Read Bima KOLOSE 1 Bible Online

KOLOSE 1 - Bima bible

KOLOSE 1

¹Cina ra angi ela Ruma Hatalla d̄i Kolose ma to'a kasab̄ua weki lab̄o Al Masih! Kai rasu Ruma Isa Al Masih — kai rahanta b̄a Ruma Hatalla — nahu, Paulus, sama-sama lab̄o cina ndaita la Timotius, mapamao raho-raho to'impa Ruma Hatalla Ama ndaita mbeina bareka ro taho ra ntai d̄i ru'u nggomid̄oho.

³Nami wa'ura ringamu b̄a one nggomid̄oho ma'imbi d̄i Ruma Isa Al Masih ro nggomid̄oho meci ra ca'umu samenana ela Ruma Hatalla. B̄ara ndedena, d̄i wakatu nami do'a weamu d̄i ru'u nggomid̄oho, nami marenta ncau tarima kasi d̄i Ruma Hatalla, Ama Ruma ndaita Isa Al Masih.

⁵Nggomid̄oho ma'imbiku ro nggomid̄oho mameci ra ca'uku, b̄ara nggomid̄oho mane'e d̄i au rasadia d̄i saroga b̄a Ruma Hatalla d̄i ru'u nggomid̄oho. Nggomid̄oho wa'ura ringamu mab̄oha lampa rawi ede, aipu Haba Mataho ma ncihi rakarongga d̄i nggomid̄oho.

⁶Haba rad̄i Ruma Hatalla ede, mbou d̄i sara'a dunia, lab̄o mori dou d̄i mbei bareka ncau b̄a haba ede, sama b̄une morimu rambei bareka ratampu'u aipu nggomid̄oho ringamu mab̄oha rahama Ruma Hatalla ro poda-poda kalu'u ra'iumu d̄ei ademu.

⁷ Lampa rawi ede d̄ikarongga d̄i nggomid̄oho b̄a la Epafras, lenga rameci ra ca'u b̄a nami. Sia eded̄u dou makarawi wea Al Masih ma caha karawi d̄i ru'u pentikai ndaita.

⁸Rad̄i siana nami ringakaimu b̄a one kai kuasa rad̄i Roh Allah nggomid̄oho loa cua meci ra ca'u angi.

⁹B̄ara ndedena, nami do'a wea ncau ru'u nggomid̄oho, ratampu'u nami ringamu mab̄oha nggomid̄oho. Pamao b̄a nami d̄i Ruma Hatalla loakud̄u Roh Allah mbeina d̄i nggomid̄oho loa timba ra lemba ro ka'ao ndad̄ina nggomid̄oho b̄ademu kai sampuruna au rakane'e b̄a Ruma Hatalla.

¹⁰Ade ndedekaina nggomid̄oho loa mori b̄atu kane'e Ruma Hatalla, ro makasana wea ncau ade-Na, ndad̄ina d̄ei samenana au-au nggomid̄oho loa mbei hasi lampa rawi-lampa rawi ma taho. Ro loa ra b̄ade nggomid̄oho mab̄oha Ruma Hatalla rau d̄imasala'i wali.

¹¹Raho-raho to'impa kai kuasa rad̄i Ruma Hatalla ma d̄ese ra ntasa, nggomid̄oho d̄i katenggo ndad̄ina nggomid̄oho masanggo ncoki ra susa samenana au-au kai saba ro sana ade,

¹²ro kai renta tarima kasi d̄i Ama. B̄ara Ama edeku makandad̄ina nggomid̄oho loa tarima au rasadia b̄a Ruma Hatalla ru'u ela-Na d̄i ade Dunia B̄ou Ruma Hatalla ma taroa.

¹³Sia wa'ura hori kalosana ndaita rad̄i kuasa Ibilis, lab̄o wi'i pesona ndai ade Karaja'an Ana-Na rameci ra ca'u-Na.

¹⁴ B̄a Ana-Na ede ndai d̄i hori kalosana; ede aona dosa-dosa ndaita wa'ura kangampu weana.

¹⁵Al Masih eded̄u gamba ma tada rad̄i weki Ruma Hatalla, ma daloa d̄i eda; Al Masih eded̄u Ana ma sarambana, mancewi penti rad̄i samenana rakandad̄i.

