Read Bima FILIPI 2 Bible Online

FILIPI 2 - Bima bible

FILIPI 2

¹Nggomid̄oho tenggo, b̄ara nggomid̄oho sab̄uamu lab̄o Al Masih. Ro nggomid̄oho neo ademu b̄ara Al Masih mameci ra ca'umu! Nggomid̄oho d̄anda ra wa'a b̄a Roh Allah, ro nggomid̄oho cua meci angi rau ro ntau kasi ade sab̄ua lab̄o sab̄ua dou.

²Cobapu nggomid̄oho poda-poda kasanamu ade nahu kai lampa rawi-lampa rawi ake: Mori kasab̄uapu ademu kai meci ra ca'umu ma sama, kai kananu ma sama ro kane'e ma sama.

³Aina karawimu au-au b̄ara rarundu b̄a mapenti ndai kese, atao d̄i kasombokai weki. Pala ndakeku pab̄uapu cua-cua nggomid̄oho kai ka'awa weki wi'ikai dou makalai ncewi taho ntewi kaisi d̄i weki ndai.

⁴Tio kab̄aepu au mapenti d̄i ru'u b̄a dou makalai; aina ma penti d̄i ru'u b̄a ndai mpoa.

⁵Pab̄uapu nggomid̄oho fiki ra kananumu b̄une Ruma Isa Al Masih:

⁶D̄idasana Sia sama lab̄o Ruma Hatalla, pala Sia wati wi'ikaina weki b̄a one ka'ada'a-Na ma sama lab̄o Ruma ede pab̄ua d̄i nenti kacia-Na.

⁷Pala, Sia hori sara'ana edempara ndad̄i sama b̄une sab̄ua dou ada. Sia ndad̄i b̄une manusia, ro tada morina b̄une manusia.

⁸Sia ka'awana weki, ro mori kai to'a d̄i Ruma Hatalla sampe madena — eded̄u made d̄isalib.

⁹B̄ara ndedena, Ruma Hatalla hanta kad̄ese-d̄ese podana Sia, ro mbeina d̄i Sia kuasa ma ncewi na'e ntewi kaisi samenana kuasa ma kalai.

¹⁰ Ndad̄i d̄i lia ra horomakai Ruma Isa, sara'a mahluk d̄i saroga, ro ma d̄i dunia, ro ma awa mai b̄a dana, d̄imanemba Sia.

¹¹Siad̄oho sara'ana d̄imamangaku b̄a one Al Masih eded̄u Ruma ma d̄ese ra ntasa; ade ndedekaina, Ruma Hatalla, Ama ndaita ma wara d̄i Saroga d̄i kad̄ese ra kantasa.

¹²B̄ara ndedena, cina ra angi meciku, b̄une santika nggomid̄oho to'a ncaumu d̄i nahu, d̄i wakatu nahu waraku d̄i woha nggomid̄oho, ndad̄i nancewi wali ake d̄i wakatu cua d̄o'o, pab̄uapu nggomid̄oho ngge'empa to'amu d̄i nahu. Nggomid̄oho wa'ura kasalama b̄a Ruma Hatalla, ndad̄i usaha ncaumpa loakud̄u taho ra ntaimu ndad̄i taho poda. Karawipu lampa rawi ede kai horoma ro to'akai d̄i Ruma Hatalla,

¹³b̄ara ndai Ruma Hatalla ma karawi d̄ei wekimu d̄imakandad̄ina nggomid̄oho rela ro sanggo kasana wea ade Ruma Hatalla.

¹⁴Karawipu samenana au-au kai wati bada red̄e atao cence ncihi.

