Read Bima GALATIA 6 Bible Online

GALATIA 6 - Bima bible

GALATIA 6

¹Cina ra angi! Nggara sab̄ua-sab̄ua dou raraka karawina dosa, pab̄uapu nggomid̄oho ma mori b̄atu Roh Allah, d̄anda ra wa'amu dou ede mbali d̄i ncai ma ncihi. Pala nggomid̄oho pab̄uapu karawi ede kai nggahi ra eli ma ntika, ro sandakapu aina sampe ndai nggomid̄oho hina b̄a goda rau.

²Pab̄uapu nggomid̄oho cua bantupu angi ade sanggomu ncoki dou, loakud̄u ade ndedekaina nggomid̄oho to'a d̄i parenta Al Masih.

³Nggara sab̄ua-b̄ua dou kacaina wekina mapenti, sapodakaina wati, dou ede nakacowaku weki ndaina.

⁴Sanikina dou pab̄ua paresa b̄a ndaina sab̄ua ruku ra rawina taho atao wati. Nggara natahosi, sia loa iu weki banggakai rawi ede. Pala sia edera ntewi kai au rakarawi b̄a dou makalai.

⁵B̄ara cua-cua dou pab̄ua lembana su'u ra tundu ndaina.

⁶Dou ma tarima ngoa ra tei Al Masih, pab̄uaku cenggana lab̄o guruna sara'a ma taho ma wara d̄i sia.

⁷Aina b̄ohakai b̄a tipu. Ruma Hatalla wati loa d̄i kampa'a-mpa'akai! Au ranggud̄a, edeku d̄i weha hasina.

⁸Nggara dou nggud̄ana b̄atu tabe'a manusia kaina, sia d̄imapoke madekai rad̄i tabe'ana ede. Pala sia nanggud̄asi b̄atu rad̄ende ra wa'a b̄a Roh Allah, sia d̄imapoke mori masapodakaina ro ma'ederahid̄i ro santoi-ntoina rad̄i Roh Allah.

⁹B̄ara ndedena, aina ndai ndad̄i to'i ade karawi lampa rawi ma taho; b̄ara nggara ndai wati denggata karawi lampa rawi-lampa rawi ede sakali wakatu d̄ipokekai b̄a ndaita hasina.

¹⁰Ndad̄i, salama wara ncaina ru'u ndaita, pab̄uaku ndai karawita mataho d̄i samenana dou, mapenti poda d̄i cina ra angi ndaita ma sab̄ua imbi.

¹¹Tio kab̄aepu wela akena ratunti b̄a ndai nahu kai huru ma na'e-na'e.

¹²Dou-dou ma ne'e ka'ese weki kai lampa rawi matada, siad̄ohora ma usaha pakasa nggomid̄oho b̄atu atora suna. Pala siad̄oho karawikaina cuma ede loakud̄u siad̄oho wati kancoki b̄a dou Yahudi b̄ara salib Al Masih.

¹³Dou-dou ma b̄atu atora suna rau wati kalampana hukum Taurat. Pala ne'e b̄a siad̄oho, nggomid̄oho d̄i suna, loakud̄u siad̄oho roina b̄a one nggomid̄oho to'akaimu d̄i atora ede.

¹⁴Pala nahu wati ne'e podaku kabangga d̄i au-au rau, selasi Ruma ndaita Isa Al Masih ma wa'ura made d̄i salib. B̄ara ede Sia wa'ura made d̄isalib, ndad̄i dunia watid̄u wara aona au-au ru'u b̄a nahu. Ro d̄i ru'u dunia ake, nahu rau b̄une-b̄uneta wa'ura made.

¹⁵Rasuna atao wati rasuna, ede wati pentina. Ma penti eded̄u ndad̄i manusia b̄ou.

¹⁶Ru'u dou-dou ma mori kai nggahi ndedena, ro ndede rau ru'u sara'a ela Ruma Hatalla, nahu mapamao d̄i Ruma Hatalla d̄imambei taho ra ntai ro rahama-Na.

¹⁷Sawa'u b̄a ede, aina kone sab̄ua dou rau makasusa nahu wali, b̄ara d̄i sarumbu nahu wara bukuti-bukutina b̄a one nahu anamori Ruma Isa.

¹⁸Raho-raho to'impa Ruma ndaita Isa Al Masih mbeina bareka ncau d̄i cina ra angi. Amin. Salam do'a nami, Paulus