Read Bima EFESUS 5 Bible Online

EFESUS 5 - Bima bible

EFESUS 5

¹Nggomid̄oho eded̄u ana-ana Ruma Hatalla d̄i meci ra ca'u-Na, b̄ara ndedena nggomid̄oho pab̄uapu usaha b̄atu rawi Ruma Hatalla.

² Morimu pab̄uapu kapoda kai ade b̄a meci ra ca'u, b̄une Al Masih rau mameci ra ca'u ndaita. Sia korobana sarumbu-Na ru'u ndaita, eded̄u sab̄ua d̄onggo ra mbei ma mengi ro makasana wea ade Ruma Hatalla.

³Nggomid̄oho eded̄u ela Ruma Hatalla. B̄ara ndedena, karawi-karawi ma nggele ro ma wati patu, atao na'e ade, wati patuna warana d̄i woha nggomid̄oho. Aina sampe warakai dou makalai mantau alasa d̄imanggahi b̄a one nggomid̄oho karawimu lampa rawi b̄une ede.

⁴Wati patu rauna nggomid̄oho kalosamu nggahi ra eli ma sampu, ma nggele, ro ma wati patuna. Pala nggomid̄oho pab̄uapu renta syuku d̄i Ruma Hatalla.

⁵Tio kab̄ae podapu: dou ma karawi manggele, atao mawati taho, atao na'e ade (rawi b̄une ede samampa b̄une dou manemba berhala), dou ede wati loana ndad̄i anggota ela Karaja'an Al Masih ro Ruma Hatalla.

⁶Aina nggomid̄oho b̄ohakai b̄a tipu b̄a nuntu ra nggahi ma lao ncau. B̄ara lampa rawi ake ma kamaikaina mbani Ruma Hatalla d̄i dou-dou ma wati to'a d̄i Sia.

⁷Ndad̄i, aina hubunga angimu lab̄o dou-dou b̄une ede.

⁸Ndai nggomid̄oho ntoina wara d̄i ade marindi ncaki. Ake nggomid̄oho mawa'ura ndad̄i ela Ruma, ndad̄i nggomid̄oho wa'ura wara d̄i ade taroakaina. B̄ara ndedena nggomid̄oho pab̄uapu mori d̄i ade taroakaina.

⁹B̄ara rad̄i taroa edeku wontukai samenana rawi ma taho, ma'adi ro mapoda d̄i ntanda b̄a Ruma Hatalla.

¹⁰Usahapu pata au ma kasana wea ade Ruma.

¹¹Aina karawimu rawi-rawi ma wati wara one rakarawi b̄a dou-dou ma mori d̄ei marindi ncaki. Pala, pab̄uapu nggomid̄oho rojomu dou-dou makarawi lampa rawi-lampa rawi b̄une ede. (

¹²B̄ara lampa rawi-lampa rawi rakarawi b̄a siad̄oho kai cili-cili ede, d̄i nuntu ra nggahi rau wa'ura d̄i majakai.)

¹³Samenana d̄i nggahi d̄i ade taroa, d̄imatada poda.

¹⁴B̄ara samenana ma loa d̄i eda poda, eded̄u taroa. B̄ara ndedena d̄i nggahi, ”Tu'ura, oe nggomi ma maru, ro mori mbalira rad̄i mademu! Al Masih d̄imakataroana nggomi.”

¹⁵B̄ara ndedena, tio kab̄ae katahopu, cara morimu. Aina mori b̄une dou-dou masampula; moripu b̄une dou-dou maloa timba ra lemba.

¹⁶ Kani kataho podapu sanikina wakatu ma wara d̄i nggomid̄oho, b̄ara wakatu ake, eded̄u wakatu ma dab̄ae.

¹⁷Aina sampula, pala tio kab̄aepu au rakane'e b̄a Ruma.

¹⁸Aina nggomid̄oho mawu b̄a anggo, b̄ara ndedena naka'ihaku nggomid̄oho. Pala, pab̄uapu nggomid̄oho kuasakai b̄a Roh Allah.

¹⁹ Kanipu nggahi ra eli rad̄i zabur, rawa roi ra wadi, ro rawa roi ra wadi Ruma, d̄ei nuntu ra nggahimu. Pab̄uapu nggomid̄oho kai d̄ihi ade rawamu roi ra wadi ru'u Ruma.

²⁰Renta ncau-ncaupu syuku d̄i Ruma Hatalla Ama ndaita kai ngara Isa Al Masih Ruma ndaita mab̄oha au-au rau.

²¹D̄i lia ra horoma kai Al Masih, pab̄uapu nggomid̄oho b̄atu nggahi angi sab̄ua lab̄o sab̄ua dou.

²² Wei, b̄atupu nggahi rahimu, b̄une d̄i Ruma.

²³B̄ara rahi eded̄u mana'ekai d̄i weina, sama b̄une Al Masih rau mandad̄i mana'ekai d̄i ela-Na ro ndai Sia rau Sangaji Mambei salama ru'u ela-Na ma ndad̄i sarumbu-Na.

²⁴Sama b̄une ela rau-Na mab̄atu nggahi Al Masih, ndede rauku ade samenana lampa rawi wei pab̄uapu b̄atu nggahi rahi.

²⁵ Rahi, meci ra ca'upu weimu, sama b̄une Al Masih mameci ra ca'u ela-Na ro korobana sarumbu-Na ru'u ela-Na ede.

²⁶Al Masih karawina ede loakud̄u Sia karasona ela ede kai ngoa ra tei-Na ro kai oi ncai ndeu karaso, loakud̄u peade Sia loa d̄onggona d̄i Ruma Hatalla.

²⁷Ade ndedekaina Al Masih ndawina ela-Na, kid̄i kai na'e ra ntoruna ro raso d̄itando-Na, wati kone wara ma'iha atao mawati wara ma'iha au-au.

²⁸Ndede rau rahi pab̄uaku meci ra ca'u weina b̄une sia meci ra ca'una sarumbu ndaina. Dou mameci ra ca'u weina ede aona sia meci ra ca'u sarumbu ndaina. (

²⁹Wati parana warana dou ma daca'u sarumbu ndaina. Pala, sia nakab̄ua katahoku ro nasandakaku b̄une Al Masih rau makab̄ua kataho ela-Na.

³⁰Ndai tab̄adeku ede, b̄ara ndaita eded̄u anggota sarumbu Al Masih.)

³¹ Ade Alkitab ratunti, ”B̄ara ndedena dou mone d̄imatu'u wi'i ina ra amana d̄i sab̄uakaina lab̄o weina, ro d̄uana ede d̄imandad̄i sab̄ua.”

³²Ayat ede nantau aona ma d̄ei. Aona nggahi nahu eded̄u d̄apo angi Al Masih ro ela-Na.

³³Pala ayat ede wara ndapo angi rauna lab̄o nggomid̄oho: Pab̄uaku sanikina rahi meci ra ca'u weina b̄une sia meci ra ca'una weki ndaina, ro pab̄uaku sanikina wei usaha ru'u lia ra horomakaina rahina.