¹⁵ Ade ndedekaina nggomid̄oho maturu teiku b̄a one nggomid̄oho eded̄u ana-ana Ruma Hatalla ma wati wara mancara, ma mori kai raso ade ro ncihi d̄i woha dou madab̄ae ro madosa. Ro d̄i wakatu nggomid̄oho karonggamu d̄i siad̄oho haba ma mbei mori, pab̄uapu nggomid̄oho ndad̄imu ru'u siad̄oho b̄une taroa ma kalea makataroa dunia. Nggara nggomid̄oho morimu b̄une ede, peade wara alasana ru'u b̄a nahu d̄i iukaiku bangga mab̄oha nggomid̄oho d̄i wakatu Ruma Isa Al Masih mai mbalina. Ede bukutina, b̄a one karawi nahu wati lao ncauna, ro usaha nahu wara hasina.

¹⁷Kombisi nahu d̄i hade ro ra'aku ndad̄i b̄une koroba ralua d̄i wawo au rad̄onggo ra mbei b̄a nggomid̄oho d̄i Ruma Hatalla d̄i katandakai b̄a one nggomid̄oho imbimu d̄i Sia. Nggara podasi ede pab̄uaku ndedena, nahu syuku d̄i lampa rawi ede, ro b̄atu neo ade lab̄o nggomid̄oho.

¹⁸Ndede rau nggomid̄oho pab̄uapu iu sana ro b̄atu neo ade lab̄o nahu.

¹⁹Nahu ka'imbi b̄a one kai bantu b̄a Ruma Isa, nahu loa laloku nggadu la Timotius d̄i nggomid̄oho, loakud̄u nahu loa neo adeku b̄ara haba mab̄oha nggomid̄oho.

²⁰La Timotius mpoampa dou ma sab̄ua fiki ra kananu lab̄o nahu, ro poda-poda makananu wea taho ra ntikamu.

²¹Sara'a ma kalai na'urumpa au mapenti weki ndai mpoana, laina mapenti d̄i ru'u Ruma Isa Al Masih.

²²Ndai nggomid̄oho wa'ura edamu bukutina b̄a one la Timotius wara onena. Sia nawa'ura karawi kapoda ade lab̄o nahu, d̄i ngoa ra kahabakai Haba Mataho rad̄i Ruma Hatalla. Nami d̄ua b̄une ana lab̄o amampa.

²³B̄ara ndedena, roci sawa'u b̄a nahu b̄adeku b̄uneku parakara nahu cumpukaina peade, nahu d̄imanggadu sia d̄i nggomid̄oho.

²⁴Nahu ka'imbi b̄a one kai bantu b̄a Ruma, ndai nahu rau wati ntoi walina d̄imamai lamba nggomid̄oho rau.

²⁵Mab̄oha cina ndaita la Epafroditus ranggadu b̄a nggomid̄oho, d̄imabantu nahu, iu b̄a nahu naparaluku kau sia lao mbali d̄i nggomid̄oho. Sia nawa'ura ingana nahu d̄ei karawi lab̄o kapodakai ade nahu.

²⁶Sia lingi poda adena d̄i nggomid̄oho sara'ana, ro sia darura adena b̄ara nggomid̄oho wa'ura rakamu haba b̄a one sia masupu.

²⁷Poda romo sia supuna d̄i sato'i damadekaina. Pala Ruma Hatalla kasi adena d̄i sia; ro laina d̄i sia mpoa, pala d̄i nahu rau, loakud̄u nahu aina ipi ncoki ade wali.

²⁸B̄ara ndedena, nanaha na'e ne'e nahu rau d̄imakau sia lao mbali d̄i nggomid̄oho, loakud̄u nggomid̄oho neo ade walimu nggara nggomid̄oho eda angi lab̄omu sia, ro ade nahu rau ndad̄i sana.

²⁹Ndad̄i, tarima aopu sia kai sana ademu kai sab̄ua dou cinata ma sama imbi. Kaco'ipu samenana dou ma b̄une sia.

³⁰D̄iru'u pentikai karawi Al Masih, sia d̄i sato'i damadekaina; sia nate'eku nawana b̄a d̄i bantukaina nahu kai ngara nggomid̄oho.