Read Bima KOLOSE 4 Bible Online

KOLOSE 4 - Bima bible

KOLOSE 4

¹ Cina ra angi mandad̄i ruma! Pab̄uapu nggomid̄oho wa'a wekimu mataho d̄i adad̄ohomu kai mancihi ro adi. Kawarapu b̄a one nggomid̄oho rau mantau sab̄ua ruma d̄i saroga

²Pab̄uapu nggomid̄oho do'a kai caha poda ro sadia ncau, ro renta salahopu syuku d̄i Ruma Hatalla.

³Do'a raupu d̄i ru'u nami loakud̄u Ruma Hatalla mbeina d̄i nami wakatu ma taho d̄i ngoa ra kahaba kai haba mab̄oha rahasia Al Masih. B̄ara lampa rawi edeku nahu wakatu ake warakaiku d̄i ade uma bui.

⁴Do'apu loakud̄u nahu loa ngoa kab̄ae rahasia ede kab̄ae-b̄ae poda b̄uneku sapodakaina.

⁵ D̄i ade hubunga nggomid̄oho lab̄o dou-dou ma wati imbi, pab̄uapu nggomid̄oho mori kai loa timba ra lemba ro kanipu sanikina wakatu kai taho poda.

⁶Pab̄uapu lampa rawi-lampa rawi ranggahi b̄a nggomid̄oho nakasanaku ro nantika ncau. Pab̄uapu b̄ade b̄a nggomid̄oho b̄uneku sapodakaina nggomid̄oho cambemu au-au rasod̄i b̄a dou.

⁷ Tikhikus, cina ndaita ma taho ade, d̄imangoa nggomid̄oho samenana au-au mab̄oha nahu. Sia nacaha karawi sama-sama lab̄o nami ru'u Ruma.

⁸ Nahu nggaduku sia d̄i nggomid̄oho kai alasa loakud̄u nggomid̄oho b̄ademu ka'ada'ana nami ro nggomid̄oho neo ademu.

⁹ Onesimus d̄imalao sama-sama lab̄o la Tikhikus; sia sab̄ua dou rad̄i kalompo nggomid̄oho. Sia dou ma to'a ro nami mameci ra ca'uku sia. Sia ro la Tikhikus d̄imangoana d̄i nggomid̄oho samenana ma ndad̄i d̄i hid̄i nahu ake.

¹⁰ La Aristarkhus, ma wara ade uma bui sama-sama lab̄o nahu, nggaduna salam ru'u nggomid̄oho. Ndede rau la Markus, cina campo ompu la Barnabas. (Nggomid̄oho wa'ura nggadu kai haba d̄imaweha ao sia namaisi sia d̄i nggomid̄oho.)

¹¹Salam rau rad̄i Yesus ma ngara rau la Yustus. Rad̄i dou-dou Yahudi ma wa'ura imbi d̄i Ruma Isa, siad̄oho toluna akempa ma karawi sama-sama lab̄o nahu d̄imakalampa karawi rad̄i Ruma Hatalla. Siad̄oho poda-poda wancuku bantuna nahu.

¹² Salam rad̄i la Epafras, sia rau rad̄i kalompo nggomid̄oho. Sia ada Ruma Isa Al Masih, ma do'a poda ncau ru'u nggomid̄oho. Sia raho poda-podana d̄i Ruma Hatalla loakud̄u imbi podamu ndad̄i tenggo ro nggomid̄oho poda-poda tua kananumu, loakud̄u nggomid̄oho kai sampuruna to'akaimu d̄i kane'e Ruma Hatalla.

¹³Nahu wa'ura eda madaku b̄a one sia wa'ura karawi kapodana ade d̄i ru'u nggomid̄oho ro d̄i ru'u dou-dou ma d̄i Laodikia lab̄o Hierapolis.

¹⁴ Dokter Lukas, d̄i meci ra ca'u b̄a ndaita, ro la Demas nggaduna salam d̄i nggomid̄oho.

¹⁵Karonggapu salam nami d̄i cina ra angi ela Al Masih d̄i Laodikia; ro la Nimfa, ro d̄i ela Ruma ma sambea d̄i umana.

¹⁶Sawa'u b̄a sura ake d̄i baca d̄i nggomid̄oho, usahapu loakud̄u ede d̄i baca rau d̄i ela Ruma ma d̄i Laodikia. Ndede rau ndai nggomid̄oho pab̄uapu baca sura ma d̄i nggadu rad̄i Laodikia d̄i nggomid̄oho.

¹⁷ Ro ngoapu la Arkhipus, ”Kanggoripu taki ra puta rambei d̄i nggomid̄oho d̄i karawi weakaimu Ruma.”

¹⁸Salam rad̄i nahu, Paulus. Ndai nahu ma ratuntina salam ake. Aina nefa b̄a one nahu mbuipu d̄i ade uma bui! Raho-raho to'impa Ruma mbeina bareka d̄i nggomid̄oho. Salam do'a nami, Paulus