Read Bima EFESUS 4 Bible Online

EFESUS 4 - Bima bible

EFESUS 4

¹B̄ara ndedena nahu — sab̄ua dou rabui, rabui b̄ara karawi ru'u Ruma — maraho poda-poda d̄i nggomid̄oho: moripu mancihi ncao lab̄o morimu kai dou rawa'u ou b̄a Ruma Hatalla.

² Pab̄uapu nggomid̄oho ka'awa weki ncau, mapu ra ntika nggahi ra eli ro saba. Katadapu meci ra ca'umu kai bantu angi sab̄ua lab̄o sab̄ua dou.

³Usahapu kai kapoda ade ru'u mori kai dame loakud̄u kasab̄ua weki randawi b̄a Roh Allah ngge'empa tahona.

⁴Wara sab̄uampa sarumbu, ro sab̄ua Roh. Ndede rau nggomid̄oho ra'ou ru'u sab̄ua kane'e ma sama.

⁵Wara sab̄uampa Ruma, sab̄ua imbi, sab̄ua kandeu karaso,

⁶ro sab̄ua Ruma Hatalla ma ndad̄i Ama samenana dou. Siaku Ruma sab̄ini b̄a dunia, ma karawi kai samenana, ro nakuasa d̄i ade samenana.

⁷Ndai cua-cua tarima au rambei b̄une au rambei b̄a Al Masih.

⁸ Ade Alkitab ratunti, ”Wakatu Sia ne'ena d̄i hid̄i ma d̄ese poda, Sia wa'ana mboto dou rataha; ro Sia mbeina au-au rambei d̄i ru'u b̄a manusia.”

⁹Nggara nggahisi ”Sia ne'e” ede aona Sia saramba-rambana wa'ura londo sampe awa hid̄i ma awa poda d̄i dana ake.

¹⁰Ro Sia ma wa'ura londo ede, Sia raura ma ne'e sampe d̄i hid̄i ma d̄o'o ncewi d̄ese rad̄i sara'a langi ndad̄ina sara'a dunia lab̄o isina kanggini b̄a maikai-Na.

¹¹Siara ma ”mbei au rambeina d̄i manusia”; sarundena hanta-Na ndad̄i rasu, ma kalai ndad̄i nabi, ma kalai wali ndad̄i dou mangoa ra kahaba Haba Mataho ede, ro ma kalai rau rahanta-Na ndad̄i guru-guru ro dou masandaka ela Ruma.

¹²Ake karawikai-Na loakud̄u ela Ruma Hatalla d̄i mbei tenggo ra wale loakud̄u karawi weana Ruma ro tu'una sarumbu Al Masih.

¹³Ade ndedekaina, sara'a ndaita ndad̄i sab̄ua b̄a imbi ma sama ro loa ka'ao ma sama mab̄oha Ana Ruma Hatalla. Ro ndaita ndad̄i dou-dou ma wa'ura loa ka'ao ma naha-naha ntoi naha sala'i sampuruna b̄une Al Masih.

¹⁴Ndad̄i ndaita watid̄u ndad̄i d̄ambe-d̄ambe to'i wali ma ragu-ragu ro cad̄i ca'ele b̄a mboto pahu ngoa ra tei rad̄i dou-dou ma dab̄ae aka. Siad̄oho kasantudana dou kai kukukeko siad̄oho.

¹⁵Wati! Pala ndaita pab̄ua katada lampa rawi ma ncihi kai ade mab̄inikai b̄a meci ra ca'u, ndad̄ina d̄ei samenana lampa rawi, ndaita naha ntoi naha ndad̄i mpuruna b̄une Al Masih, ma ndad̄i mana'ekai ndaita.

¹⁶ D̄i ade parenta-Na, sara'a anggota sarumbu ede ntika sadunduna, ro cua ndapo angina b̄a cua-cua puruna. Ro nggara niki anggota ede karawi b̄une pab̄ua d̄i karawina, ndad̄i sara'a sarumbu ede d̄imanaha na'e ro tenggo kai ncai meci ra ca'u.

¹⁷B̄ara ndedena kai ngara Ruma, akeku d̄i nggahi b̄a nahu lab̄o kapodaku: ai walina mori b̄une dou-dou ma wati pata Ruma Hatalla, ro makananu ma lai-lai.

¹⁸Fiki ra kananu siad̄oho wa'ura rindi. Siad̄oho wati patana mori ra woko rambei b̄a Ruma Hatalla, b̄ara siad̄oho wati poda ntauna loa ra tingi au-au mab̄oha Ruma Hatalla. Ndedekai siad̄oho, b̄ara tera tutana.

¹⁹Siad̄oho watid̄u ntauna maja wali, ndad̄ina siad̄oho b̄atuna sara'ana nawasu, ro mori nggele saca'u adena.

²⁰Pala Ruma Isa Al Masih rapata b̄a nggomid̄oho laina b̄une ede!

²¹Nggomid̄oho wa'ura ringamu mab̄oha Sia! Ro kai anamorid̄oho-Na, nggomid̄oho wa'ura tei rau mab̄oha tabe'a Ruma Hatalla ma wara d̄i Sia!

²² B̄ara ndedena wi'i pakipu manusia mantoi lab̄o cara mori ra woko mantoi ma wunga ka'iha b̄a kane'e-ne'ena ma kasantudana.

²³Pab̄uapu ade rafiki kananumu d̄i kab̄ou sara'a.

²⁴ Pab̄uapu nggomid̄oho morimu kai manusia b̄ou rakandad̄i b̄atu rakane'e Ruma Hatalla; eded̄u kai tabe'a ma ncihi, rombo lab̄o raso.

²⁵ B̄ara ndedena samenana cina ra angi, ai walina cowa. Karawipu marombo sab̄ua d̄i sab̄ua dou, b̄ara ndai sara'a eded̄u sama-sama anggota sarumbu Al Masih.

²⁶ Nggara mbanisi nggomid̄oho, aina co'omu mbanimu ede, kandad̄ina nggomid̄oho dosa. Aina mbanimu sanaru ainaina,

²⁷loakud̄u Ibilis wati rakana ncai.

²⁸Dou ma ngina mpanga, pab̄uaku denggana mpanga. Pala sia pab̄uaku karawina loakud̄u rakana ngaha ra nono kai marombo lab̄o naloa bantu dou ma dawara.

²⁹Nggara nggomid̄oho manuntusi, aina kanimu nggahi ra eli ma sampu. Kanimpa nggahi ra eli ma kataho ro mambei bantu d̄i dou makalai. Nggahi ra eli b̄une ede d̄imakamaina tahokai d̄i dou-dou ma ringana.

³⁰Aina kancokimu ade Roh Allah. Nggomid̄oho wa'ura katanda kai Roh, mandad̄i ntau Ruma Hatalla. Roh ede rau mandad̄i d̄i nenti b̄a one Ainaina d̄i Hori kalosakai d̄imamai ru'umu.

³¹Kamborapu samenana iu pili ade, wi'i d̄i ade rarawi dou, lab̄o mbani. Aina kanggica-kanggica wali ro i'a ra kama'i. Ai walina wara iu daca'u atao iu ade makalai b̄une ede.

³² Pala, pab̄uapu nggomid̄oho taho ademu ro kasi ade angi sab̄ua d̄i sab̄ua dou, ro cua kangampu angi sama b̄une Ruma Hatalla rau makangampu wea nggomid̄oho kai ncai Al Masih.