¹⁶B̄ara kai ncai Siara Ruma Hatalla kandad̄ina samenana au-au d̄i saroga ro d̄i wawo dunia, samenana au-au ma tada ro ma wati tada, lu'u rau sara'a roh ma kuasa ro ma parenta. Samenana dunia lab̄o isina ake rakandad̄i kai ncai Al Masih ro d̄i ru'u Al Masih.

¹⁷Sawatipu b̄a warana samenana au-au, Al Masih wa'ura ulu wara. Ro b̄ara Sia rau ndad̄i samenana au-au warana d̄i cua-cua hid̄ina.

¹⁸ Siara mana'ekaina rad̄i sarumbuna, eded̄u ela Ruma, b̄a Siaku fu'una mori ra woko ela Ruma ede. Siaku ana ma sarambana, ma saramba-rambakaina rakamori mbali rad̄i madena, loakud̄u ndai Sia mpa ma ndad̄i mapenti poda rad̄i samenana au-au.

¹⁹Ndai Ruma Hatalla ma kane'e loakud̄u samenana au-au ma wara d̄i weki Ruma Hatalla, wara mena rau d̄i weki Ana-Na.

²⁰ Ro kai ncai Ana-Na ede rau Ruma Hatalla nggahi cumpukaina d̄i mandawi samenana au-au dame lab̄o Sia — nataho samenana au-au ma wara d̄i dunia ro d̄i saroga. Ruma Hatalla karawina ede kai ncai mboho ra'a Ana-Na d̄i haju salib.

²¹Ntoina nggomid̄oho d̄o'o rad̄i Ruma Hatalla. Nggomid̄oho madaca'u-Na b̄ara ruku ra rawi ro fiki ra kananumu madab̄ae.

²²Pala ake, kai made Ana-Na, Ruma Hatalla ndawina hubunga nggomid̄oho lab̄o Sia ndad̄i taho mbali. Kai cara ede nggomid̄oho loa d̄iwa'a satando Ruma Hatalla ade ka'ada'ana ma raso, asali lab̄o wati wara ncarana.

²³Pala tantu nggomid̄oho pab̄ua ngge'empa to'a imbi lab̄o kid̄i kante'e d̄i imbikaimu. Ai to'ina nggomid̄oho horimu ne'emu rawa'u mbei d̄i nggomid̄oho aipu nggomid̄oho tarimamu Haba Mataho rad̄i Ruma Hatalla. Haba ede wa'ura ngoa ra kahaba d̄i sanikina dou d̄i sara'a dunia. Ro ru'u ede rau nahu, Paulus, wa'ura ndad̄i dou makarawi d̄i ru'u Ruma.

²⁴Ake nahu neo adeku ncoki ra susa d̄i ru'u pentikai nggomid̄oho. B̄ara kai ncoki ra susa sarumbu nahu, nahu makancihina au ma mbuipu d̄i pab̄ua iu ncoki b̄a Al Masih d̄i ru'u ela-Na, eded̄u sarumbu-Na.

²⁵Ruma Hatalla makauna nahu mandad̄i dou makarawi wea ela-Na, d̄i ru'u pentikaimu. Nahu pab̄uaku karongga haba rad̄i Ruma Hatalla, sara'ana;

²⁶eded̄u haba ma salama ratu-ratu mba'a ma uluna rarahasia b̄a Ruma Hatalla d̄i samenana dou, pala ake d̄i katada d̄i ela-Na.

²⁷D̄i'ela-Na ede, Ruma Hatalla nane'e katada b̄une b̄e tahona ro d̄ese ra ntasana rahasia-Na ede d̄i ru'u sara'a ela manusia. Rahasia ede eded̄u: Al Masih wara d̄ei wekimu, ma aona nggomid̄oho d̄imab̄atu iu na'e ra ntoruna Ruma Hatalla.

²⁸Al Masih edeku rangoa ra kahaba b̄a nami d̄i sanikina dou. Nami mangoa ra kawara ro ngoa ra tei siad̄oho sara'ana kai samenana timba ra lemba. Ne'e b̄a nami eded̄u loakaina sanikina dou loa d̄i wa'a d̄i Ruma Hatalla, kai dou matua fiki ra kananu ade lampa rawi-lampa rawi maraso, b̄ara wa'ura sab̄ua lab̄o Al Masih.

²⁹D̄irakakai lampa rawi ede nahu karawi kapodaku ade. Nahu usaha kapodaku kai sara'a tenggo rambei b̄a Al Masih d̄i nahu ro ma karawi d̄ei weki nahu kai b̄ini b̄a kuasa.