Read Bima EFESUS 3 Bible Online

EFESUS 3 - Bima bible

EFESUS 3

¹B̄ara ndedena nahu, Paulus, rabui b̄ara Ruma Isa Al Masih d̄i ru'u makapentikai nggomid̄oho ma laina Yahudi.

²Tantu nggomid̄oho mawa'ura ringa b̄a one Ruma Hatalla, b̄ara taho ade-Na, wa'ura mbeina d̄i nahu, taki ra puta ake ru'u pentikai nggomid̄oho.

³Ruma Hatalla ngoana rahasia nia-Na ro ngoana d̄i nahu. (Mab̄oha lampa rawi ake wa'ura tunti kaporo b̄a nahu ta ese,

⁴ ro nggara bacasi b̄a nggomid̄oho, nggomid̄oho d̄imaloa ka'ao rahasia mab̄oha Al Masih b̄une loa ka'ao b̄a nahu.)

⁵Ntoina rahasia ede watipu parana ngoana d̄i manusia, pala ake Roh Allah wa'ura katadana d̄i rasu-rasu ro nabi-nabi-Na.

⁶Rahasia ede, eded̄u ake: Kai ncai Haba Mataho ede, dou laina Yahudi b̄atu iu bareka-bareka Ruma Hatalla ma ntoina d̄i sadia wea ru'u dou Yahudi mpoampa. Dou-dou malaina Yahudi wa'ura ndad̄i anggota sarumbu ma sama, ro b̄atu tarima ao au rasake b̄a Ruma Hatalla kai ncai Ruma Isa Al Masih.

⁷Ruma Hatalla mbeina d̄i nahu bareka — eded̄u taki ra puta — d̄imangoa ra kahaba Haba Mataho ede. Nahu tarimaku bareka ede, kai ncai kuasa Ruma Hatalla ma karawi d̄ei sarumbu nahu.

⁸D̄i ade weki samenana ela Ruma Hatalla, nahura ma cumpukai darere mori. Pala Ruma Hatalla mbeina d̄i nahu bareka ake: taki ra puta d̄imangoa ra kahaba d̄i dou-dou malaina Yahudi Haba Mataho mab̄oha ntau ra wara Al Masih ma wati wara cumpuna;

⁹ro rau loakud̄u kai nahu sara'a dou b̄ade b̄uneku Ruma Hatalla, Makandad̄i dunia lab̄o isina ake, karawina nia-Na ma aipu ntoi poda wa'una d̄irahasia kai d̄i dunia.

¹⁰Makasu Ruma Hatalla eded̄u, loakud̄u ake, kai ncai ela-Na, samenana ma nenti kuasa ese woha ai nab̄ade timba ra lemba Ruma Hatalla ade samenana pahuna.

¹¹Ruma Hatalla karawina ede ncihi ncao lab̄o nia-Na ma ederahid̄i, rakarawi-Na kai ncai Isa Al Masih Ruma ndaita.

¹²Kai imbi d̄i Al Masih ro b̄ara sab̄ua lab̄o Sia, ndai d̄i mbei wakatu d̄id̄enikai d̄i Ruma Hatalla kai b̄ini b̄a imbi ade.

¹³B̄ara ndedena, d̄i raho b̄a nahu eded̄u; aina darura mab̄oha au rancoki iu b̄a nahu b̄ara nggomid̄oho, b̄ara samenana ede, eded̄u d̄i tahokai nggomid̄oho.

¹⁴B̄ara ndedena, nahu doho sujuku d̄i tando Ama.

¹⁵Rad̄i Siara sanikina iwa ra weki d̄i saroga ro d̄i dunia tarimana tabe'a-Na ma lai ndaina.

¹⁶Nahu do'aku raho to'impa Ruma Hatalla ma wancu d̄ese ra ntasa kaloana ru'u katenggokai ade mpidamu kai Roh-Na.

¹⁷Raho to'impa b̄ara nggomid̄oho imbi d̄i Al Masih, Al Masih ngge'e d̄ei ademu, ro morimu kai dasa ro d̄i kuasakai b̄a meci angi.

¹⁸Nahu do'aku raho-raho to'impa sama-sama lab̄o sara'a ela Ruma Hatalla, nggomid̄oho iu podamu, b̄a wancu pajana ro naruna, ro d̄esena ro d̄eina meci ra ca'u b̄a Al Masih,

¹⁹ma kai aka manusia wati d̄i loa ka'ao sad̄ei-d̄eina. Raho-raho to'impa nggomid̄oho patamu meci ra ca'u b̄a Al Masih ede, ndad̄ina nggomid̄oho b̄inikai b̄a tabe'a-tabe'a Ruma Hatalla ma mpuruna.

²⁰Kai kuasa Ruma Hatalla ma caha karawi d̄ei sarumbu ndaita, Ruma Hatalla naloa karawi d̄o'oku ncewi mbotona ntewi kaisi au raloa raho b̄a ndaita atao kananu b̄a ndaita.

²¹Pab̄uaku Ruma Hatalla d̄ikad̄ese ra kantasa b̄a londo ra mai d̄i ade ela-Na, kai ncai Ruma Isa Al Masih. D̄ese ra ntasara Ruma Hatalla santoi-ntoina! Amin.