nggomid̄oho. Sab̄ua Ruma Hatalla karawina ede b̄ara nggomid̄oho kalampamu hukum Taurat atao b̄ara nggomid̄oho ringamu Haba Mataho ede ro imbi d̄i Al Masih?

⁶ Ede sama b̄une ratunti ade Alkitab mab̄oha Ibrahim b̄une ake, ”Ibrahim, imbi d̄i Ruma Hatalla, ro b̄ara imbina ede sia tarima b̄a Ruma Hatalla kai dou ma ncihi ro raso d̄itando Ruma Hatalla.”

⁷ Ndad̄i pab̄ua nggomid̄oho kawaramu weki b̄a one dou ma poda-poda londo ra mai la Ibrahim eded̄u dou-dou ma imbi d̄i Ruma Hatalla.

⁸ Alkitab wa'ura eda uluna b̄a one Ruma Hatalla naloaku kandad̄i dou-dou laina Yahudi taho mbali lab̄o Ruma Hatalla, nggara siad̄oho imbina d̄i Sia. Haba Mataho ede rangoa ulu d̄i la Ibrahim d̄ei sake ake, ”Kai ncai nggomi, Ruma Hatalla nambeiku bareka d̄i sara'a ela manusia d̄i wawo dunia.”

⁹Ibrahim na'imbiku, ndad̄i sia d̄i mbei bareka. Ndede rau sara'a dou ma imbi, d̄imbei bareka sama-sama lab̄o Ibrahim.

¹⁰ Dou-dou ma wi'i weki d̄i hukum Taurat, sara'ana mori awa mai b̄a b̄a'a b̄a Ruma. B̄ara ade Alkitab ratunti, ”Dou ma wati to'a kalampa samenana ratunti ade Buku Hukum Taurat d̄i b̄a'a b̄a Ruma Hatalla!”

¹¹ Wati wara kone sab̄ua dou rau rakancihi d̄itando Ruma Hatalla b̄ara kalampana hukum Taurat. Lampa rawi ede wa'ura katada d̄ei Alkitab, ”Cuma dou ma imbi d̄i Ruma Hatalla mpoampa ndad̄ina hubunga lab̄o Ruma Hatalla ndad̄i taho mbali, d̄imamori!”

¹² Pala hukum Taurat wati d̄i dasa imbi. Ade Alkitab ratunti b̄a one dou ma kalampa hukum Taurat, d̄imamori b̄ara hukum ede.

¹³ Pala Al Masih hori kalosana ndaita rad̄i b̄a'a b̄a hukum Taurat. Sia karawina ede kai co'ona weki-Na hina b̄a b̄a'a b̄ara ndaita. B̄ara ade Alkitab ratunti, ”Dou ma made ratero d̄i ri'i haju nab̄a'a b̄a Ruma.”

¹⁴Al Masih karawi ndedekaina loakud̄u bareka rasake b̄a Ruma Hatalla d̄i la Ibrahim d̄i mbei rau d̄i dou-dou laina Yahudi. Ade ndedekaina ndai rauta ma imbi d̄i Ruma Hatalla, loa tarima Roh rasake b̄a Ruma Hatalla ede.

¹⁵Cina ra angi! Tahora nahu makani conto ra'iuku sanai-nai. Nggara dou nandawisi sab̄ua sake ro sake ede wa'ura kasaha, ndad̄i wati kone sab̄ua dou rau maloa kabata rasake ede, atao masala'i au-au d̄i rasake ede.

¹⁶ Sake Ruma Hatalla randawi b̄a Ruma Hatalla d̄i ru'u la Ibrahim ro d̄i ru'u dou londo ra mai la Ibrahim. Ade Alkitab wati wara ratunti ”ro d̄i ru'u dou-dou londo ra mai la Ibrahim”, ma aona mboto dou. Maratunti ta ede eded̄u ”ro d̄i ru'u dou londo ra maimu”, aona sab̄ua doumpa, eded̄u Al Masih.

¹⁷ D̄ine'e nggahi b̄a nahu ta ake eded̄u ake: sake Ruma Hatalla wa'ura ndawi ro kasaha ulu wa'u. Hukum Taurat rambei upa ratu tolu mpuru mba'a sawa'u b̄a ede wati loana kambora rakasaha ede ro kambora sake Ruma Hatalla ede.

¹⁸ B̄ara nggara rambei b̄a Ruma Hatalla nawi'i weki d̄i hukum Taurat, ndad̄i ede lai walina rambei rasakekai. Justru taho b̄ara Ruma Hatalla wa'ura sakena d̄i la Ibrahim, ndad̄i Ruma Hatalla mbeikaina ede d̄i sia.

¹⁹Nggara ndedesi, d̄i au mbeikai hukum Taurat? Cambena eded̄u b̄a one hukum ede rasala'i ru'u katada kai rasapa b̄a manusia. Hukum Taurat ede d̄i kani cuma sampe maina sab̄ua dou londo ra mai la Ibrahim, rapehe ade sake Ruma Hatalla d̄i la Ibrahim. Hukum Taurat ede karongga b̄a mala'eka-mala'eka kai kanina sab̄ua manusia.

²⁰Pab̄ua wara d̄ua b̄ae, ede ampona paralu kani sab̄ua dou makalai. Pala Ruma Hatalla wati paraluna dou makalai b̄ara ndai Sia makarawina.

²¹Sab̄ua ede aona b̄a one hukum Taurat wati ncihi ncaona lab̄o rasake Ruma Hatalla? Tantu wati! B̄ara nggara hukum Taurat rambei d̄imambei mori d̄i manusia, ndad̄i manusia naloa taho mbali lab̄o Ruma Hatalla kai ncai hukum Taurat.

²²Pala ade Alkitab ratunti b̄a one samenana ela manusia wara d̄i ade kuasakai b̄a dosa. B̄ara ndedena, rambei rasake kai dasa imbi d̄i Ruma Isa Al Masih d̄i mbei d̄i siad̄oho ma imbi.

²³Sawatipu b̄a raka wakatuna d̄i imbikai d̄i Al Masih, ndai d̄i sandaka poda b̄a hukum Taurat; ndai b̄une rakuru sampe katadakai imbi ede.

²⁴Ade ndedekaina, hukum Taurat mandad̄i sandaka ndaita sampe mai Al Masih d̄imandawi ndai taho mbali lab̄o Ruma Hatalla b̄ara ndaita imbi d̄i Al Masih.

²⁵Ake, b̄ara wa'ura wakatuna manusia loa imbi d̄i Al Masih, ndad̄i ndaita wati walid̄u d̄i jaga b̄a hukum Taurat.

²⁶B̄ara nggomid̄oho imbimu d̄i Isa Al Masih, ndad̄i nggomid̄oho sab̄ua lab̄o Sia; ro b̄ara ndedena nggomid̄oho ndad̄i ana-ana Ruma Hatalla.

²⁷Nggomid̄oho sara'ana wa'ura kasab̄ua kai ngara Al Masih, ndad̄i nggomid̄oho wa'ura tarimamu d̄i weki ndai nggomid̄oho tabe'a-tabe'a ndai Al Masih.

²⁸Ade lampa rawi ake watid̄u wara wali laina dou Yahudi ro dou malaina Yahudi, ada ro dou mahoru weki, mone ro siwe. Nggomid̄oho sara'ana sab̄ua b̄ara Isa Al Masih.

²⁹ Nggara nggomid̄oho ntau Al Masih, ndad̄i nggomid̄oho eded̄u londo ra mai Ibrahim. Ro nggomid̄oho d̄imatarima au rasake b̄a Ruma Hatalla.